EV ਚਾਰਜਰ ਪਲਾਨ ਨੂੰ ਲੈ ਕੇ ਆਟੋਮੇਕਰਜ਼ ਨੇ ਕੈਨੇਡਾ ਸਰਕਾਰ ਕੋਲੋਂ ਮੰਗੀ ਹੋਰ ਡਿਟੇਲ

ਕੈਨੇਡਾ ਦੇ ਦਿੱਗਜ ਆਟੋ ਨਿਰਮਾਤਾਵਾਂ ਨੇ ਫੈਡਰਲ ਸਰਕਾਰ ਨੂੰ ਚਾਰਜਿੰਗ ਸਟੇਸ਼ਨਾਂ ਦੀ ਵਿਸਥਾਰ ਯੋਜਨਾ ਨੂੰ ਚੰਗੀ ਤਰ੍ਹਾਂ ਸਪੱਸ਼ਟ ਕਰਨ ਦੀ ਮੰਗ ਕੀਤੀ ਹੈ। ਕਾਰ ਨਿਰਮਾਤਾਵਾਂ ਦਾ ਕਹਿਣਾ ਹੈ ਕਿ ਇਲੈਕਟ੍ਰਿਕ ਵ੍ਹੀਕਲਜ਼ ਚਾਰਜਿੰਗ ਸਟੇਸ਼ਨਾਂ ਨੂੰ ਲੈ ਕੇ ਫੈਡਰਲ ਸਰਕਾਰ ਨੂੰ ਜ਼ਿਆਦਾ ਉਤਸ਼ਾਹੀ ਤੇ ਤਾਲਮੇਲ ਪਹੁੰਚ ਬਣਾਉਣ ਦੀ ਲੋੜ ਹੈ, ਨਹੀਂ ਤਾਂ ਇਸ ਦਹਾਕੇ ਦੇ ਅੰਤ ਤੱਕ ਟੀਚਾ ਪੂਰਾ ਨਹੀਂ ਹੋਵੇਗਾ, ਜਿਵੇਂ ਕਿ ਸਰਕਾਰ ਬੈਟਰੀ ਪਾਵਰਡ ਕਾਰਾਂ ਨੂੰ ਹੱਲਾਸ਼ੇਰੀ ਦੇਣਾ ਚਾਹੁੰਦੀ ਹੈ।

ਫੋਰਡ, ਜਨਰਲ ਮੋਟਰਜ਼ ਅਤੇ ਸਟੈਲੈਂਟਿਸ ਦੀ ਨੁਮਾਇੰਦਗੀ ਕਰਨ ਵਾਲੀ ਕੈਨੇਡੀਅਨ ਵ੍ਹੀਕਲ ਮੈਨੂਫੈਕਚਰਰਜ਼ ਐਸੋਸੀਏਸ਼ਨ ਨੇ ਓਟਾਵਾ ਨੂੰ ਸਿਫ਼ਾਰਸ਼ਾਂ ਦੀ ਇੱਕ ਸੂਚੀ ਭੇਜੀ ਹੈ। ਇਸ ਵਿਚ ਚਤਾਇਆ ਗਿਆ ਹੈ ਕਿ ਜੇ ਚਾਰਜਿੰਗ ਸਟੇਸ਼ਨਾਂ ਦੇ ਨੈੱਟਵਰਕ ਦੀ ਉਪਲਬਧਤਾ ਨੂੰ ਲੈ ਕੇ ਕੈਨੇਡੀਅਨਾਂ ਵਿਚ ਭਰੋਸਾ ਹੀ ਨਹੀਂ ਹੋਵੇਗਾ ਤਾਂ ਇਲੈਕਟ੍ਰਿਕ ਵ੍ਹੀਕਲਜ਼ (ਈ. ਵੀ.) ਨੂੰ ਅਪਣਾਉਣ ਦਾ ਮਕਸਦ ਪੂਰਾ ਨਹੀਂ ਹੋਣ ਵਾਲਾ।

ਮੌਜੂਦਾ ਸਮੇਂ ਕੈਨੇਡਾ ਭਰ ਵਿਚ 6,800 ਸਥਾਨਾਂ 'ਤੇ ਲਗਭਗ 16,000 ਚਾਰਜਿੰਗ ਪੋਰਟਸ ਹਨ। ਇਨ੍ਹਾਂ ਵਿੱਚੋਂ 90 ਫੀਸਦੀ ਕਿਊਬਿਕ, ਓਂਟਾਰੀਓ ਅਤੇ ਬ੍ਰਿਟਿਸ਼ ਕੋਲੰਬੀਆ ਵਿਚ ਹਨ। ਪਿਛਲੀਆਂ ਚੋਣਾਂ ਵਿਚ ਫੈਡਰਲ ਲਿਬਰਲਜ਼ ਨੇ 2026 ਦੇ ਅੰਤ ਤੱਕ 50,000 ਹੋਰ ਚਾਰਜਰ ਸਥਾਪਿਤ ਕਰਨ ਦਾ ਵਾਅਦਾ ਕੀਤਾ ਸੀ ਪਰ ਉਨ੍ਹਾਂ ਸਟੇਸ਼ਨਾਂ ਦੀ ਸਭ ਤੋਂ ਵੱਧ ਲੋੜ ਕਿੱਥੇ ਹੈ, ਇਸ ਬਾਰੇ ਡਿਟੇਲ ਯੋਜਨਾ ਨਹੀਂ ਦਿੱਤੀ ਗਈ ਹੈ।