15.9C Vancouver 15.9C VancouverNov 18, 2020 2:38 AM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਦੱਸਿਆ ਕਿ ਕੈਨੇਡਾ ਦੀ ਟ੍ਰੈਵਲ ਐਡਵਾਈਜ਼ਰੀ, ਕਿਸੇ ਵੀ ਪ੍ਰਕਾਰ ਦੀ ਅੰਤਰਰਾਸ਼ਟਰੀ ਯਾਤਰਾ ਤੋਂ ਬਚਾਅ ਕਰਨ ਦੀ ਸਲਾਹ ਦਿੰਦੀ ਹੈ।
ਉਨ੍ਹਾਂ ਕਿਹਾ ਕਿ ਪੈਂਡੇਮਿਕ ਦੇ ਹਾਲਾਤਾਂ 'ਚ ਯਾਤਰਾ ਕਰਨਾ ਸੁਰੱਖਿਅਤ ਨਹੀਂ ਹੈ।
ਹਾਲਾਂਕਿ ਟਰੂਡੋ ਨੇ ਇਹ ਵੀ ਕਿਹਾ ਕਿ ਜੇਕਰ ਯਾਤਰਾ ਕਰਨਾ ਜ਼ਰੂਰੀ ਹੈ ਤਾਂ ਇੰਨਾ ਜ਼ਰੂਰ ਪੁਖਤਾ ਕਰ ਲਿਆ ਜਾਵੇ ਕਿ ਟ੍ਰੈਵਲ ਇੰਸ਼ੋਰੈਂਸ ਕਰਵਾਈ ਜਾਵੇ ਅਤੇ ਵੇਖ ਲਿਆ ਜਾਵੇ ਕਿ ਜਿਸ ਦੇਸ਼ ਦੀ ਯਾਤਰਾ ਕੀਤੀ ਜਾ ਰਹੀ ਹੈ, ਉੱਥੇ ਸਿਹਤ ਸੇਵਾਵਾਂ ਦਾ ਕਿਸ ਪ੍ਰਕਾਰ ਦਾ ਪ੍ਰਬੰਧ ਹੈ।
ਪੀ.ਐਮ. ਟਰੂਡੋ ਨੇ ਕਿਹਾ, ਇਸ ਸਾਲ ਕ੍ਰਿਸਮਸ ਕਿਵੇਂ ਦੀ ਹੋਵੇਗੀ ਫ਼ਿਲਹਾਲ ਕਹਿਣਾ ਮੁਸ਼ਕਿਲ
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਦੇਸ਼ਵਾਸੀਆਂ ਨੂੰ ਕਿਹਾ ਹੈ ਕਿ ਇਸ ਸਾਲ ਦੀਆਂ ਛੁੱਟੀਆਂ ਕਿਵੇਂ ਦੀਆਂ ਹੋਣਗੀਆਂ ਅਤੇ ਕ੍ਰਿਸਮਸ ਕਿਵੇਂ ਮਨਾਈ ਜਾਵੇਗੀ, ਇਹ ਉਸ ਵੇਲੇ ਤੱਕ ਦੇ ਚੁੱਕੇ ਸਭ ਦੇ ਕਦਮਾਂ 'ਤੇ ਨਿਰਭਰ ਕਰੇਗਾ।
ਉਨ੍ਹਾਂ ਕਿਹਾ ਕਿ ਇਹ ਵੇਲਾ ਆਮ ਜਿਹਾ ਨਹੀਂ ਹੈ, ਅਤੇ ਦੇਸ਼ 'ਚ ਵਾਇਰਸ ਸੰਬੰਧੀ ਮਾਮਲੇ ਤੇਜ਼ੀ ਨਾਲ ਵਧਣ ਲੱਗੇ ਹਨ।
ਪਰ ਉਨ੍ਹਾਂ ਕਿਹਾ ਕਿ ਘੱਟ ਪ੍ਰਭਾਵਿਤ ਇਲਾਕਿਆਂ 'ਚ ਅਤੇ ਵਧੇਰੇ ਪ੍ਰਭਾਵਿਤ ਇਲਾਕਿਆਂ 'ਚ ਛੁੱਟੀਆਂ ਦੇ ਵੱਖੋ-ਵੱਖਰੇ ਰਹਿਣ ਦੀ ਸੰਭਾਵਨਾ ਹੈ।
ਉਨ੍ਹਾਂ ਕਿਹਾ ਕਿ ਵਾਇਰਸ ਤੋਂ ਬਚਾਅ ਲਈ ਚੁੱਕੇ ਜਾ ਰਹੇ ਕਦਮਾਂ ਦੀ ਪਾਲਣਾ ਕਰਦੇ ਰਹਿਣਾ ਜ਼ਰੂਰੀ ਹੈ।
ਬੀਤੇ ਇੱਕ ਹਫ਼ਤੇ 'ਚ ਵਾਇਰਸ ਪੀੜਤਾਂ ਦੀ ਮੌਤ ਦਾ ਔਸਤ ਪ੍ਰਤੀ ਦਿਨ 66 ਤੱਕ ਪਹੁੰਚਿਆ
ਦੇਸ਼ ਦੀ ਚੀਫ਼ ਪਬਲਿਕ ਹੈਲਥ ਅਫ਼ਸਰ, ਡਾ. ਥਰੈਸਾ ਟੈਮ ਦਾ ਕਹਿਣਾ ਹੈ ਕਿ ਦੇਸ਼ 'ਚ ਕੋਵਿਡ-19 ਦੇ ਮਾਮਲੇ ਲਗਾਤਾਰ ਵਧ ਰਹੇ ਹਨ, ਅਤੇ ਇਸ ਦੇ ਨਾਲ ਹਸਪਤਾਲ 'ਚ ਦਾਖਿਲ ਵਾਇਰਸ ਪੀੜਤਾਂ ਦੀ ਗਿਣਤੀ ਵੀ ਵਧਦੀ ਜਾ ਰਹੀ ਹੈ।
ਉਨ੍ਹਾਂ ਕਿਹਾ ਕਿ ਬੁਜ਼ੁਰਗਾਂ ਲਈ ਇਸ ਦਾ ਖਤਰਾ ਕਾਫੀ ਵਧ ਗਿਆ ਹੈ।
ਉਨ੍ਹਾਂ ਕਿਹਾ ਕਿ ਬੀਤੇ ਹਫ਼ਤੇ ਦੇਸ਼ 'ਚ ਔਸਤਨ 66 ਵਾਇਰਸ ਪੀੜਤਾਂ ਦੀ ਹਰ ਰੋਜ਼ ਮੌਤ ਰਿਪੋਰਟ ਹੋਈ ਹੈ।
ਉਨ੍ਹਾਂ ਦੱਸਿਆ ਕਿ ਹਸਪਤਾਲ 'ਚ ਦਾਖਿਲ ਹੋ ਰਹੇ ਮਰੀਜ਼ਾਂ ਦੀ ਗਿਣਤੀ 1,675 ਦੀ ਔਸਤ ਤੱਕ ਪਹੁੰਚ ਗਈ ਹੈ ਅਤੇ 330 ਲੋਕਾਂ ਦੇ ਆਈ.ਸੀ.ਯੂ. 'ਚ ਹੋਣ ਦੀ ਔਸਤ ਦਰਜ ਕੀਤੀ ਗਈ ਹੈ।
