16.59C Vancouver 16.59C VancouverJan 5, 2022 6:06 PM - The Canadian Press
ਬ੍ਰਿਟਿਸ਼ ਕੋਲੰਬੀਆ ਵਿੱਚ ਜਾਇਦਾਦ ਦੀਆਂ ਕੀਮਤਾਂ ਇਕ ਵਾਰ ਫਿਰ ਵਧ ਰਹੀਆਂ ਨੇ ਪਰ ਕੀਮਤਾਂ ਵਿੱਚ ਵੈਨਕੂਵਰ ਦਾ ਮਹਿੰਗਾ ਏਰੀਆ ਛੋਟੇ ਟਾਊਨਜ਼ ਨਾਲੋਂ ਪਛੜ ਗਿਆ ਹੈ ਜਿੱਥੇ ਕੀਮਤਾਂ 40 ਫੀਸਦੀ ਤੋਂ ਵੀ ਵੱਧ ਵਧੀਆਂ ਹਨ।
ਬੀ ਸੀ ਅਸੈਸਮੈਂਟ ਵੈੱਬਸਾਈਟ 'ਤੇ ਪੋਸਟ ਕੀਤਾ ਗਿਆ ਡੇਟਾ ਦਰਸਾਉਂਦਾ ਹੈ ਕਿ 1ਜੁਲਾਈ,2021 ਦੀਆਂ ਕੀਮਤਾਂ ਅਨੁਸਾਰ ਹੋਪ, ਪੋਰਟ ਅਲਬਰਨੀ,ਲੇਕ ਕੋਵਿਚਨ ਅਤੇ ਹੋਰ ਰੂਰਲ ਇਲਾਕਿਆਂ ਵਿੱਚ ਜਾਇਦਾਦ ਦੀਆਂ ਕੀਮਤਾਂ ਵਿੱਚ 40 ਫ਼ੀਸਦੀ ਤੋਂ ਵੱਧ ਦਾ ਵਾਧਾ ਹੋਇਆ ਹੈ ਜਦ ਕਿ ਵੈਨਕੂਵਰ ਵਿੱਚ ਜਾਇਦਾਦ ਦੀਆਂ ਕੀਮਤਾਂ ਚ ਵਾਧਾ ਸਿਰਫ਼ 7 ਫ਼ੀਸਦੀ ਹੀ ਹੋਇਆ।
ਬੀ ਸੀ ਅਸੈਸਮੈਂਟ ਦੇ ਡਿਪਟੀ ਅਸੈਸਰ ਬ੍ਰਾਇਨ ਮੁਰਾਓ ਦਾ ਕਹਿਣਾ ਹੈ ਕਿ ਪ੍ਰੋਵਿੰਸ਼ੀਅਲ ਰੀਅਲ ਅਸਟੇਟ ਮਾਰਕੀਟ ਮਜ਼ਬੂਤ ਹੈ ਅਤੇ ਘਰਾਂ ਦੇ ਮਾਲਕ ਪ੍ਰੋਵਿੰਸ ਭਰ ਵਿਚ 2022 ਲਈ ਹੋਰ ਵਧੇਰੇ ਕੀਮਤਾਂ ਦੀ ਉਮੀਦ ਕਰ ਸਕਦੇ ਹਨ।
ਪਰ ਉਨ੍ਹਾਂ ਦਾ ਕਹਿਣਾ ਹੈ ਕਿ ਅਸੈਸਮੈਂਟਸ ਵਿੱਚ ਵੱਡੇ ਪੱਧਰ 'ਤੇ ਵਾਧੇ ਦਾ ਇਹ ਭਾਵ ਨਹੀਂ ਕਿ ਪ੍ਰਾਪਰਟੀ ਟੈਕਸ ਵੀ ਇੰਨਾ ਹੀ ਵਧੇਗਾ।
ਮੁਰਾਓ ਨੇ ਅੱਗੇ ਕਿਹਾ ਕਿ ਲੋਕ ਸਸਤੀ ਰੀਅਲ ਅਸਟੇਟ ਜਾਂ ਰਿਟਾਇਰਮੈਂਟ ਆਪਸ਼ਨਜ਼ ਲਈ ਸ਼ਹਿਰੀ ਇਲਾਕਿਆਂ ਨੂੰ ਛੱਡ ਰਹੇ ਹਨ ਜਿਸ ਦੇ ਨਤੀਜੇ ਵਜੋਂ ਬੀ ਸੀ ਦੇ ਨਿੱਕੇ ਟਾਊਨਜ਼ ਦੇ ਕੁਝ ਹਿੱਸਿਆਂ ਵਿੱਚ ਜਾਇਦਾਦ ਦੀ ਕੀਮਤ 'ਚ 40 ਤੋਂ 50 ਫ਼ੀਸਦੀ ਦਾ ਵਾਧਾ ਹੋਇਆ ਹੈ।
ਬੀ ਸੀ ਅਸੈਸਮੈਂਟ ਦਾ ਕਹਿਣਾ ਹੈ ਕਿ ਬੀ ਸੀ ਵਿੱਚ ਰੀਅਲ ਅਸਟੇਟ ਦੀ ਕੀਮਤ ਦੀ ਕੁੱਲ ਕੀਮਤ ਤਕਰੀਬਨ 2.44 ਟ੍ਰਿਲੀਅਨ ਡਾਲਰ ਹੈ।
ਇਹ ਵਾਧਾ 2021 ਨਾਲੋਂ ਤਕਰੀਬਨ 22 ਫੀਸਦੀ ਜ਼ਿਆਦਾ ਹੈ।
