ਬੀ.ਸੀ. ਕੋਰੋਨਰ ਦੇ ਪੈਨਲ ਨੇ ਨੌਜਵਾਨਾਂ ਵਿਚ ਸੁਸਾਈਡ ਦੇ ਰਿਸਕ ਨੂੰ ਘਟਾਉਣ ਲਈ ਪੰਜ ਸਿਫ਼ਾਰਸ਼ਾਂ ਕੀਤੀਆਂ ਜਾਰੀ

ਬੀ.ਸੀ. ਕੋਰੋਨਰ ਦੇ ਪੈਨਲ ਨੇ ਨੌਜਵਾਨਾਂ ਵਿਚ ਸੁਸਾਈਡ ਦੇ ਰਿਸਕ ਨੂੰ ਘਟਾਉਣ ਲਈ ਪੰਜ ਸਿਫ਼ਾਰਸ਼ਾਂ ਜਾਰੀ ਕੀਤੀਆਂ ਹਨ, ਜਿਸ ਵਿਚ ਯੂਥ 'ਤੇ ਵਿਸ਼ੇਸ਼ ਤੌਰ 'ਤੇ ਕੇਂਦ੍ਰਿਤ ਇੱਕ ਪ੍ਰੋਵਿੰਸ਼ੀਅਲ ਸੁਸਾਈਡ ਰਿਸਕ ਰਿਡਕਸ਼ਨ ਫਰੇਮਵਰਕ ਬਣਾਉਣ ਦੀ ਸਿਫਾਰਸ਼ ਵੀ ਸ਼ਾਮਲ ਹੈ।

ਚੀਫ ਕੋਰੋਨਰ ਡਾ. ਜਤਿੰਦਰ ਬੈਦਵਾਨ ਨੇ 1 ਜਨਵਰੀ, 2019 ਤੋਂ 31 ਦਸੰਬਰ 2023 ਵਿਚਕਾਰ ਖੁਦਕੁਸ਼ੀ ਨਾਲ ਮਰਨ ਵਾਲੇ 9 ਤੋਂ 25 ਸਾਲ ਦੀ ਉਮਰ ਦੇ 435 ਲੋਕਾਂ ਦੀਆਂ ਮੌਤਾਂ ਦੀ ਸਟੱਡੀ ਲਈ ਮਾਰਚ ਵਿਚ ਮਾਹਰਾਂ ਦੇ ਪੈਨਲ ਦਾ ਗਠਨ ਕੀਤਾ ਸੀ। ਜਿਸ ਦੀ ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਖੁਦਕੁਸ਼ੀ ਬੀ. ਸੀ. ਵਿਚ ਬੱਚਿਆਂ ਤੇ ਨੌਜਵਾਨਾਂ ਵਿਚ ਮੌਤ ਦਾ ਦੂਜਾ ਸਭ ਤੋਂ ਵੱਡਾ ਕਾਰਨ ਹੈ ਅਤੇ 19 ਤੋਂ 29 ਸਾਲ ਦੀ ਉਮਰ ਦੇ ਲੋਕਾਂ ਵਿਚ ਤੀਜਾ ਸਭ ਤੋਂ ਆਮ ਕਾਰਨ ਹੈ।

ਰਿਪੋਰਟ ਵਿਚ ਇਸ ਗੱਲ 'ਤੇ ਜ਼ੋਰ ਦਿੱਤਾ ਗਿਆ ਹੈ ਕਿ ਫਸਟ ਨੇਸ਼ਨਜ਼ ਦੇ ਨੌਜਵਾਨਾਂ ਵਿਚ ਸੁਸਈਡ ਦੀ ਦਰ ਸੂਬਾਈ ਦਰ ਨਾਲੋਂ ਚਾਰ ਗੁਣਾ ਹੈ। ਇਹ ਅਸਮਾਨਤਾ ਬਸਤੀਵਾਦ ਅਤੇ ਰਿਹਾਇਸ਼ੀ ਸਕੂਲ ਸਿਸਟਮ ਤੋਂ ਪੈਦਾ ਹੋਏ ਕਈ ਪੀੜ੍ਹੀਆਂ ਦੇ ਸਦਮੇ ਨਾਲ ਜੁੜੀ ਹੋਈ ਹੈ।

ਰਿਪੋਰਟ ਵਿਚ ਪਿੰਡਾਂ ਤੇ ਦੂਰਦਰਾਜ ਖੇਤਰਾਂ ਦੇ ਬੱਚਿਆਂ ਲਈ ਸਿਹਤ ਸਹੂਲਤਾਂ ਦੀ ਘਾਟ 'ਤੇ ਵੀ ਚਿੰਤਾ ਜਤਾਈ ਗਈ ਹੈ। ਚੀਫ ਕੋਰੋਨਰ ਦਫ਼ਤਰ ਦਾ ਕਹਿਣਾ ਹੈ ਕਿ ਉਹ ਸਿਫਾਰਸ਼ਾਂ ਮਾਨਸਿਕ ਸਿਹਤ ਅਤੇ ਨਸ਼ਾਖੋਰੀ ਮੰਤਰਾਲੇ ਨਾਲ ਸਾਂਝਾ ਕਰੇਗਾ ਤਾਂ ਜੋ ਅੱਗੇ ਦੀ ਕਾਰਵਾਈ ਕੀਤੀ ਜਾ ਸਕੇ।