14.61C Vancouver 14.61C VancouverMar 5, 2024 8:23 PM - The Canadian Press
ਬੀ.ਸੀ. ਸਰਕਾਰ ਵਲੋਂ ਅਗਲੇ ਦਹਾਕੇ ਤੱਕ ਗਰੀਬੀ ਦਰ ਨੂੰ 60% ਤੱਕ ਘਟਾਉਣ ਲਈ ਨਵਾਂ ਕਾਨੂੰਨ ਪੇਸ਼ ਕੀਤਾ ਗਿਆ ਹੈ। ਸਰਕਾਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਮੁੱਖ ਟੀਚਾ ਬੱਚਿਆਂ ਅਤੇ ਬਜ਼ੁਰਗਾਂ ਨੂੰ ਗਰੀਬੀ ਰੇਖਾ ਤੋਂ ਉੱਪਰ ਲਿਆਉਣਾ ਹੈ।
ਸਮਾਜਿਕ ਵਿਕਾਸ ਅਤੇ ਗਰੀਬੀ ਘਟਾਉਣ ਬਾਰੇ ਮੰਤਰੀ ਸ਼ੀਲਾ ਮੈਲਕਮਸਨ ਦਾ ਕਹਿਣਾ ਹੈ ਕਿ ਅੱਜ ਪੇਸ਼ ਕੀਤੇ ਗਏ ਕਾਨੂੰਨ ਵਿਚ ਗਰੀਬੀ ਨੂੰ ਘਟਾਉਣ ਲਈ ਉੱਚ ਟੀਚੇ ਨਿਰਧਾਰਤ ਕਰਨ, ਆਮਦਨ ਅਤੇ ਅਪੰਗਤਾ ਸਹਾਇਤਾ ’ਤੇ ਲੋਕਾਂ ਲਈ ਰੁਜ਼ਗਾਰ ਦੀਆਂ ਜ਼ਰੂਰਤਾਂ ਨੂੰ ਸੌਖਾ ਬਣਾਉਣ ਅਤੇ ਵਧੇਰੇ ਸਹਾਇਤਾ ਪ੍ਰਦਾਨ ਕਰਨ ਲਈ ਤਿੰਨ ਕਾਨੂੰਨਾਂ ਵਿੱਚ ਤਬਦੀਲੀ ਕੀਤੀ ਗਈ ਹੈ।
ਮੈਲਕਮਸਨ ਅਨੁਸਾਰ ਇਹ ਕਾਨੂੰਨ ਸੂਬੇ ਨੂੰ ਅਗਲੇ ਦਹਾਕੇ ਵਿੱਚ ਸਮੁੱਚੀ ਗਰੀਬੀ ਵਿੱਚ 60% ਦੀ ਕਟੌਤੀ ਕਰਨ ਲਈ ਵਚਨਬੱਧ ਕਰਦਾ ਹੈ। ਇਸ ਵਿੱਚ ਬੱਚਿਆਂ ਦੀ ਗਰੀਬੀ ਨੂੰ 75% ਤੱਕ ਘਟਾਉਣਾ ਅਤੇ ਪਹਿਲੀ ਵਾਰ ਬਜ਼ੁਰਗਾਂ ਦੀ ਗਰੀਬੀ ਨੂੰ 50% ਤੱਕ ਘਟਾਉਣ ਦਾ ਵਾਅਦਾ ਕਰਨਾ ਸ਼ਾਮਲ ਹੈ।
ਗਰੀਬੀ ਘਟਾਉਣ ਬਾਰੇ ਸਰਕਾਰ ਦੀ ਤਾਜ਼ਾ ਰਿਪੋਰਟ ਅਨੁਸਾਰ 2021 ਤੋਂ ਬੀ.ਸੀ. ਦੀ ਕੁੱਲ ਗਰੀਬੀ ਦਰ 2016 ਦੇ ਪੱਧਰ ਤੋਂ 45% ਘੱਟ ਗਈ ਅਤੇ ਬਾਲ ਗਰੀਬੀ ਵਿੱਚ 54.6% ਦੀ ਕਮੀ ਆਈ। ਪਰ ਰਿਪੋਰਟ ਅਨੁਸਾਰ 2021 ਵਿੱਚ ਅਜੇ ਵੀ 447,000 ਲੋਕ ਗਰੀਬੀ ਵਿੱਚ ਸਨ, ਜਿਨ੍ਹਾਂ ਵਿੱਚ 70,000 ਬੱਚੇ ਵੀ ਸ਼ਾਮਲ ਸਨ।
