ਕੈਨੇਡਾ 'ਚ ਟਰੱਕ ਡਰਾਈਵਰਾਂ 'ਤੇ ਸਰਕਾਰ ਸਖ਼ਤ, ਲਾਗੂ ਕੀਤਾ ਨਵਾਂ ਨਿਯਮ

ਬੀ.ਸੀ. ਸਰਕਾਰ ਵਲੋਂ ਓਵਰਪਾਸ ਨਾਲ ਟਕਰਾਉਣ ਵਾਲੇ ਵਪਾਰਕ ਟਰੱਕ ਡਰਾਈਵਰ ਲਈ ਭਾਰੀ ਜੁਰਮਾਨੇ ਅਤੇ ਜੇਲ੍ਹ ਦੀ ਸਜ਼ਾ ਦਾ ਐਲਾਨ ਕੀਤਾ ਗਿਆ ਹੈ।

ਲੋਅਰ ਮੇਨਲੈਂਡ ਵਿਚ ਪਿਛਲੇ 2 ਸਾਲਾਂ ਵਿਚ ਲਗਭਗ 3 ਦਰਜਨ ਦੇ ਕਰੀਬ ਹੋਏ ਹਾਦਸਿਆਂ ਦਾ ਹਵਾਲਾ ਦਿੰਦੇ ਹੋਏ ਸੂਬੇ ਵਲੋਂ ਉਲੰਘਣਾਵਾਂ ਲਈ ਦੋਸ਼ੀ ਠਹਿਰਾਏ ਜਾਣ ’ਤੇ $100,000 ਤੱਕ ਦੇ ਜੁਰਮਾਨੇ ਅਤੇ 18 ਮਹੀਨਿਆਂ ਤੱਕ ਦੀ ਕੈਦ ਦਾ ਪ੍ਰਸਤਾਵ ਵੀ ਦਿੱਤਾ ਗਿਆ ਹੈ।

ਇਹ ਕਦਮ ਉਦੋਂ ਚੁੱਕਿਆ ਜਾ ਰਿਹਾ ਹੈ ਜਦੋਂ ਬੀ.ਸੀ. ਸਰਕਾਰ ਨੇ ਦਸੰਬਰ ਵਿਚ ਮੌਜੂਦਾ ਕਾਨੂੰਨ ਦੇ ਤਹਿਤ ਮਨਜ਼ੂਰ ਕੀਤੇ ਗਏ ਸਭ ਤੋਂ ਵੱਧ ਜੁਰਮਾਨੇ ਨੂੰ 100 ਡਾਲਰ ਤੋਂ ਵਧਾ ਕੇ 500 ਡਾਲਰ ਕਰ ਦਿੱਤਾ ਸੀ।

ਆਵਾਜਾਈ ਅਤੇ ਬੁਨਿਆਦੀ ਢਾਂਚੇ ਦੇ ਮੰਤਰੀ ਰੌਬ ਫਲੇਮਿੰਗ ਅਨੁਸਾਰ ਇਹ ਹਾਦਸੇ ਮਹੱਤਵਪੂਰਣ ਸੁਰੱਖਿਆ ਜੋਖਮ ਪੈਦਾ ਕਰਦੇ ਹਨ, ਸਪਲਾਈ ਚੇਨ ਅਤੇ ਯਾਤਰੀਆਂ ਨੂੰ ਪ੍ਰਭਾਵਿਤ ਕਰਦੇ ਹਨ ਅਤੇ ਨਤੀਜੇ ਵਜੋਂ ਲੱਖਾਂ ਡਾਲਰ ਦਾ ਨੁਕਸਾਨ ਹੁੰਦਾ ਹੈ।

ਸੂਬੇ ਅਨੁਸਾਰ 2.3. ਵਿੱਚ ਹਾਈਵੇਅ ਦੇ ਬੁਨਿਆਦੀ ਢਾਂਚੇ ਦੇ ਹਾਦਸਿਆਂ ਸੰਬੰਧੀ ਕਾਨੂੰਨ 1970 ਦੇ ਦਹਾਕੇ ਤੋਂ ਨਹੀਂ ਬਦਲੇ ਹਨ। ਜ਼ਿਕਰਯੋਗ ਹੈ ਕਿ 2021 ਤੋਂ ਬੀ.ਸੀ. ਵਿੱਚ ਵੱਧ ਉਚਾਈ ਵਾਲੇ ਵਪਾਰਕ ਵਾਹਨਾਂ ਵਲੋਂ 35 ਹਾਦਸੇ ਕੀਤੇ ਗਏ ਹਨ।