ਬੀ.ਸੀ. ’ਚ ਟੀਕਾਕਰਨ ਦੇ ਟੁੱਟੇ ਰਿਕਾਰਡ, 82,000 ਲੋਕਾਂ ਨੇ ਲਗਵਾਏ ਕੋਵਿਡ-19 ਅਤੇ ਫਲੂ ਦੇ ਟੀਕੇ

ਬ੍ਰਿਟਿਸ਼ ਕੋਲੰਬੀਆ ਵਿਚ ਸਾਹ ਦੀ ਬਿਮਾਰੀ ਦੇ ਮੱਦੇਨਜ਼ਰ ਫਲੂ ਅਤੇ ਕੋਵਿਡ-19 ਦੀਆਂ ਨਵੀਆਂ ਵੈਕਸੀਨ ਸੂਬੇ ਵਿਚ ਸਾਰਿਆਂ ਲਈ ਉਪਲਬਧ ਹੋ ਗਈਆਂ ਹਨ। ਇਸ ਦੀ ਜਾਣਕਾਰੀ ਅੱਜ ਸਿਹਤ ਅਧਿਕਾਰੀ ਡਾ. ਬੋਨੀ ਹੈਨਰੀ ਨੇ ਦਿੱਤੀ। ਉਨ੍ਹਾਂ ਸਾਰੇ ਲੋਕਾਂ ਨੂੰ ਨਵੀਨਤਮ ਵੈਕਸੀਨ ਲੈਣ ਦੀ ਅਪੀਲ ਕੀਤੀ ਹੈ, ਤਾਂ ਜੋ ਖੁਦ ਨੂੰ ਅਤੇ ਆਪਣੇ ਪਰਿਵਾਰ ਦੇ ਲੋਕਾਂ ਨੂੰ ਗੰਭੀਰ ਬਿਮਾਰੀਆਂ ਤੋਂ ਸੁਰੱਖਿਅਤ ਕੀਤਾ ਜਾ ਸਕੇ।

ਡਾ. ਬੋਨੀ ਹੈਨਰੀ ਨੇ ਕਿਹਾ ਕਿ ਪਤਝੜ ਸੀਜ਼ਨ ਅਜਿਹਾ ਸਮਾਂ ਹੁੰਦਾ ਹੈ ਜਦੋਂ ਸੂਬੇ ਵਿਚ ਫਲੂ ਅਤੇ ਕੋਵਿਡ-19 ਸਮੇਤ ਹੋਰ ਵਾਇਰਲ ਇਨਫੈਕਸ਼ਨ ਵਿਚ ਵਾਧਾ ਦੇਖਿਆ ਜਾਂਦਾ ਹੈ। ਅਧਿਕਾਰੀਆਂ ਨੂੰ ਉਮੀਦ ਹੈ ਕਿ ਨਵੰਬਰ ਦੇ ਪਹਿਲੇ ਹਫ਼ਤੇ ਤੱਕ ਸੂਬੇ ਦੇ ਸਾਰੇ ਲੋਕਾਂ ਨੂੰ ਟੀਕਾਕਰਨ ਦਾ ਸੱਦਾ ਮਿਲ ਜਾਵੇਗਾ।

ਉਥੇ ਹੀ, ਸਿਹਤ ਅਧਿਕਾਰੀ ਨੇ ਇੱਕ ਰਿਲੀਜ਼ ਵਿਚ ਕਿਹਾ ਕਿ ਜਿਨ੍ਹਾਂ ਲੋਕਾਂ ਲਈ ਵੈਕਸੀਨ ਪਹਿਲਾਂ ਲੈਣੀ ਜ਼ਰੂਰੀ ਸੀ ਉਨ੍ਹਾਂ ਲਈ 8 ਅਕਤੂਬਰ ਨੂੰ ਇਸ ਦੀ ਪਹਿਲ ਹੋ ਗਈ ਸੀ ਅਤੇ 15 ਅਕਤੂਬਰ ਨੂੰ ਡਿਲੀਵਰੀ ਦੇ ਪਹਿਲੇ ਹੀ ਦਿਨ ਬੀ. ਸੀ. ਫਾਰਮੇਸੀਆਂ ਨੇ 82,000 ਟੀਕੇ ਲਗਾਏ।