13.44C Vancouver 13.44C VancouverApr 29, 2021 7:33 PM -
ਬੀ.ਸੀ. ਕੋਰੋਨਰਸ ਸਰਵਿਸ ਨੇ ਮਾਰਚ ਮਹੀਨੇ ਦੇ ਓਵਰਡੋਜ਼ ਸੰਬੰਧੀ ਮੌਤਾਂ ਦੇ ਅੰਕੜੇ ਸਾਂਝੇ ਕੀਤੇ ਹਨ।
ਸੂਬੇ 'ਚ ਸਾਲ ਦੇ ਤੀਜੇ ਮਹੀਨੇ ਦੌਰਾਨ 158 ਲੋਕਾਂ ਨੇ ਓਵਰਡੋਜ਼ ਕਾਰਨ ਜਾਨ ਗਵਾ ਦਿੱਤੀ।
ਇਹ ਸੂਬੇ 'ਚ ਲਗਾਤਾਰ 12ਵਾਂ ਮਹੀਨਾ ਹੈ ਜਦ ਓਵਰਡੋਜ਼ ਸੰਬੰਧੀ 100 ਤੋਂ ਵਧੇਰੇ ਮੌਤਾਂ ਰਿਪੋਰਟ ਹੋਈਆਂ ਹਨ।
ਮਾਰਚ 2020 ਦੇ ਮੁਕਾਬਲੇ ਇਸ ਨੂੰ ਮੌਤਾਂ 'ਚ 41% ਦਾ ਵਾਧਾ ਦੱਸਿਆ ਗਿਆ ਹੈ।
ਬੀਤੇ ਸਾਲ ਮਾਰਚ ਦੇ ਮਹੀਨੇ 'ਚ ਓਵਰਡੋਜ਼ ਸੰਬੰਧੀ ਮੌਤਾਂ ਦੀ ਗਿਣਤੀ 112 ਰਹੀ ਸੀ।
ਹੁਣ ਇਸ ਸਾਲ ਦੌਰਾਨ ਓਵਰਡੋਜ਼ ਕਾਰਨ ਹੋਈਆਂ ਮੌਤਾਂ ਦੀ ਗਿਣਤੀ 498 ਤਕ ਪਹੁੰਚ ਗਈ ਹੈ।
ਇਸ ਅੰਕੜੇ ਦੇ ਨਾਲ ਹੁਣ ਬੀ.ਸੀ. 'ਚ ਲਗਾਤਾਰ ਤੀਜਾ ਮਹੀਨਾ ਹੈ ਜਦ ਔਸਤ ਅਨੁਸਾਰ ਹਰ ਰੋਜ਼ 5 ਲੋਕਾਂ ਨੇ ਓਵਰਡੋਜ਼ ਕਾਰਨ ਜਾਨ ਗਵਾ ਦਿੱਤੀ।
ਕੋਰੋਨਰ ਸਰਵਿਸ ਦਾ ਕਹਿਣਾ ਹੈ ਕਿ ਇਸ ਸਾਲ 48 ਓਵਰਡੋਜ਼ ਸੰਬੰਧੀ ਮੌਤਾਂ 'ਚ ਕਾਰਫੈਂਟਾਨਿਲ ਨੂੰ ਇੱਕ ਅਹਿਮ ਫੈਕਟਰ ਦੱਸਿਆ ਗਿਆ ਹੈ।
ਇਸ ਨੂੰ ਫੈਂਟਾਨਿਲ ਦੇ ਮੁਕਾਬਲੇ 100 ਗੁਣਾ ਵਧੇਰੇ ਹਾਨੀਕਾਰਕ ਦੱਸਿਆ ਜਾਂਦਾ ਹੈ।
ਇਸ ਨਾਲ ਸੰਬੰਧਤ ਸਾਲ 2020 'ਚ ਕੁੱਲ 65 ਮੌਤਾਂ ਰਿਪੋਰਟ ਹੋਈਆਂ ਸਨ।
ਬੀ.ਸੀ. ਚੀਫ਼ ਕੋਰੋਨਰ ਲੀਜ਼ਾ ਲਾਪੌਇਂਟ ਦਾ ਕਹਿਣਾ ਹੈ ਕਿ ਬਹੁਤੇ ਓਵਰਡੋਜ਼ ਪੀੜਤ 30 ਤੋਂ 59 ਸਾਲ ਦੇ ਦਰਮਿਆਨ ਦੇ ਆਦਮੀ ਸਨ।
ਇਸ ਸਾਲ ਸਭ ਤੋਂ ਵੱਧ 'ਡੈਥ ਰੇਟ' ਨੌਰਦਰਨ ਹੈਲਥ ਰਿਜਨ 'ਚ ਰਿਪੋਰਟ ਹੋਇਆ ਹੈ ਜਿੱਥੇ ਪ੍ਰਤੀ 100,000 ਲੋਕਾਂ 'ਚ ਅਜਿਹੀਆਂ 57 ਮੌਤਾਂ ਰਿਪੋਰਟ ਹੋਈਆਂ ਹਨ।
ਵੈਨਕੂਵਰ ਕੋਸਟਲ ਹੈਲਥ 'ਚ ਪ੍ਰਤੀ 100,000 ਲੋਕਾਂ 'ਤੇ ਓਵਰਡੋਜ਼ ਸੰਬੰਧੀ 45 ਮੌਤਾਂ ਰਿਪੋਰਟ ਹੋਈਆਂ ਹਨ।
