16.48C Vancouver 16.48C VancouverOct 25, 2020 3:25 PM -
ਜੌਹਨ ਹੋਰਗਨ ਦਾ ਕਹਿਣਾ ਹੈ ਕਿ ਅਜੇ ਵੀ ਡਾਕ ਰਾਹੀਂ ਆਈਆਂ ਲੱਖਾਂ ਵੋਟਾਂ ਦੀ ਗਿਣਤੀ ਹੋਣੀ ਬਾਕੀ ਹੈ, ਪਰ ਇੱਕ ਗੱਲ ਪੱਕੀ ਹੈ: ਸੋਮਵਾਰ ਤੋਂ ਉਹ ਪ੍ਰੀਮੀਅਰ ਵਜੋਂ ਆਪਣੀ ਜ਼ਿੰਮੇਵਾਰੀ ਦੁਬਾਰਾ ਸੰਭਾਲਣ ਜਾ ਰਹੇ ਹਨ ।
ਜੌਹਨ ਹੋਰਗਨ ਵੱਲੋਂ ਕੋਵਿਡ-19 ਦੌਰਾਨ ਚੋਣਾਂ ਕਰਵਾ ਕੇ ਆਪਣੀ ਘੱਟ ਗਿਣਤੀ ਸਰਕਾਰ ਨੂੰ ਬਹੁਮਤ ਦਿਵਾਉਣ ਲਈ ਜੋਖਮ ਚੁੱਕਿਆ ਗਿਆ ਸੀ।
ਚੋਣਾਂ ਦੇ ਅੰਤਮ ਨਤੀਜੇ ਘੱਟੋ ਘੱਟ ਸੋਲ਼ਾਂ ਨਵੰਬਰ ਤਕ ਪ੍ਰਤੱਖ ਨਹੀਂ ਹੋਣਗੇ ਜਦੋਂ ਤਕ ਇਲੈਕਸ਼ਨਜ਼ ਬੀ.ਸੀ. ਵੱਲੋਂ ਡਾਕ ਰਾਹੀਂ ਆਈਆਂ ਵੋਟਾਂ ਦੀ ਸਕਰੀਨਿੰਗ ਅਤੇ ਗਿਣਤੀ ਮੁਕੰਮਲ ਨਹੀਂ ਹੁੰਦੀ।
ਪਰ ਸ਼ਨੀਵਾਰ ਰਾਤ ਆਏ ਨਤੀਜਿਆਂ ਮੁਤਾਬਕ ਬੀ.ਸੀ. ਐਨਡੀਪੀ ਦੇ ਉਮੀਦਵਾਰ 87 ਵਿੱਚੋਂ 55 ਹਲਕਿਆਂ ਤੇ ਜੇਤੂ ਕਰਾਰ ਦਿੱਤੇ ਜਾ ਚੁੱਕੇ ਹਨ ਜਾਂ ਫਿਰ ਉਨ੍ਹਾਂ ਨੂੰ ਬੜਤ ਹਾਸਲ ਹੈ। ਇਸ ਦੇ ਮੁਕਾਬਲੇ ਬੀ.ਸੀ. ਲਿਬਰਲ ਪਾਰਟੀ 29 ਅਤੇ ਬੀ.ਸੀ. ਗ੍ਰੀਨ ਪਾਰਟੀ 3 ਸੀਟਾਂ ਤੇ ਅੱਗੇ ਹੈ।
ਸੂਬੇ ਵਿੱਚ ਸਰਕਾਰ ਬਣਾਉਣ ਲਈ 44 ਸੀਟਾਂ ਦੀ ਹੀ ਲੋੜ ਹੈ।
ਬੀ.ਸੀ. ਐਨਡੀਪੀ ਵੱਲੋਂ ਸਿਹਤ ਸੰਭਾਲ ਨਾਲ ਸਬੰਧਤ ਵਾਅਦਿਆਂ ਨੂੰ ਪ੍ਰਮੁੱਖ ਰੱਖ ਕੇ ਪ੍ਰਚਾਰ ਕੀਤਾ ਗਿਆ ਸੀ ਜਿਸ ਵਿਚ ਲੌਂਗ ਟਰਮ ਕੇਅਰ ਸੈਂਟਰਾਂ ਲਈ ਸੱਤ ਹਜਾਰ ਨਵੇਂ ਫਰੰਟ ਲਾਈਨ ਕਾਮਿਆਂ ਨੂੰ ਨੌਕਰੀ 'ਤੇ ਰੱਖਣ ਦੀ ਗੱਲ ਵੀ ਸ਼ਾਮਲ ਸੀ।
ਇਸ ਦੇ ਨਾਲ ਹੀ ਪਾਰਟੀ ਵੱਲੋਂ ਸਵਾ ਲੱਖ ਡਾਲਰ ਸਾਲਾਨਾ ਤੋਂ ਘੱਟ ਆਮਦਨ ਵਾਲੇ ਪਰਿਵਾਰਾਂ ਨੂੰ ਇੱਕ ਹਜਾਰ ਡਾਲਰ ਦਾ ਰਾਹਤ ਭੁਗਤਾਨ ਕਰਨ ਦਾ ਵਾਅਦਾ ਵੀ ਕੀਤਾ ਗਿਆ ਹੈ।
ਜੌਹਨ ਹੋਰਗਨ ਨੇ ਕਿਹਾ ਕਿ ਜਿੰਨੀ ਦੇਰ ਤੱਕ ਡਾਕ ਰਾਹੀਂ ਪਈਆਂ ਵੋਟਾਂ ਦੀ ਗਿਣਤੀ ਮੁਕੰਮਲ ਨਹੀਂ ਹੁੰਦੀ ਉਹ ਆਪਣਾ ਧਿਆਨ ਕੋਵਿਡ-19 ਤੇ ਕੇਂਦਰਿਤ ਰੱਖਣਗੇ।
