ਬੀ. ਸੀ. ਸਰਕਾਰ ਨੇ ਅਮਰੀਕਾ ਨੂੰ ਦਿੱਤਾ ਝਟਕਾ, ਪੈਟਰੋਲ ਅਤੇ ਡੀਜ਼ਲ ਵਿਚ ਬਾਇਓਫਿਊਲ ਨੂੰ ਲੈ ਕੇ ਕੀਤਾ ਬਦਲਾਅ

ਬੀ. ਸੀ. ਸਰਕਾਰ ਨੇ ਅਮਰੀਕਾ ਨੂੰ ਝਟਕਾ ਦਿੰਦੇ ਹੋਏ ਸੂਬੇ ਵਿਚ ਪੈਟਰੋਲ ਅਤੇ ਡੀਜ਼ਲ ਵਿਚ ਬਾਇਓਫਿਊਲ ਮਿਲਾਉਣ ਦੀ ਘੱਟੋ-ਘੱਟ ਜ਼ਰੂਰਤ ਲਈ ਇਹ ਲਾਜ਼ਮੀ ਕਰ ਦਿੱਤਾ ਹੈ ਕਿ ਇਹ ਕੈਨੇਡਾ ਵਿੱਚ ਬਣਿਆ ਬਾਲਣ ਹੀ ਹੋਵੇ। ਸੂਬੇ ਦੇ ਊਰਜਾ ਮੰਤਰੀ ਐਡਰੀਅਨ ਡਿਕਸ ਦਾ ਕਹਿਣਾ ਹੈ ਕਿ ਪੈਟਰੋਲ ਵਿਚ 5 ਫੀਸਦੀ ਬਾਇਓਫਿਊਲ ਮਿਲਾਉਣ ਦੀ ਜ਼ਰੂਰਤ 1 ਜਨਵਰੀ 2026 ਤੋਂ ਕੈਨੇਡੀਅਨ-ਮੇਡ ਬਾਇਓਫਿਊਲ ਨਾਲ ਹੀ ਪੂਰੀ ਕੀਤੀ ਜਾਵੇਗੀ।

ਇਸ ਦੇ ਨਾਲ ਹੀ ਸੂਬਾ ਸਰਕਾਰ ਨੇ ਡੀਜ਼ਲ ਲਈ ਬਾਇਓਫਿਊਲ ਦੀ ਘੱਟੋ-ਘੱਟ ਜ਼ਰੂਰਤ ਤੁਰੰਤ 4 ਫੀਸਦੀ ਤੋਂ ਵਧਾ ਕੇ 8 ਫੀਸਦੀ ਕਰ ਦਿੱਤੀ ਹੈ ਅਤੇ 1 ਅਪ੍ਰੈਲ ਤੋਂ ਇਸ ਦੀ ਪੂਰਤੀ ਕੈਨੇਡੀਅਨ-ਮੇਡ ਬਾਇਓਫਿਊਲ ਨਾਲ ਕਰਨ ਦੇ ਹੁਕਮ ਦਿੱਤੇ ਗਏ ਹਨ।

ਡਿਕਸ ਨੇ ਕਿਹਾ ਕਿ ਅਮਰੀਕਾ ਕੈਨੇਡਾ ਵਿਚ ਸਪਲਾਈ ਲਈ ਆਪਣੀ ਬਾਇਓਫਿਊਲ ਉਦਯੋਗ ਨੂੰ ਇਸ ਹੱਦ ਤੱਕ ਸਬਸਿਡੀਆਂ ਦੇ ਰਿਹਾ ਹੈ ਕਿ ਇਸ ਨੇ ਬੀ. ਸੀ. ਅਤੇ ਕੈਨੇਡਾ ਦੀ ਇੰਡਸਟਰੀ ਨੂੰ ਵੱਡੇ ਪੱਧਰ 'ਤੇ ਪ੍ਰਭਾਵਿਤ ਕੀਤਾ ਹੈ। ਮਿਨਿਸਟਰ ਨੇ ਕਿਹਾ ਕਿ ਇਸ ਤਰ੍ਹਾਂ ਦੀਆਂ ਅਣਉਚਿਤ ਵਪਾਰਕ ਅਭਿਆਸ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾ ਸਕਦੀ। ਉਨ੍ਹਾਂ ਕਿਹਾ ਕਿ ਕੈਨੇਡੀਅਨ ਕੰਪਨੀਆਂ ਵੱਲੋਂ ਬਾਇਓਫਿਊਲ ਪੈਦਾ ਕਰਨ ਨਾਲ ਲੋਕਾਂ ਨੂੰ ਲੰਬੇ ਸਮੇਂ ਵਿਚ ਇਸ ਦਾ ਫਾਇਦਾ ਹੋਵੇਗਾ ਕਿਉਂਕਿ ਦੇਸ਼ ਦੇ ਹਰ ਖੇਤਰ ਵਿਚ ਇਸ ਦੀ ਜ਼ਰੂਰਤ ਹੈ।