ਬੀ.ਸੀ. ਸਰਕਾਰ ਨੇ ਵਾਸ਼ਿੰਗਟਨ ਅਤੇ ਅਲਾਸਕਾ ਤੋਂ ਆਉਣ ਵਾਲੇ ਟਰੱਕਾਂ 'ਤੇ ਟੋਲ ਲਗਾਉਣ ਲਈ ਬਿੱਲ ਕੀਤਾ ਪੇਸ਼

ਪ੍ਰੀਮੀਅਰ ਡੇਵਿਡ ਈਬੀ ਸਰਕਾਰ ਨੇ ਬੀ.ਸੀ. ਤੋਂ ਹੋ ਕੇ ਲੰਘਣ ਵਾਲੇ ਵਾਸ਼ਿੰਗਟਨ, ਅਲਾਸਕਾ ਦੇ ਟਰੱਕਾਂ 'ਤੇ ਟੋਲ ਫੀਸ ਲਗਾਉਣ ਲਈ ਅੱਜ ਵਿਧਾਨ ਸਭਾ ਵਿਚ ਬਿੱਲ ਪੇਸ਼ ਕਰ ਦਿੱਤਾ ਹੈ। ਸੂਬੇ ਦੀ ਡਿਪਟੀ ਪ੍ਰੀਮੀਅਰ ਨਿੱਕੀ ਸ਼ਰਮਾ ਨੇ ਕਿਹਾ ਕਿ ਇਹ ਬਿੱਲ ਅਮਰੀਕੀ ਟੈਰਿਫ ਦਾ ਤੁਰੰਤ ਜਵਾਬ ਦੇਣ ਲਈ ਸੂਬਾ ਸਰਕਾਰ ਨੂੰ ਕਈ ਸਾਰੇ ਅਧਿਕਾਰ ਦੇਣ ਜਾ ਰਿਹਾ ਹੈ।

ਉਨ੍ਹਾਂ ਕਿਹਾ ਕਿ ਇਹ ਆਰਥਿਕ ਸਥਿਰਤਾ ਟੈਰਿਫ ਪ੍ਰਤੀਕਿਰਿਆ ਬਿੱਲ ਉਨ੍ਹਾਂ ਦੀ ਸਰਕਾਰ ਨੂੰ 4 ਤਰੀਕਿਆਂ ਨਾਲ ਕਦਮ ਚੁੱਕਣ ਵਿਚ ਮਦਦ ਕਰੇਗਾ, ਜਿਸ ਵਿਚ ਅੰਤਰ-ਸੂਬਾਈ ਵਪਾਰ ਰੁਕਾਵਟਾਂ ਨੂੰ ਘੱਟ ਕਰਨਾ, ਖਰੀਦ ਦੇ ਮਾਮਲੇ ਵਿਚ ਏਜੰਸੀਆਂ ਨੂੰ ਨਿਰਦੇਸ਼ ਦੇਣਾ ਸ਼ਾਮਲ ਹੈ ਅਤੇ ਇਸ ਤੋਂ ਇਲਾਵਾ ਸੂਬੇ ਦੇ ਹਾਈਵੇਅ ਅਤੇ ਤੱਟਵਰਤੀ ਕਿਸ਼ਤੀਆਂ ਦਾ ਇਸਤੇਮਾਲ ਕਰਨ ਵਾਲੇ ਵਾਹਨਾਂ 'ਤੇ ਟੋਲ ਫੀਸ ਅਤੇ ਹੋਰ ਚਾਰਜ ਲਗਾਉਣ ਲਈ ਇੱਕ ਸਿਸਟਮ ਲਾਗੂ ਕਰਨ ਦੀ ਮਨਜ਼ੂਰੀ ਦੇਣਾ ਸ਼ਾਮਲ ਹੈ। ਨਿੱਕੀ ਸ਼ਰਮਾ ਨੇ ਕਿਹਾ ਕਿ ਬਿੱਲ ਵਿਚ ਇੱਕ ਸਨਸੈੱਟ ਵੀ ਸ਼ਾਮਲ ਹੈ, ਜਿਸ ਤਹਿਤ ਇਹ ਬਿੱਲ 28 ਮਈ 2027 ਨੂੰ ਸਮਾਪਤ ਹੋ ਜਾਵੇਗਾ।