ਬੀ.ਸੀ. ਦੀ ਨਵੀਂ ਸਰਕਾਰ ਜਲਦ ਹੀ ਸੰਭਾਲੇਗੀ ਸੱਤਾ

ਬੀ.ਸੀ. ਦੀ ਨਵੀਂ ਸਰਕਾਰ ਜਲਦ ਹੀ ਸੱਤਾ ਸੰਭਾਲੇਗੀ। ਪ੍ਰੀਮੀਅਰ ਡੇਵਿਡ ਈਬੀ ਨੇ ਕਿਹਾ ਹੈ ਕਿ ਤਿੰਨ ਵਿਧਾਨ ਸਭਾ ਸੀਟਾਂ ਕੇਲੋਨਾ ਸੈਂਟਰ, ਸਰੀ-ਗਿਲਡਫੋਰਡ ਅਤੇ ਪ੍ਰਿੰਸ ਜਾਰਜ-ਮੈਕੇਂਜੀ ’ਤੇ ਵੋਟਾਂ ਦੀ ਗਿਣਤੀ ਦਾ ਨਿਆਂਇਕ ਮੁੜ ਗਿਣਤੀ ਪੂਰਾ ਹੋਣ ਤੋਂ ਬਾਅਦ ਨਵੇਂ ਮੰਤਰੀ ਮੰਡਲ ਲਈ ਸਹੁੰ ਚੁੱਕ ਸਮਾਗਮ 18 ਨਵੰਬਰ ਨੂੰ ਹੋਵੇਗਾ।

ਈਬੀ ਨੇ ਬੁੱਧਵਾਰ ਨੂੰ ਕਿਹਾ ਕਿ ਸੂਬਾ ਵਾਸੀ ਸਮਰੱਥਾ, ਰਿਹਾਇਸ਼ ਅਤੇ ਸਿਹਤ ਸੰਭਾਲ ’ਤੇ ਜਲਦ ਕੰਮ ਸ਼ੁਰੂ ਹੋਣ ਦੇ ਇੰਤਜ਼ਾਰ ਵਿਚ ਹਨ, ਨਿਆਂਇਕ ਮੁੜ ਗਿਣਤੀ ਤੋਂ ਬਾਅਦ ਪਹਿਲਾ ਕਦਮ ਨਵੇਂ ਮੰਤਰੀ ਮੰਡਲ ਦੇ ਗਠਨ ਦਾ ਹੀ ਹੋਵੇਗਾ।

ਪ੍ਰੀਮੀਅਰ ਦੇ ਦਫ਼ਤਰ ਨੇ ਦੱਸਿਆ ਕਿ ਈਬੀ ਦੀ ਤਬਦੀਲੀ ਟੀਮ 18 ਨਵੰਬਰ ਤੱਕ ਕੈਬਨਿਟ ਮੰਤਰੀਆਂ ਦੀ ਸਿਲੈਕਸ਼ਨ ਬਾਰੇ ਸਿਫਾਰਸ਼ਾਂ ਸੌਂਪ ਦੇਵੇਗੀ। ਰਵੀ ਕਾਹਲੋਂ ਅਤੇ ਜਨਤਕ ਸੁਰੱਖਿਆ ਮੰਤਰੀ ਰਹੇ ਮਾਈਕ ਫਾਰਨਵਰਥ ਦੇ ਫਿਰ ਤੋਂ ਮੰਤਰੀ ਬਣਨ ਦੀ ਉਮੀਦ ਕੀਤੀ ਜਾ ਰਹੀ ਹੈ। ਪ੍ਰੀਮੀਅਰ ਦੇ ਦਫ਼ਤਰ ਮੁਤਾਬਕ, ਮੰਤਰੀ ਮੰਡਲ ਤੋਂ ਪਹਿਲਾਂ ਸਾਰੇ ਹੋਰ ਵਿਧਾਇਕਾਂ ਨੂੰ 12 ਅਤੇ 13 ਨਵੰਬਰ ਨੂੰ ਸਹੁੰ ਚੁਕਾ ਦਿੱਤੀ ਜਾਵੇਗੀ।