ਬੀ.ਸੀ. ਦੇ ਵੱਧਦੇ ਬਜਟ ਘਾਟੇ ਨੂੰ ਲੈ ਕੇ ਸਰਕਾਰ ਦੀ ਹੋ ਰਹੀ ਆਲੋਚਨਾ

ਪ੍ਰੀਮੀਅਰ ਡੇਵਿਡ ਈਬੀ ਦੀ ਸਰਕਾਰ ਇਸ ਸਾਲ ਦਾ ਰਿਕਾਰਡ ਬਜਟ ਘਾਟਾ $429 ਮਿਲੀਅਨ ਹੋਰ ਵਧਣ ਨੂੰ ਲੈ ਕੇ ਮੁੱਖ ਵਿਰੋਧੀ ਧਿਰ ਦੇ ਨਿਸ਼ਾਨੇ ’ਤੇ ਆ ਗਈ ਹੈ।

ਬੀ.ਸੀ. ਕੰਜ਼ਰਵੇਟਿਵ ਦੇ ਵਿੱਤ ਆਲੋਚਕ ਪੀਟਰ ਮਿਲੋਬਾਰ ਨੇ ਸੂਬੇ ਦੀ ਐਨ.ਡੀ.ਪੀ. ਸਰਕਾਰ ’ਤੇ ਹਮਲਾ ਬੋਲਦਿਆਂ ਕਿਹਾ ਕਿ ਰਿਕਾਰਡ ਬਜਟ ਘਾਟੇ ਦਾ ਅਨੁਮਾਨ ਆਪਣੇ ਆਪ ਵਿਚ ਬੀਸੀ ਦੇ ਆਰਥਿਕ ਹਾਲਾਤ ਬਾਰੇ ਸਭ ਕੁਝ ਬਿਆਨ ਕਰ ਰਿਹਾ ਹੈ।

ਮਿਲੋਬਾਰ ਨੇ ਕਿਹਾ ਕਿ 9.4-ਬਿਲੀਅਨ ਡਾਲਰ ਦੇ ਬਜਟ ਘਾਟੇ ਦੇ ਅਨੁਮਾਨ ਤੋਂ ਪਤਾ ਚੱਲਦਾ ਹੈ ਕਿ ਸੂਬਾ ਕਰਜ਼ ਵਿਚ ਡੁੱਬਦਾ ਜਾ ਰਿਹਾ ਹੈ।

ਉਨ੍ਹਾਂ ਕਿਹਾ ਕਿ ਜੇ ਵੋਟਰਸ ਨੇ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਇਹ ਫਿਸਕਲ ਅਪਡੇਟ ਦੇਖੀ ਹੁੰਦੀ ਤਾਂ ਮੈਨੂੰ ਪੂਰਾ ਯਕੀਨ ਹੈ ਕਿ ਡੇਵਿਡ ਈਬੀ ਅੱਜ ਸੂਬੇ ਦੇ ਪ੍ਰੀਮੀਅਰ ਨਹੀਂ ਹੋਣੇ ਸਨ।

ਮਿਲੋਬਾਰ ਨੇ ਕਿਹਾ ਕਿ ਸਾਡੀ ਅਰਥਵਿਵਸਥਾ ਹੌਲੀ ਹੋ ਰਹੀ ਹੈ, ਬਜਟ ਘਾਟਾ ਵਧ ਰਿਹਾ ਹੈ, ਸਰੋਤ ਅਤੇ ਕਾਰੋਬਾਰ ਤੋਂ ਟੈਕਸ ਆਮਦਨ ਵਿਚ ਗਿਰਾਵਟ ਆ ਰਹੀ ਹੈ, ਦੂਜੇ ਪਾਸੇ ਵੈਨਕੂਵਰ ਦੇ ਬ੍ਰੌਡਵੇਅ ਸਕਾਈ ਟਰੇਨ ਵਰਗੇ ਪ੍ਰਮੁੱਖ ਪ੍ਰਾਜੈਕਟਾਂ ਦੀ ਲਾਗਤ ਉਮੀਦ ਤੋਂ ਵੱਧ ਹੋ ਗਈ ਹੈ।