ਬੀ. ਸੀ. ਵਿਚ ਇਨਵਾਇਰਮੈਂਟ ਕੈਨੇਡਾ ਵਲੋਂ ਕਈ ਜਗ੍ਹਾ ਬਾਰਿਸ਼ ਦੀ ਜਾਰੀ ਕੀਤੀ ਗਈ ਚਿਤਾਵਨੀ

ਬੀ. ਸੀ. ਵਿਚ ਇਨਵਾਇਰਮੈਂਟ ਕੈਨੇਡਾ ਵਲੋਂ ਕਈ ਜਗ੍ਹਾ ਬਾਰਿਸ਼ ਦੀ ਚਿਤਾਵਨੀ ਦਿੱਤੀ ਗਈ ਹੈ, ਜਿਸ ਵਿਚ ਮੈਟਰੋ ਵੈਨਕੂਵਰ, ਫਰੇਜ਼ਰ ਵੈਲੀ ,ਹੋਵੇ ਸਾਊਂਡ ਅਤੇ ਕੋਸਟ ਇਲਾਕੇ ਸ਼ਾਮਲ ਹਨ। ਮੌਸਮ ਏਜੰਸੀ ਮੁਤਾਬਕ, ਕੁਝ ਉੱਚੇ ਇਲਾਕਿਆਂ ਵਿਚ 80 ਮਿਲੀ ਲੀਟਰ ਤੱਕ ਬਾਰਸ਼ ਹੋਣ ਦੀ ਉਮੀਦ ਹੈ।

ਇਸ ਦੇ ਮੱਦੇਨਜ਼ਰ ਬੀ.ਸੀ. ਸਰਕਾਰ ਨੇ ਨੀਵੇਂ ਇਲਾਕਿਆਂ ਵਿਚ ਹੜ੍ਹ ਆਉਣ ਦਾ ਖ਼ਦਸ਼ਾ ਜਤਾਇਆ ਹੈ, ਸੁਮਾਸ ਅਤੇ ਚਿਲੀਵੈਕ ਰਿਵਰ ਪਹਿਲਾਂ ਹੀ ਫਲੱਡ ਵਾਰਨਿੰਗ ਵਿਚ ਹਨ। ਐਬਟਸਫੋਰਡ ਇਸ ਨਾਲ ਪਹਿਲਾਂ ਹੀ ਪ੍ਰਭਾਵਿਤ ਹੈ।

ਸਿਟੀ ਦੇ ਮੇਅਰ ਅਤੇ ਫਾਇਰ ਚੀਫ਼ ਦਾ ਕਹਿਣਾ ਹੈ ਸੁਮਾਸ ਪ੍ਰੇਰੀ ਦੇ ਆਸਪਾਸ ਕਈ ਪ੍ਰੋਪਰਟੀਜ਼ ਅਜੇ ਵੀ ਅਲਰਟ 'ਤੇ ਹਨ। ਸੂਬਾ ਸਰਕਾਰ ਦਾ ਕਹਿਣਾ ਹੈ ਕਿ ਤਾਜ਼ਾ ਬਾਰਿਸ਼ ਨਾਲ ਹੜ੍ਹ ਦੀ ਸਥਿਤੀ ਬਾਰੇ ਅਜੇ ਅੰਦਾਜ਼ਾ ਲਗਾਉਣਾ ਮੁਸ਼ਕਲ ਹੈ ਪਰ ਲੋੜ ਪੈਣ 'ਤੇ ਕੁਝ ਹਾਈਵੇਜ਼ ਨੂੰ ਥੋੜ੍ਹੇ ਸਮੇਂ ਦੇ ਨੋਟਿਸ 'ਤੇ ਬੰਦ ਕਰਨਾ ਪੈ ਸਕਦਾ ਹੈ, ਜਿਸ ਵਿਚ ਹਾਈਵੇਅ 5,ਕੋਕੀਹਾਲਾ, ਫਰੇਜ਼ਰ ਕੈਨਿਯਨ ਤੋਂ ਹੋ ਕੇ ਜਾਣ ਵਾਲਾ ਹਾਈਵੇਅ 1 ਅਤੇ ਕੈਸ਼ੇ ਕ੍ਰੀਕ ਤੋਂ ਪੇਮਬਰਟਨ ਤੱਕ ਦਾ ਹਾਈਵੇਅ 99 ਸ਼ਾਮਲ ਹਨ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਵੈਨਕੂਵਰ ਆਈਲੈਂਡ 'ਤੇ ਵੀ ਭਾਰੀ ਬਾਰਸ਼ ਹੋਣ ਦੀ ਸੰਭਾਵਨਾ ਹੈ।