ਵਪਾਰਕ ਲਾਂਘੇ ਨੂੰ ਮੁੜ ਖੁਲ੍ਹਵਾਉਣ ਲਈ ਕੈਨੇਡਾ ਲਵੇਗਾ ਬਹੁ-ਦੇਸ਼ੀ ਬੈਠਕ ਵਿਚ ਹਿੱਸਾ

ਕੈਨੇਡਾ ਦੀ ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਵੀਰਵਾਰ ਨੂੰ ਯੂ. ਕੇ.ਦੀ ਮੇਜ਼ਬਾਨੀ ਵਿਚ ਸਟ੍ਰੇਟ ਆਫ ਹਾਰਮੂਜ਼ ਨੂੰ ਲੈ ਕੇ ਹੋਣ ਵਾਲੀ ਇੱਕ ਬਹੁ-ਦੇਸ਼ੀ ਬੈਠਕ ਵਿਚ ਹਿੱਸਾ ਲੈਣਗੇ। ਇਸ ਮੀਟਿੰਗ ਦਾ ਮੁੱਖ ਉਦੇਸ਼ ਇਸ ਵਪਾਰਕ ਲਾਂਘੇ ਨੂੰ ਮੁੜ ਖੁਲ੍ਹਵਾਉਣ ਲਈ ਸਿਆਸੀ ਅਤੇ ਕੂਟਨੀਤਕ ਰਸਤੇ ਲੱਭਣਾ ਹੈ। ਆਨੰਦ ਨੇ ਸਪੱਸ਼ਟ ਕੀਤਾ ਹੈ ਕਿ ਜੰਗਬੰਦੀ ਹੁੰਦੇ ਹੀ ਕੈਨੇਡਾ ਇਸ ਸਮੁੰਦਰੀ ਰਸਤੇ ਨੂੰ ਸੁਰੱਖਿਅਤ ਬਣਾਉਣ ਵਿਚ ਮਦਦ ਲਈ ਪਿੱਛੇ ਨਹੀਂ ਹਟੇਗਾ।

ਹਾਲਾਂਕਿ,ਲਿਬਰਲ ਸਰਕਾਰ ਨੇ ਅਜੇ ਤੱਕ ਕਿਸੇ ਖਾਸ ਫ਼ੌਜੀ ਜਾਂ ਸੁਰੱਖਿਆ ਕਦਮ ਬਾਰੇ ਅੰਤਿਮ ਫੈਸਲਾ ਨਹੀਂ ਲਿਆ ਹੈ। ਈਰਾਨ ਜੰਗ ਕਾਰਨ ਇਸ ਰਸਤੇ ਤੋਂ ਹੋਣ ਵਾਲੀ ਤੇਲ ਅਤੇ ਗੈਸ ਸਪਲਾਈ ਪ੍ਰਭਾਵਿਤ ਹੋਈ ਹੈ, ਜਿਸ ਕਾਰਨ ਪਿਛਲੇ ਇੱਕ ਮਹੀਨੇ ਵਿਚ ਵਿਸ਼ਵ ਪੱਧਰ 'ਤੇ ਤੇਲ ਕੀਮਤਾਂ ਵਿਚ ਉਛਾਲ ਆਇਆ ਹੈ। ਮੰਤਰੀ ਅਨੰਦ ਹੁਣੇ ਹੀ ਸਾਊਦੀ ਅਰਬ ਦੇ ਦੌਰੇ ਤੋਂ ਪਰਤੇ ਹਨ।

ਭਾਵੇਂ ਉਨ੍ਹਾਂ ਦੇ ਪਹੁੰਚਣ ਤੋਂ ਇੱਕ ਰਾਤ ਪਹਿਲਾਂ ਸਾਊਦੀ ਅਰਬ 'ਤੇ ਜਵਾਬੀ ਹਮਲੇ ਹੋਏ ਸਨ, ਫਿਰ ਵੀ ਉਨ੍ਹਾਂ ਨੇ ਰਿਆਦ ਜਾਣਾ ਜ਼ਰੂਰੀ ਸਮਝਿਆ ਤਾਂ ਜੋ 300 ਕੈਨੇਡੀਅਨਜ਼ ਨੂੰ ਸੁਰੱਖਿਅਤ ਬਾਹਰ ਕੱਢਣ ਲਈ ਸਾਊਦੀ ਸਰਕਾਰ ਦਾ ਧੰਨਵਾਦ ਕੀਤਾ ਜਾ ਸਕੇ। ਗਰਤਲਬ ਹੈ ਕਿ ਇਰਾਨ ਜੰਗ ਨੂੰ ਅੱਜ 32 ਦਿਨ ਬੀਤ ਚੁੱਕੇ ਹਨ। ਇਹ ਟਕਰਾਅ ਪੂਰੇ ਮਿਡਲ ਈਸਟ ਵਿਚ ਫੈਲ ਰਿਹਾ ਹੈ ਖ਼ਾਸਕਰ ਜਦੋਂ ਇਜ਼ਰਾਈਲ ਨੇ ਲੇਬਨਾਨ ਵਿਚ ਆਪਣੀਆਂ ਜ਼ਮੀਨੀ ਫ਼ੌਜਾਂ ਭੇਜ ਦਿੱਤੀਆਂ ਹਨ।