ਟਰੂਡੋ ਨੂੰ ਲੈ ਕੇ ਵੱਡੀ ਗਿਣਤੀ 'ਚ ਕੈਨੇਡੀਅਨਜ਼ ਨਾਖੁਸ਼, ਇਪਸੋਸ ਦੇ ਸਰਵੇ ਆਏ ਸਾਹਮਣੇ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਲੈ ਕੇ ਵੱਡੀ ਗਿਣਤੀ ਵਿੱਚ ਕੈਨੇਡੀਅਨਜ਼ ਨਾਖੁਸ਼ ਹਨ। ਬਹੁਗਿਣਤੀ ਕੈਨੇਡੀਅਨ ਨੇ ਦਸੰਬਰ ਵਿੱਚ ਫਿਰ ਕਿਹਾ ਹੈ ਕਿ ਜਸਟਿਨ ਟਰੂਡੋ ਨੂੰ ਪ੍ਰਧਾਨ ਮੰਤਰੀ ਅਤੇ ਲਿਬਰਲ ਪਾਰਟੀ ਦੇ ਲੀਡਰ ਵਜੋਂ ਅਸਤੀਫਾ ਦੇ ਜਾਣਾ ਚਾਹੀਦਾ ਹੈ।

ਹਾਲਾਂਕਿ ਬਹੁਤ ਸਾਰੇ ਇਹ ਵੀ ਮੰਨਦੇ ਹਨ ਕਿ ਟਰੂਡੋ ਇਨ੍ਹਾਂ ਦੋਹਾਂ ਅਹੁਦਿਆਂ ਤੋਂ ਹਟਣ ਵਾਲੇ ਨਹੀਂ ਹਨ । ਸਰਵੇ ਮੁਤਾਬਕ ਅੱਧੇ ਤੋਂ ਵੱਧ ਕੈਨੇਡੀਅਨਜ਼ ਦਾ ਮੰਨਣਾ ਹੈ ਕਿ ਚੋਣ ਅਗਲੇ ਸਾਲ ਹੀ ਹੋ ਸਕਦੇ ਹਨ। ਇਪਸੋਸ ਦੇ ਸਰਵੇ ਮੁਤਾਬਕ 69 ਫੀਸਦੀ ਕੈਨੇਡੀਅਨਜ਼ ਦਾ ਕਹਿਣਾ ਹੈ ਕਿ ਟਰੂਡੋ ਨੂੰ ਹੁਣ ਲਿਬਰਲ ਲੀਡਰ ਅਤੇ ਪ੍ਰਧਾਨ ਮੰਤਰੀ ਵਜੋਂ ਪਿੱਛੇ ਹਟ ਜਾਣਾ ਚਾਹੀਦਾ ਹੈ। ਇਸ ਤੋਂ ਪਹਿਲਾਂ 14 ਅਤੇ 17 ਨਵੰਬਰ ਦੇ ਸਰਵੇ ਵਿੱਚ ਵੀ 72 ਫੀਸਦੀ ਜਵਾਬਦਾਤਾ ਨੇ ਇਹੀ ਇੱਛਾ ਪ੍ਰਗਟਾਈ ਸੀ।

ਮਾਹਿਰਾਂ ਦਾ ਕਹਿਣਾ ਹੈ ਕਿ ਲਿਬਰਲ ਅਜੇ ਇਸ ਨੂੰ ਲੈ ਕੇ ਬਹੁਤੇ ਚਿੰਤਤ ਨਹੀਂ ਹਨ ਕਿਉਂਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਐੱਨ ਡੀ ਪੀ ਨਾਲ ਉਨ੍ਹਾਂ ਦਾ ਸਰਕਾਰ ਚਲਾਉਣ ਲਈ ਹੋਇਆ ਸਮਝੌਤਾ 2025 ਵਿੱਚ ਇਲੈਕਸ਼ਨ ਹੋਣ ਤੱਕ ਚੱਲੇਗਾ ਪਰ ਮਾਹਰਾਂ ਨੇ ਕਿਹਾ ਕਿ ਸਰਵੇ ਜੋ ਦੱਸਦੇ ਹਨ ਜੇ ਉਹੀ ਟ੍ਰੈਂਡ ਰਿਹਾ ਤਾਂ ਲਿਬਰਲਸ ਲਈ ਸੱਤਾ ਵਿੱਚ ਵਾਪਸੀ ਕਰਨਾ ਮੁਸ਼ਕਿਲ ਹੋ ਜਾਵੇਗਾ।

ਗੌਰਤਲਬ ਹੈ ਕਿ ਇਪਸੋਸ ਵੱਲੋਂ 8 ਦਸੰਬਰ ਤੋਂ 11 ਦਸੰਬਰ ਤੱਕ ਕੀਤੇ ਗਏ ਸਰਵੇ ਵਿੱਚ 1,000 ਕੈਨੇਡੀਅਨਜ਼ ਕੋਲੋਂ ਸਵਾਲ ਪੁੱਛੇ ਗਏ, ਜਿਨ੍ਹਾਂ ਵਿੱਚੋਂ 59 ਫੀਸਦੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਇਲੈਕਸ਼ਨ 2024 ਵਿੱਚ ਕਰਵਾਏ ਜਾ ਸਕਦੇ ਹਨ, ਜੇ ਅਜਿਹਾ ਹੁੰਦਾ ਹੈ ਤਾਂ ਲਿਬਰਲਸ ਨੂੰ ਕੰਜ਼ਰਵੇਟਿਵ ਤੋਂ ਵੱਡੀ ਚੁਣੌਤੀ ਹੋਵੇਗੀ।