ਬੀ.ਸੀ. ਦੀ ਵਿਰੋਧੀ ਧਿਰ ਨੇ ਕੋਲੇ 'ਤੇ ਕਾਰਬਨ ਟੈਕਸ ਲਗਾਉਣ ਦੀ ਕੀਤੀ ਮੰਗ

ਕੰਜ਼ਰਵੇਟਿਵ ਪਾਰਟੀ ਆਫ ਬੀ.ਸੀ. ਦੇ ਪ੍ਰਧਾਨ ਜੌਨ ਰਸਟੈਡ ਨੇ ਟਰੰਪ ਦੀ ਟੈਰਿਫ ਧਮਕੀ ਦੇ ਜਵਾਬ ਵਿਚ ਅਮਰੀਕਾ ਤੋਂ ਆਉਣ ਵਾਲੇ ਕੋਲੇ ’ਤੇ ਕਾਰਬਨ ਟੈਕਸ ਲਗਾਉਣ ਦੀ ਮੰਗ ਕੀਤੀ ਹੈ। ਰਸਟੈਡ ਨੇ ਕਿਹਾ ਕਿ ਇਹ ਕੈਨੇਡੀਅਨ ਸਾਫਟਵੁੱਡ ’ਤੇ ਟਰੰਪ ਦੇ ਟੈਰਿਫ ਅਤੇ ਡਿਊਟੀਆਂ ਦੇ ਜਵਾਬ ਵਿਚ ਕਾਰਗਰ ਕਦਮ ਹੋ ਸਕਦਾ ਹੈ।

ਪਿਛਲੇ ਹਫ਼ਤੇ ਸੂਬੇ ਦੇ ਜੰਗਲਾਤ ਮੰਤਰੀ ਰਵੀ ਪਰਮਾਰ ਨੇ ਕਿਹਾ ਸੀ ਕਿ ਜੇ ਟਰੰਪ ਅਜਿਹਾ ਕਰਦੇ ਹਨ ਤਾਂ ਸਾਫਟਵੁੱਡ ’ਤੇ ਅਮਰੀਕੀ ਟੈਰਿਫ ਅਤੇ ਡਿਊਟੀਆਂ ਨੂੰ ਮਿਲਾ ਕੇ ਟੈਕਸ 50 ਫੀਸਦੀ ਤੱਕ ਪਹੁੰਚ ਜਾਵੇਗਾ, ਜੋ ਕਿ ਬੀ. ਸੀ. ਦੇ ਸਾਫਟਵੁੱਡ ਸਪਲਾਇਰ ਲਈ ਵੱਡਾ ਝਟਕਾ ਹੋਵੇਗਾ। ਰਸਟੈਡ ਨੇ ਕਿਹਾ ਕਿ ਜਦੋਂ ਤੱਕ ਸਾਫਟਵੁੱਡ ’ਤੇ ਟੈਰਿਫ ਨੂੰ ਵਾਪਸ ਨਹੀਂ ਲਿਆ ਜਾਂਦਾ ਉਦੋਂ ਤੱਕ ਸੂਬੇ ਨੂੰ ਅਮਰੀਕਨ ਨੂੰ ਉੱਥੇ ਸੱਟ ਪਹੁੰਚਾਉਣ ਦੀ ਲੋੜ ਹੈ ਜਿੱਥੇ ਉਨ੍ਹਾਂ ਨੂੰ ਇਹ ਮਹਿਸੂਸ ਹੋਵੇ।

ਉਨ੍ਹਾਂ ਕਿਹਾ ਕਿ 18 ਮਿਲੀਅਨ ਟਨ ਥਰਮਲ ਕੋਲਾ ਵੈਨਕੂਵਰ ਰਾਹੀਂ ਭੇਜਿਆ ਜਾਂਦਾ ਹੈ। ਹਾਲਾਂਕਿ, ਸੂਬਾ ਇਸ ਦਾ ਇਸਤੇਮਾਲ ਨਹੀਂ ਕਰਦਾ। ਇਸ ਦੇ ਨਾਲ ਹੀ ਰਸਟੈਡ ਨੇ ਵਾਤਾਵਰਣ ਕਾਰਕੁੰਨ ਨੂੰ ਅਮਰੀਕੀ ਫੰਡਿੰਗ ਬੈਨ ਕਰਨ ਦੀ ਵੀ ਮੰਗ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਦਾ ਇਸਤੇਮਾਲ ਸਾਡੇ ਸਰੋਤ ਦੇ ਵਿਰੁੱਧ ਹੁੰਦਾ ਹੈ।