ਬੀ.ਸੀ. ਪੁਲਿਸ ਨੇ ਡਿਸਟ੍ਰੈਕਟਿੰਗ ਡਰਾਈਵਿੰਗ ਅਤੇ ਸੀਟਬੈਲਟ ਦੀ ਉਲੰਘਣਾ ਕਰਨ ਵਾਲਿਆਂ ਲਈ ਲਾਏ ਭਾਰੀ ਜੁਰਮਾਨੇ

ਬੀ.ਸੀ. ਹਾਈਵੇਅ ਪੈਟਰੋਲ ਨੇ ਪੂਰੇ ਸੂਬੇ ਵਿਚ ਡਿਸਟ੍ਰੈਕਟਿੰਗ ਡਰਾਈਵਿੰਗ ਅਤੇ ਸੀਟਬੈਲਟ ਕੰਪੇਨ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਇੰਸਪੈਕਟਰ ਬਰਾਇਨ ਡੋਨਾਲਡਸਨ ਮੁਤਾਬਕ, ਇਹ ਕੰਪੇਨ ਮਾਰਚ ਵਿਚ ਸ਼ੁਰੂ ਕੀਤੀ ਜਾ ਰਹੀ ਹੈ ਅਤੇ ਇਨ੍ਹਾਂ ਮਾਮਲਿਆਂ ਵਿਚ ਉਲੰਘਣਾ ਲਈ ਲੋਕਾਂ ਨੂੰ ਭਾਰੀ ਜੁਰਮਾਨੇ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਰੋਡ ਸੇਫਟੀ ਬੀ.ਸੀ. ਦੇ ਅੰਕੜਿਆਂ ਅਨੁਸਾਰ, ਡਿਸਟ੍ਰੈਕਟਿੰਗ ਡਰਾਈਵਿੰਗ ਨਸ਼ੇ ਵਿਚ ਗੱਡੀ ਚਲਾਉਣ ਅਤੇ ਸਪੀਡਿੰਗ ਕਾਰਨ ਸੂਬੇ ਵਿਚ ਹੋਣ ਵਾਲੇ ਗੰਭੀਰ ਅਤੇ ਜਾਨਲੇਵਾ ਹਾਦਸਿਆਂ ਦੇ ਪ੍ਰਮੁੱਖ ਤਿੰਨ ਕਾਰਨਾਂ ਵਿਚੋਂ ਇੱਕ ਹੈ।

ਬੀ.ਸੀ. ਹਾਈਵੇਅ ਪੈਟਰੋਲ ਮੁਤਾਬਕ, ਗੱਡੀ ਚਲਾਉਂਦੇ ਸਮੇਂ ਮੋਬਾਈਲ ਦੀ ਵਰਤੋਂ ਕਰਨ 'ਤੇ $368 ਦਾ ਜੁਰਮਾਨਾ ਕੀਤਾ ਜਾ ਸਕਦਾ ਹੈ, ਸੀਟਬੈਲਟ ਨਾ ਲਗਾਉਣ 'ਤੇ $167 ਅਤੇ ਗੱਡੀ ਵਿਚ ਬੱਚੇ ਨੂੰ ਬਿਨਾਂ ਸੁਰੱਖਿਆ ਸੀਟ ਦੇ ਬਿਠਾਉਣ 'ਤੇ $109 ਦਾ ਜੁਰਮਾਨਾ ਹੋ ਸਕਦਾ ਹੈ।

ਇੰਸਪੈਕਟਰ ਡੋਨਾਲਡਸਨ ਨੇ ਕਿਹਾ ਕਿ ਪਹਿਲਾਂ ਚਿਤਾਵਨੀ ਦੇਣ ਤੋਂ ਬਾਅਦ ਹੁਣ ਕੋਈ ਬਹਾਨਾ ਨਹੀਂ ਚੱਲੇਗਾ ਅਤੇ ਕਾਨੂੰਨ ਤੋੜਨ ਵਾਲਿਆਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।