17.18C Vancouver 17.18C VancouverFeb 27, 2021 1:32 AM -
ਵੈਨਕੂਵਰ ਪੁਲਿਸ ਦੀ ਬੁਲਾਰੀ ਦਾ ਕਹਿਣਾ ਹੈ ਕਿ 2 ਅਫ਼ਸਰਾਂ ਦੇ ਵਿਵਹਾਰ 'ਤੇ ਜਾਂਚ ਕੀਤੀ ਜਾ ਰਹੀ ਹੈ।
ਅਜਿਹਾ ਉਸ ਵੇਲੇ ਕੀਤਾ ਜਾ ਰਿਹਾ ਹੈ ਜਦ 2 ਪੁਲਿਸ ਅਫ਼ਸਰਾਂ ਦੀ ਵੀਡੀਓ ਫੁਟੇਜ ਉਜਾਗਰ ਹੋਈ, ਜਿਸ 'ਚ ਉਹ ਸਮੁੰਦਰ ਦੇ ਕੰਢੇ ਇੱਕ ਮ੍ਰਿਤ ਸ਼ਰੀਰ ਕੋਲ ਖੜੇ ਪੋਜ਼ ਦੇ ਕੇ ਤਸਵੀਰਾਂ ਖਿਚਵਾਉਂਦੇ ਵਿਖਾਈ ਦਿੱਤੇ।
ਕਾਂਸਟੇਬਲ ਤਾਨੀਆ ਵਿਸਿੰਟਨ ਨੇ ਕਿਹਾ ਕਿ ਅਫ਼ਸਰ ਮੌਕੇ 'ਤੇ ਉਸ ਵੇਲੇ ਪਹੁੰਚੇ ਸਨ, ਜਦ ਉਨ੍ਹਾਂ ਨੂੰ ਸਟੈਂਲੀ ਪਾਰਕ ਦੇ ਥਰਡ ਬੀਚ ਕੋਲ ਇੱਕ ਮ੍ਰਿਤ ਵਿਅਕਤੀ ਦੀ ਜਾਣਕਾਰੀ ਮਿਲੀ ਸੀ।
ਉਹ ਮੌਕੇ 'ਤੇ ਕੋਰੋਨਰ ਦੇ ਪਹੁੰਚਣ ਦੀ ਉਡੀਕ ਕਰ ਰਹੇ ਸਨ।
ਵਿਸਿੰਟਨ ਨੇ ਅਫ਼ਸਰਾਂ ਦੇ ਵਿਵਹਾਰ 'ਤੇ ਟਿੱਪਣੀ ਨਹੀਂ ਕੀਤੀ ਪਰ ਉਨ੍ਹਾਂ ਕਿਹਾ ਕਿ ਪੁਲਿਸ ਡਿਪਾਰਟਮੈਂਟ ਬਿਨਾ ਕਿਸੇ ਅਧਿਕਾਰਿਤ ਲੋੜ ਦੇ ਕਿਸੇ ਅਜਿਹੀ ਜਗ੍ਹਾ ਸਖਤ ਤਰੀਕੇ ਨਾਲ ਤਸਵੀਰਾਂ ਖਿਚਵਾਉਣ ਦਾ ਵਿਰੋਧ ਕਰਦਾ ਹੈ।
ਬੁੱਧਵਾਰ ਸਵੇਰੇ ਜ਼ੈਕ ਰੈਟਕਲਿਫ ਨਾਮ ਦਾ ਵਿਅਕਤੀ ਇਸ ਇਲਾਕੇ 'ਚ ਸੈਰ ਲਈ ਆਇਆ ਸੀ, ਜਦ ਉਸ ਨੇ ਇੱਕ ਮ੍ਰਿਤ ਵਿਅਕਤੀ ਕੋਲ ਪੁਲਿਸ ਅਫ਼ਸਰਾਂ ਨੂੰ ਤਸਵੀਰਾਂ ਖਿਚਵਾਉਂਦੇ ਹੋਏ ਵੇਖਿਆ ਅਤੇ ਇਸ ਦੀ ਵੀਡੀਓ ਬਣਾਈ।
ਕਾਂਸਟੇਬਲ ਤਾਨੀਆ ਵਿਸਿੰਟਨ ਨੇ ਕਿਹਾ ਕਿ ਵੀਡੀਓ ਨੂੰ ਪੁਲਿਸ ਕੰਪਲੇਂਟ ਕਮਿਸ਼ਨਰ ਦੇ ਦਫ਼ਤਰ ਪਹੁੰਚਾ ਦਿੱਤਾ ਗਿਆ ਹੈ।
