11.91C Vancouver 11.91C VancouverAug 10, 2026 4:59 PM - Connect Newsroom - Ramandeep Kaur with files from The Canadian Press
ਬੀ.ਸੀ. ਦੇ ਕਈ ਫਸਟ ਨੇਸ਼ਨ ਆਗੂਆਂ ਨੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੂੰ ਵੈਸਟ ਕੋਸਟ ਪਾਈਪਲਾਈਨ ਪ੍ਰੋਜੈਕਟ ਨੂੰ ਅੱਗੇ ਵਧਾਉਣ ਦੀਆਂ ਕੋਸ਼ਿਸ਼ਾਂ ਨੂੰ ਤੁਰੰਤ ਰੋਕਣ ਦੀ ਮੰਗ ਕੀਤੀ ਹੈ। ਯੂਨੀਅਨ ਔਫ ਬ੍ਰਿਟਿਸ਼ ਕੋਲੰਬੀਆ ਇੰਡੀਅਨ ਚੀਫ਼ਸ ਨੇ ਪਾਈਪਲਾਈਨ ਦਾ ਵਿਰੋਧ ਕਰਦਿਆਂ ਕਾਰਨੀ ਅਤੇ ਸਮਿਥ ਨੂੰ ਲਿਖੇ ਇੱਕ ਪੱਤਰ ਵਿਚ ਕਿਹਾ ਕਿ ਤੇਲ ਉਦਯੋਗ ਦਾ ਇਹ ਵਿਸਥਾਰ ਜਲਵਾਯੂ ਪਰਿਵਰਤਨ ਅਤੇ ਕੁਦਰਤੀ ਆਫ਼ਤਾਂ ਨੂੰ ਹੋਰ ਵਧਾ ਸਕਦਾ ਹੈ।
ਫਸਟ ਨੇਸ਼ਨ ਆਗੂਆਂ ਦਾ ਦੋਸ਼ ਹੈ ਕਿ ਸਰਕਾਰ ਨੇ ਉਨ੍ਹਾਂ ਨਾਲ ਨੇਕ ਨੀਅਤੀ ਨਾਲ ਕੋਈ ਸਲਾਹ-ਮਸ਼ਵਰਾ ਨਹੀਂ ਕੀਤਾ ਬਲਕਿ ਪ੍ਰੋਜੈਕਟ ਦਾ ਲਾਂਘਾ ਅਤੇ ਸੰਭਾਵੀ ਨਿਵੇਸ਼ਕ ਪਹਿਲਾਂ ਤੋਂ ਹੀ ਖ਼ੁਦ ਤੈਅ ਕਰ ਲਏ ਗਏ ਹਨ। ਫਸਟ ਨੇਸ਼ਨ ਮੁਖੀ ਫੈਡਰਲ ਸਰਕਾਰ ਦੇ ਉਸ ਕਦਮ ਤੋਂ ਵੀ ਨਾਰਾਜ਼ ਹਨ ਜਿਸ ਤਹਿਤ ਬਿਲਡਿੰਗ ਕੈਨੇਡਾ ਐਕਟ ਰਾਹੀਂ ਇਸ ਪ੍ਰੋਜੈਕਟ ਨੂੰ ਰਾਸ਼ਟਰੀ ਹਿੱਤ ਦਾ ਦਰਜਾ ਦੇ ਕੇ ਵਾਤਾਵਰਣ ਕਾਨੂੰਨਾਂ ਨੂੰ ਬਾਈਪਾਸ ਕਰਨ ਅਤੇ ਕੰਮ ਨੂੰ ਤੇਜ਼ੀ ਨਾਲ ਨੇਪਰੇ ਚਾੜ੍ਹਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
ਫਿਲਹਾਲ, ਸਰਕਾਰ ਨੇ ਐਲਬਰਟਾ ਤੋਂ ਡੈਲਟਾ ਨੇੜੇ ਪੋਰਟ ਤੱਕ ਇਸ ਪ੍ਰਸਤਾਵਿਤ 1,250 ਕਿਲੋਮੀਟਰ ਲੰਮੀ ਤੇਲ ਪਾਈਪਲਾਈਨ 'ਤੇ ਜਨਤਾ ਤੋਂ ਸਤੰਬਰ ਦੇ ਅੱਧ ਤੱਕ ਫੀਡਬੈਕ ਮੰਗੀ ਹੈ।
