14.39C Vancouver 14.39C VancouverMay 11, 2021 3:34 PM -
ਗਲੋਬ ਐਂਡ ਮੇਲ ਅਖਬਾਰ ਦੀ ਇੱਕ ਰਿਪੋਰਟ ਅਨੁਸਾਰ ਐਲਬਰਟਾ ਵਿੱਚ ਔਕਸਫੋਰਡ ਐਸਟਰਾਜ਼ੇਨੇਕਾ ਦੀ ਕੋਵਿਡ-19 ਵੈਕਸੀਨ ਦੀਆਂ ਪਹਿਲੀਆਂ ਖੁਰਾਕਾਂ ਦੇਣੀਆਂ ਬੰਦ ਕਰ ਦਿੱਤੀਆਂ ਗਈਆਂ ਹਨ।
ਸੂਬੇ ਵਿੱਚ ਵੈਕਸੀਨ ਟਾਸਕ ਫੋਰਸ ਦੀ ਵਾਗਡੋਰ ਸੰਭਾਲ ਰਹੇ ਕ੍ਰਿਸਟਨ ਕਲਾਇਨ ਮੁਤਾਬਕ ਐਲਬਰਟਾ ਵਿਚ ਐੱਮ.ਆਰ.ਐਨ.ਏ. ਵੈਕਸੀਨ ਦੀਆਂ ਪਹਿਲੀਆਂ ਖੁਰਾਕਾਂ ਦਿੱਤੀਆਂ ਜਾਣਗੀਆਂ।
ਰਿਪੋਰਟ ਅਨੁਸਾਰ ਇਹ ਕਦਮ ਜਿੱਥੇ ਫਾਈਜ਼ਰ-ਬਾਇਓਐਨਟੈਕ ਅਤੇ ਮਡਰਨਾ ਦੀ ਵਧੇਰੇ ਸਪਲਾਈ ਕਾਰਨ ਚੁੱਕਿਆ ਗਿਆ ਹੈ, ਉੱਥੇ ਹੀ ਕਾਫ਼ੀ ਹੱਦ ਤਕ ਇਹ ਫ਼ੈਸਲਾ ਐਸਟਰਾਜ਼ੇਨੇਕਾ ਦੇ ਦੁਰਲੱਭ ਬਲੱਡ ਕਲੌਟ ਨਾਲ ਸਬੰਧਤ ਹੋਣ ਕਾਰਨ ਵੀ ਲਿਆ ਗਿਆ ਹੈ।
ਕਲਾਈਨ ਅਨੁਸਾਰ ਐਸਟਰਾਜ਼ੇਨੇਕਾ ਵੈਕਸੀਨ ਉਨ੍ਹਾਂ ਲੋਕਾਂ ਨੂੰ ਮੁਹੱਈਆ ਕਰਵਾਏ ਜਾਣਗੇ ਜੋ ਐੱਮ.ਆਰ.ਐਨ.ਏ. ਵੈਕਸੀਨ ਹਾਸਲ ਨਹੀਂ ਕਰਨਾ ਚਾਹੁੰਦੇ ਜਾਂ ਸਿਹਤ ਕਾਰਨਾਂ ਕਾਰਨ ਹਾਸਲ ਨਹੀਂ ਕਰ ਸਕਦੇ ਹਨ।
ਉਨ੍ਹਾਂ ਇਹ ਵੀ ਕਿਹਾ ਕਿ ਫਿਲਹਾਲ ਇਹ ਫੈਸਲਾ ਨਹੀਂ ਲਿਆ ਗਿਆ ਕਿ ਜਿਹੜੇ ਲੋਕ ਐਸਟਰਾਜ਼ੇਨੇਕਾ ਵੈਕਸੀਨ ਦੀ ਪਹਿਲੀ ਖੁਰਾਕ ਹਾਸਿਲ ਕਰ ਚੁੱਕੇ ਹਨ, ਉਨ੍ਹਾਂ ਨੂੰ ਦੂਜੀ ਖੁਰਾਕ ਕਿਹੜੀ ਵੈਕਸੀਨ ਦੀ ਦਿੱਤੀ ਜਾਵੇਗੀ।
ਜ਼ਿਕਰਯੋਗ ਹੈ ਕਿ ਐਸਟਰਾਜ਼ੇਨੇਕਾ ਵੈਕਸੀਨ ’ਤੇ ਬੀਤੇ ਕੁਝ ਹਫ਼ਤਿਆਂ ਤੋਂ ਸਵਾਲ ਖੜ੍ਹੇ ਕੀਤੇ ਜਾ ਰਹੇ ਹਨ ਖ਼ਾਸਕਰ ਕੈਨੇਡਾ ਦੇ ਵੈਕਸੀਨ ਮਾਹਰਾਂ ਦੇ ਪੈਨਲ ਵੱਲੋਂ ਕੀਤੀ ਉਸ ਟਿੱਪਣੀ ਤੋਂ ਬਾਅਦ ਜਿਸ ਵਿੱਚ ਉਨ੍ਹਾਂ ਲੋਕਾਂ ਨੂੰ ਐਸਟਰਾਜ਼ੇਨੇਕਾ ਦੀ ਡੋਜ਼ ਦੀ ਬਜਾਏ ਫਾਈਜ਼ਰ ਅਤੇ ਮਡਰਨਾ ਦੀ ਖੁਰਾਕ ਦੀ ਉਡੀਕ ਕਰਨ ਦੀ ਸਿਫ਼ਾਰਿਸ਼ ਕੀਤੀ ਗਈ ਸੀ ਜਿਨ੍ਹਾਂ ਨੂੰ ਕੋਵਿਡ -19 ਤੋਂ ਵਧੇਰੇ ਖ਼ਤਰਾ ਨਹੀਂ ਹੈ।
ਔਨਟਾਰਿਓ ਪਹਿਲਾ ਅਜਿਹਾ ਸੂਬਾ ਬਣ ਗਿਆ ਹੈ ਜਿਥੇ ਦੋ ਵੱਖ ਵੱਖ ਕੰਪਨੀਆਂ ਦੀਆਂ ਕੋਵਿਡ -19 ਵੈਕਸੀਨ ਦੀਆਂ ਖੁਰਾਕਾਂ ਹਾਸਿਲ ਕਰਨ ਦੀ ਮਨਜ਼ੂਰੀ ਦੇ ਦਿੱਤੀ ਗਈ ਹੈ।
