ਅੰਮ੍ਰਿਤਸਰ ’ਚ ਖੁਲਵਾਇਆ ਜਾਵੇਗਾ ਅਮਰੀਕੀ ਵਣਜ ਦੂਤਘਰ : ਤਰਨਜੀਤ ਸਿੰਘ ਸੰਧੂ

ਪੰਜਾਬ ਵਿਚ ਜਲਦ ਹੀ ਅਮਰੀਕੀ ਵਣਜ ਦੂਤਾਵਾਸ ਹੋਵੇਗਾ, ਇਹ ਗੁਰੂ ਨਗਰੀ ਸ੍ਰੀ ਅੰਮ੍ਰਿਤਸਰ ਵਿਚ ਖੁੱਲ੍ਹੇਗਾ। ਇਸ ਦਾ ਖੁਲਾਸਾ ਅਮਰੀਕਾ ਵਿਚ ਭਾਰਤ ਦੇ ਰਾਜਦੂਤ ਰਹੇ ਡਾ. ਤਰਨਜੀਤ ਸਿੰਘ ਸੰਧੂ ਨੇ ਕੀਤਾ ਹੈ। ਉਹ ਅੰਮ੍ਰਿਤਸਰ ਲੋਕ ਸਭਾ ਸੀਟ ਤੋਂ ਭਾਜਪਾ ਦੇ ਸੰਭਾਵਿਤ ਉਮੀਦਵਾਰ ਮੰਨੇ ਜਾ ਰਹੇ ਹਨ।

ਡਾ. ਸੰਧੂ ਨੇ ਬੀਤੇ ਦਿਨੀਂ ਵਿਦੇਸ਼ ਮੰਤਰੀ ਐੱਸ. ਜੈਸ਼ੰਕਰ ਨਾਲ ਮੀਟਿੰਗ ਕੀਤੀ ਸੀ, ਜਿਸ ਮਗਰੋਂ ਉਨ੍ਹਾਂ ਕਿਹਾ ਕਿ ਅਮਰੀਕਾ ਨੇ ਭਾਰਤ ਵਿਚ ਦੋ ਨਵੇਂ ਵਣਜ ਦੂਤਾਵਾਸ ਖੋਲ੍ਹਣੇ ਹਨ ਅਤੇ ਵਿਦੇਸ਼ ਮੰਤਰੀ ਨੇ ਮੈਨੂੰ ਭਰੋਸਾ ਦਿਵਾਇਆ ਹੈ ਕਿ ਇੱਕ ਵਣਜ ਦੂਤਾਵਾਸ ਪਵਿੱਤਰ ਗੁਰੂ ਨਗਰੀ ਵਿਚ ਖੋਲ੍ਹਣ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ।

ਨਵੇਂ ਵਣਜ ਦੂਤਾਵਾਸ ਖੋਲ੍ਹਣ ਦਾ ਫੈਸਲਾ 7 ਸਾਲ ਪਹਿਲਾਂ 2016 ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਉਸ ਸਮੇਂ ਦੇ ਰਾਸ਼ਟਰਪਤੀ ਬਰਾਕ ਓਬਾਮਾ ਨੇ ਲਿਆ ਸੀ।