12.67C Vancouver 12.67C VancouverMar 20, 2025 4:53 PM - The Canadian Press
ਬੀ. ਸੀ. ਦੀ ਮੁੱਖ ਵਿਰੋਧੀ ਧਿਰ ਕੰਜ਼ਰਵੇਟਿਵ ਵਲੋਂ ਸੂਬਾ ਸਰਕਾਰ ਦੇ ਬਿੱਲ 7 ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ, ਇਸ ਬਿੱਲ ਨੂੰ ਲੈ ਕੇ ਗ੍ਰੀਨ ਪਾਰਟੀ ਨੇ ਵੀ ਐੱਨ. ਡੀ. ਪੀ. ਸਰਕਾਰ ਤੋਂ ਜਵਾਬ ਮੰਗਿਆ ਹੈ। ਸਰਕਾਰ ਨੂੰ ਐਮਰਜੈਂਸੀ ਪਾਵਰ ਦੇਣ ਵਾਲਾ ਇਹ ਬਿੱਲ ਪਿਛਲੇ ਹਫ਼ਤੇ ਪੇਸ਼ ਕੀਤਾ ਗਿਆ ਸੀ ਅਤੇ ਇਹ ਬੀ. ਸੀ. ਸਰਕਾਰ ਨੂੰ ਅਜਿਹੇ ਨਿਯਮ ਬਣਾਉਣ ਦੀ ਪਾਵਰ ਦੇਵੇਗਾ, ਜਿਨ੍ਹਾਂ ਲਈ ਵਿਧਾਨ ਸਭਾ ਵਿਚ ਬਹਿਸ ਦੀ ਲੋੜ ਨਹੀਂ ਹੋਵੇਗੀ।
ਪ੍ਰੀਮੀਅਰ ਡੇਵਿਡ ਈਬੀ ਦਾ ਕਹਿਣਾ ਹੈ ਕਿ ਪ੍ਰਸਤਾਵਿਤ ਬਿੱਲ 7 ਸੂਬਾ ਸਰਕਾਰ ਨੂੰ ਟਰੰਪ ਦੇ ਟੈਰਿਫ ਅਤੇ ਹੋਰ ਧਮਕੀਆਂ ਨਾਲ ਨਜਿੱਠਣ ਦੀ ਪਾਵਰ ਦੇਵੇਗਾ ਪਰ ਵਿਰੋਧੀ ਧਿਰ ਦਾ ਕਹਿਣਾ ਹੈ ਕਿ ਇਸ ਆੜ ਵਿਚ ਡੇਵਿਡ ਈਬੀ ਸਰਕਾਰ ਤਾਨਸ਼ਾਹੀ ਵਾਲਾ ਰਸਤਾ ਅਪਣਾ ਰਹੀ ਹੈ।
ਕੰਜ਼ਰਵੇਟਿਵ ਦਾ ਇਲਜ਼ਾਮ ਹੈ ਕਿ ਇਹ ਬੀ. ਸੀ. ਦੇ ਇਤਿਹਾਸ ਦਾ ਸਭ ਤੋਂ ਗੈਰ-ਲੋਕਤੰਤਰੀ ਅਤੇ ਸੱਤਾ ਹਥਿਆਉਣ ਵਾਲਾ ਕਾਨੂੰਨ ਹੈ, ਜੋ ਸਰਕਾਰ ਨੂੰ ਵਿਧਾਨ ਸਭਾ ਦੀ ਮਨਜ਼ੂਰੀ ਲਏ ਬਿਨਾਂ ਮੌਜੂਦਾ ਕਾਨੂੰਨਾਂ ਨੂੰ ਓਵਰਰਾਈਡ ਕਰਨ ਦੀ ਇਜਾਜ਼ਤ ਦਿੰਦਾ ਹੈ। ਜੌਨ ਰਸਟੈਡ ਨੇ ਕਿਹਾ ਕਿ ਉਨ੍ਹਾਂ ਦੀ ਬੀ. ਸੀ.ਕੰਜ਼ਰਵੇਟਿਵ ਪਾਰਟੀ ਬਿੱਲ 7 ਦਾ ਸਮਰਥਨ ਨਹੀਂ ਕਰੇਗੀ, ਉਨ੍ਹਾਂ ਕਿਹਾ ਕਿ ਇਸ ਵਿਚ ਅਜਿਹੇ ਪ੍ਰਬੰਧ ਸ਼ਾਮਲ ਹਨ ਜੋ ਐਨ.ਡੀ.ਪੀ. ਨੂੰ ਰੋਡ ਟੈਕਸ ਲਗਾਉਣ ਅਤੇ ਲੋਕਾਂ ਦੀ ਨਿੱਜੀ ਜਾਣਕਾਰੀ ਤੱਕ ਇਕੱਠੀ ਕਰਨ ਦੀ ਇਜਾਜ਼ਤ ਦਿੰਦੇ ਹਨ।
