ਬੀ.ਸੀ. ਦੇ ਪਬਲਿਕ ਸਰਵਿਸ ਵਰਕਰਜ਼ ਨੇ ਸੁਧਾਰਾਤਮਕ ਸਹੂਲਤਾਂ ਲਈ ਵਧਾਈ ਹੜਤਾਲ਼

ਬੀ. ਸੀ. ਦੇ ਪਬਲਿਕ ਸਰਵਿਸ ਵਰਕਰਜ਼ ਨੇ ਆਪਣੀ ਹੜਤਾਲ ਦੀ ਕਾਰਵਾਈ ਨੂੰ ਸੂਬੇ ਭਰ ਦੀਆਂ ਜੇਲ੍ਹਾਂ ਵਿਚ ਕੰਮ ਕਰਨ ਵਾਲੇ ਕਰਮਚਾਰੀਆਂ ਤੱਕ ਵਧਾ ਦਿੱਤਾ ਹੈ। ਯੂਨੀਅਨ ਨੇ ਕਿਹਾ ਕਿ ਸੁਧਾਰ ਸਹੂਲਤਾਂ ਦੇ ਹੁਣ ਸਾਰੇ ਕਰਮਚਾਰੀ ਹੜਤਾਲ 'ਤੇ ਹਨ।

ਬੀ.ਸੀ. ਜਨਰਲ ਇੰਪਲਾਈਜ਼ ਯੂਨੀਅਨ ਦਾ ਕਹਿਣਾ ਹੈ ਕਿ ਇਸ ਵਾਧੇ ਨਾਲ ਧਰਨੇ ਵਾਲੀਆਂ ਵਰਕਸਾਈਟਸ ਦੀ ਕੁੱਲ ਗਿਣਤੀ 470 ਤੋਂ ਵੱਧ ਹੋ ਗਈ ਹੈ, ਜਿਸ ਵਿਚ ਲਗਭਗ 25,000 ਵਰਕਰਜ਼ 20 ਮੰਤਰਾਲਿਆਂ, ਕਰਾਊਨ ਕਾਰਪੋਰੇਸ਼ਨਸ ਅਤੇ ਏਜੰਸੀਆਂ ਵਿਚ ਹੜਤਾਲ ਕਰ ਰਹੇ ਹਨ।

ਯੂਨੀਅਨ ਦੇ ਪ੍ਰਧਾਨ ਪਾਲ ਫਿੰਚ ਨੇ ਕਿਹਾ ਕਿ ਹੱਲ ਦਾ ਰਸਤਾ ਸਰਕਾਰ ਦੇ ਹੱਥ ਵਿਚ ਹੈ, ਉਨ੍ਹਾਂ ਕਿਹਾ ਕਿ ਗੱਲਬਾਤ ਸਰਕਾਰ ਵਲੋਂ ਰੁਕੀ ਹੋਈ ਹੈ। ਉਥੇ ਹੀ, ਸਰਕਾਰ ਦਾ ਕਹਿਣਾ ਹੈ ਕਿ ਉਸ ਦਾ ਪਿਛਲਾ ਪ੍ਰਸਤਾਵ ਬਿਲਕੁਲ ਨਿਰਪੱਖ ਸੀ, ਜਿਸ ਵਿਚ ਕਰਮਚਾਰੀਆਂ ਦੀਆਂ ਜ਼ਰੂਰਤਾਂ ਅਤੇ ਸੂਬੇ ਦੀ ਵਿੱਤੀ ਸਥਿਤੀ ਨੂੰ ਬੈਲੰਸ ਕੀਤਾ ਗਿਆ ਸੀ।

ਗੌਰਤਲਬ ਹੈ ਕਿ ਸਰਕਾਰੀ ਕਾਮਿਆਂ ਦੀ ਹੜਤਾਲ ਆਪਣੇ ਛੇਵੇਂ ਹਫ਼ਤੇ ਵਿਚ ਹੈ। ਹਜ਼ਾਰਾਂ ਹੋਰ ਕਾਮਿਆਂ ਦੇ ਹੜਤਾਲ ਵਿਚ ਸ਼ਾਮਲ ਹੋਣ ਨਾਲ ਆਉਣ ਵਾਲੇ ਦਿਨਾਂ ਵਿਚ ਸਰਕਾਰੀ ਸੇਵਾਵਾਂ 'ਤੇ ਮਹੱਤਵਪੂਰਨ ਪ੍ਰਭਾਵ ਪੈਣ ਦੀ ਸੰਭਾਵਨਾ ਹੈ।