17.39C Vancouver 17.39C VancouverMar 13, 2025 6:15 PM - Connect Newsroom
ਬ੍ਰਿਟਿਸ਼ ਕੋਲੰਬੀਆ ਵਿਚ ਗਰਭਵਤੀ ਔਰਤਾਂ ਅਤੇ ਨਵੀਆਂ ਬਣੀਆਂ ਮਾਵਾਂ ਦੀ ਮਾਨਸਿਕ ਸਿਹਤ ਸੰਭਾਲ ਤੱਕ ਯੂਨੀਵਰਸਲ ਪਹੁੰਚ ਲਈ ਇੱਕ ਪ੍ਰਾਈਵੇਟ ਮੈਂਬਰ ਬਿੱਲ ਨੂੰ ਸਰਬਸੰਮਤੀ ਨਾਲ ਸੂਬੇ ਦੀ ਵਿਧਾਨ ਸਭਾ ਵਿਚ ਮਨਜ਼ੂਰੀ ਦਿੱਤੀ ਗਈ ਹੈ। ਇਹ 43 ਸਾਲਾਂ ਵਿਚ ਬੀ.ਸੀ. ਵਿਧਾਨ ਸਭਾ ਵਿਚ ਦੂਜੀ ਰੀਡਿੰਗ ਪਾਸ ਕਰਨ ਵਾਲਾ ਪਹਿਲਾ ਪ੍ਰਾਈਵੇਟ ਮੈਂਬਰ ਬਿੱਲ ਹੈ।
ਬੀ.ਸੀ. ਦੀ ਵਿਰੋਧੀ ਧਿਰ ਕੰਜ਼ਰਵੇਟਿਵ ਪਾਰਟੀ ਦੀ ਲੈਂਗਲੇ-ਵਿਲੋਬਰੁਕ ਤੋਂ ਵਿਧਾਇਕ ਜੋਡੀ ਤੂਰ ਨੇ ਸੋਮਵਾਰ ਨੂੰ ਇਹ ਬਿੱਲ ਪੇਸ਼ ਕੀਤਾ ਸੀ। ਤੂਰ ਨੇ ਕਿਹਾ ਕਿ ਬੀ.ਸੀ. ਵਿਚ ਪੰਜ ਵਿਚੋਂ ਇੱਕ ਔਰਤ ਨੂੰ ਬੱਚੇ ਦੇ ਜਨਮ ਤੋਂ ਪਹਿਲਾਂ ਜਾਂ ਜਨਮ ਤੋਂ ਬਾਅਦ ਮਾਨਸਿਕ ਸੰਘਰਸ਼ ਦਾ ਸਾਹਮਣਾ ਕਰਨਾ ਪੈਂਦਾ ਹੈ, ਜਿਵੇਂ ਕਿ ਚਿੰਤਾ, ਜਨਮ ਦਾ ਸਦਮਾ ਅਤੇ ਹੋਰ ਪਰ ਫਿਰ ਵੀ ਉਨ੍ਹਾਂ ਨੂੰ ਉਹ ਡਾਕਟਰੀ ਦੇਖਭਾਲ ਨਹੀਂ ਮਿਲਦੀ, ਜਿਸ ਦੀ ਉਨ੍ਹਾਂ ਨੂੰ ਜ਼ਰੂਰਤ ਹੈ। ਇਸ ਲਈ ਇਹ ਬਿੱਲ ਇਸ ਕਮੀ ਨੂੰ ਦੂਰ ਕਰੇਗਾ।
ਗੌਰਤਲਬ ਹੈ ਕਿ ਇਹ ਬਿੱਲ ਹੁਣ ਵਿਧਾਨ ਸਭਾ ਕਮੇਟੀ ਕੋਲ ਰਿਵਿਊ ਲਈ ਜਾਵੇਗਾ, ਫਿਰ ਇਸ ਨੂੰ ਤੀਜੀ ਰੀਡਿੰਗ ਵਿਚ ਪਾਸ ਹੋਣਾ ਪਵੇਗਾ ਅਤੇ ਲਾਗੂ ਹੋਣ ਤੋਂ ਪਹਿਲਾਂ ਸ਼ਾਹੀ ਮਨਜ਼ੂਰੀ ਪ੍ਰਾਪਤ ਕਰਨੀ ਪਵੇਗੀ।
