16.81C Vancouver 16.81C VancouverJan 12, 2021 10:32 PM -
ਵੈਨਕੂਵਰ ਆਈਲੈਂਡ 'ਤੇ ਇੱਕ ਫਰਸਟ ਨੇਸ਼ਨਸ ਕਮਿਊਨਿਟੀ ਦਾ ਕੋਵਿਡ-19 ਆਊਟਬ੍ਰੇਕ 'ਤੇ ਕਾਬੂ ਪਾਉਣਾ ਮੁਸ਼ਕਿਲ ਹੋ ਰਿਹਾ ਹੈ।
ਇਸੇ ਦੌਰਾਨ ਕਮਿਊਨਿਟੀ ਦੇ ਕੁਝ ਮੈਂਬਰਾਂ ਨੇ ਅਸਹਿਣਸ਼ੀਲਤਾ ਵੀ ਦਰਸ਼ਾਈ ਹੈ।
ਕੋਵਿਚਾਨ ਟ੍ਰਾਈਬਸ ਜਨਰਲ ਮੈਨੇਜਰ, ਡੈਰੇਕ ਥਾਂਪਸਨ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਡੰਕਨ ਇਲਾਕੇ ਦੇ ਫਰਸਟ ਨੇਸ਼ਨ ਦੇ ਕੁਝ ਮੈਂਬਰਾਂ ਨੇ ਇਹਨਾਂ ਮਾਮਲਿਆਂ ਦੇ ਉਜਾਗਰ ਹੋਣ ਤੋਂ ਬਾਅਦ, ਭੇਦਭਾਵ ਦਾ ਵੀ ਸਾਹਮਣਾ ਕੀਤਾ ਹੈ।
ਉਨ੍ਹਾਂ ਦੱਸਿਆ ਕਿ ਪੈਂਡੇਮਿਕ ਦੀ ਸ਼ੁਰੂਆਤ ਤੋਂ ਉਨ੍ਹਾਂ ਦੇ ਭਾਈਚਾਰੇ 'ਚ ਵਾਇਰਸ ਸੰਬੰਧੀ ਕੋਈ ਮਾਮਲੇ ਰਿਪੋਰਟ ਨਹੀਂ ਹੋਏ ਸਨ।
ਪਰ 1 ਜਨਵਰੀ ਤੋਂ ਇਸ ਸੰਬੰਧੀ 73 ਮਾਮਲੇ ਰਿਪੋਰਟ ਹੋ ਚੁੱਕੇ ਹਨ।
ਫਰਸਟ ਨੇਸ਼ਨ ਨੇ 22 ਜਨਵਰੀ ਤੱਕ ਆਪਣੇ ਮੈਂਬਰਾਂ ਲਈ 'ਸਟੇਅ ਐਟ ਹੋਮ' ਨਿਰਦੇਸ਼ ਜਾਰੀ ਕੀਤੇ ਹਨ।
ਡੰਕਨ ਇਲਾਕੇ ਦੇ ਸਿਆਸਤਦਾਨ, ਜਿਸ 'ਚ ਗ੍ਰੀਨ ਪਾਰਟੀ ਲੀਡਰ ਸੋਨੀਆ ਫਰਸਟੇਨਾਊ ਅਤੇ ਨੌਰਥ ਕੋਵਿਚਾਨ ਮੇਅਰ, ਐਲ ਸੇਬਰਿੰਗ ਨੇ ਕੋਵਿਚਾਨ ਟ੍ਰਾਈਬਸ ਦੇ ਲੋਕਾਂ ਪ੍ਰਤੀ ਕੁਝ ਲੋਕਾਂ ਦੇ ਨਸਲਵਾਦੀ ਰਵਈਏ ਨੂੰ ਨਿਰਾਸ਼ਾਜਨਕ ਦੱਸਿਆ ਹੈ।
