9.33C Vancouver 9.33C VancouverAug 16, 2022 7:11 PM - The Canadian Press
ਬੀ.ਸੀ. 'ਚ ਸਾਲ 2016 ਤੋਂ ਓਵਰਡੋਜ਼ ਸੰਬੰਧੀ ਐਲਾਨੀ ਗਈ ਪਬਲਿਕ ਹੈਲਥ ਐਮਰਜੈਂਸੀ ਤੋਂ ਬਾਅਦ 10,000 ਲੋਕ ਇਸ ਓਵਰਡੋਜ਼ ਸੰਬੰਧੀ ਕਾਰਨਾਂ ਦੇ ਚਲਦਿਆਂ ਜਾਨ ਗਵਾ ਚੁੱਕੇ ਹਨ।
ਬੀ.ਸੀ. 'ਚ ਜੂਨ ਮਹੀਨੇ ਤਕ ਦੇ ਓਵਰਡੋਜ਼ ਸੰਬੰਧੀ ਮੌਤਾਂ ਦੇ ਅੰਕੜੇ ਸਾਂਝੇ ਕੀਤੇ ਗਏ ਹਨ।
ਬੀ.ਸੀ. ਕੋਰੋਨਰ ਆਫਿਸ ਨੇ ਜਾਣਕਾਰੀ ਦਿੱਤੀ ਹੈ ਕਿ ਸਾਲ 2022 ਦੇ ਪਹਿਲੇ 6 ਮਹੀਨਿਆਂ ਵਿਚਾਲੇ 1,095 ਲੋਕ ਓਵਰਡੋਜ਼ ਕਾਰਨ ਜਾਨ ਗਵਾ ਚੁੱਕੇ ਹਨ।
ਇਸ 'ਚ ਮਈ 'ਚ 197 ਅਤੇ ਜੂਨ 'ਚ 146 ਮੌਤਾਂ ਦਰਜ ਕੀਤੀਆਂ ਗਈਆਂ ਹਨ।
ਜੂਨ ਦੇ ਮਹੀਨੇ 'ਚ ਦਰਜ ਕੀਤੀਆਂ ਗਈਆਂ ਮੌਤਾਂ ਬੀਤੇ ਸਾਲ ਦੇ ਜੂਨ ਮਹੀਨੇ ਦੀਆਂ 175 ਓਵਰਡੋਜ਼ ਸੰਬੰਧੀ ਮੌਤਾਂ ਮੁਕਾਬਲੇ 17% ਦਾ ਘਾਟਾ ਦਰਸ਼ਾਉਂਦੀਆਂ ਹਨ ਜਦਕਿ ਇਸੇ ਸਾਲ ਮਈ ਮਹੀਨੇ ਦੇ 197 ਮੌਤਾਂ ਦੇ ਅੰਕੜੇ ਮੁਕਾਬਲੇ 26% ਦਾ ਘਾਟਾ ਦਰਸ਼ਾਉਂਦੀਆਂ ਹਨ।
ਔਸਤ ਅਨੁਸਾਰ ਇਸ ਸਾਲ ਹਰ ਰੋਜ ਕਰੀਬ 6 ਲੋਕ ਓਵਰਡੋਜ਼ ਕਾਰਨ ਜਾਨ ਗਵਾ ਚੁੱਕੇ ਹਨ।
ਔਸਤ ਅਨੁਸਾਰ ਇਸ ਸਾਲ ਹਰ ਮਹੀਨੇ ਬੀ.ਸੀ. 'ਚ ਓਵਰਡੋਜ਼ ਸੰਬੰਧੀ 180 ਤੋਂ ਵੱਧ ਮੌਤਾਂ ਦਰਜ ਕੀਤੀਆਂ ਗਈਆਂ ਹਨ।
ਇਸ ਸਾਲ ਹੁਣ ਤਕ ਜਾਨ ਗਵਾਉਣ ਵਾਲਿਆਂ 'ਚ 73% ਗਿਣਤੀ 30 ਤੋਂ 59 ਸਾਲ ਵਿਚਾਲੇ ਦੇ ਲੋਕਾਂ ਦੀ ਦੱਸੀ ਗਈ ਹੈ।
ਇਸ 'ਚ 78% ਲੋਕ ਪੁਰੁਸ਼ ਸਨ।
ਇਸ ਸਾਲ ਹੁਣ ਤਕ ਫਰੇਜ਼ਰ ਹੈਲਥ ਅਤੇ ਵੈਨਕੂਵਰ ਕੋਸਟਲ ਹੈਲਥ ਅਥਾਰਿਟੀਸ 'ਚ ਸਭ ਤੋਂ ਵੱਧ ਓਵਰਡੋਜ਼ ਸੰਬੰਧੀ ਮੌਤਾਂ ਦਰਜ ਕੀਤੀਆਂ ਗਈਆਂ ਹਨ।
ਫਰੇਜ਼ਰ ਹੈਲਥ 'ਚ ਇਸ ਸਾਲ ਹੁਣ ਤਕ 352 ਅਤੇ ਵੈਨਕੂਵਰ ਕੋਸਟਲ ਹੈਲਥ 'ਚ 297 ਓਵਰਡੋਜ਼ ਸੰਬੰਧੀ ਮੌਤਾਂ ਦਰਜ ਹੋ ਚੁੱਕੀਆਂ ਹਨ।
ਬੀ.ਸੀ. ਦੀ ਚੀਫ਼ ਕੋਰੋਨਰ ਲੀਜ਼ਾ ਲਾਪੌਇਂਟ ਨੇ ਕਿਹਾ ਕਿ ਜਦ ਤਕ ਬੀ.ਸੀ. 'ਚ ਡਰੱਗਸ ਦੀ ਸਪਲਾਈ ਸੰਗਠਿਤ ਅਪਰਾਧਿਕ ਗਰੁੱਪਸ ਦੇ ਹੱਥ 'ਚ ਰਵੇਗੀ, ਉਸ ਵੇਲੇ ਤਕ ਇਹ ਮੌਤਾਂ ਦੇ ਅੰਕੜੇ ਕਾਬੂ ਹੇਠ ਨਹੀਂ ਆਉਣਗੇ ਕਿਉਂਕਿ ਉਨ੍ਹਾਂ ਦਾ ਟੀਚਾ ਲੋਕਾਂ ਦੀ ਸਿਹਤ ਨਹੀਂ ਬਲਕਿ ਮੁਨਾਫੇ ਹਨ।
