11.82C Vancouver 11.82C VancouverJan 4, 2022 11:37 PM - Connect News
ਡੈਲਟਾ ਪੁਲਿਸ ਨੇ ਇੱਕ ਟਵੀਟ ਆਸਰੇ ਜਾਣਕਾਰੀ ਦਿੱਤੀ ਹੈ ਕਿ ਇਲਾਕੇ 'ਚ ਚਾਕੂ ਚੱਲਣ ਦੀ ਵਾਰਦਾਤ ਦੇ ਮਾਮਲੇ 'ਚ ਇੱਕ ਯੁਵਕ 'ਤੇ ਦੋਸ਼ ਲੱਗੇ ਹਨ।
ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਵਿਅਕਤੀ ਦੀ ਪਛਾਣ 19 ਸਾਲਾ ਬਲਰਾਜ ਨਿੱਜਰ ਵਜੋਂ ਹੋਈ ਹੈ।
ਘਟਨਾ ਸਾਲ 2021 'ਚ 11 ਜੁਲਾਈ ਨੂੰ ਤੜਕੇ ਕਰੀਬ 4 ਵਜੇ ਵਾਪਰੀ ਸੀ।
ਨੌਰਥ ਡੈਲਟਾ 'ਚ ਪੁਲਿਸ ਨੂੰ ਗੰਡਰਸਨ ਪਾਰਕ 'ਚ ਸੱਦਿਆ ਗਿਆ ਸੀ।
ਅਫ਼ਸਰਾਂ ਨੂੰ ਮੌਕੇ 'ਤੇ 2 ਪੀੜਤ ਵਿਅਕਤੀ ਮਿਲੇ ਸਨ ਜਿੰਨਾ 'ਤੇ ਚਾਕੂ ਨਾਲ ਹਮਲਾ ਹੋਇਆ ਸੀ।
ਦੋਵਾਂ ਨੂੰ ਗੰਭੀਰ ਸੱਟਾਂ ਲੱਗੀਆਂ ਸਨ।
ਅੱਜ ਪੁਲਿਸ ਨੇ ਜਾਣਕਾਰੀ ਦਿੱਤੀ ਕਿ ਕਰਾਊਨ ਕਾਉਂਸਲ ਨੇ 17 ਦਿਸੰਬਰ ਨੂੰ ਨਿੱਜਰ ਖਿਲਾਫ ਖਤਰਨਾਕ ਹਮਲੇ ਦੇ 2 ਦੋਸ਼ ਮਨਜ਼ੂਰ ਕਰ ਲਏ ਹਨ। ਡੈਲਟਾ ਦੇ ਬਲਰਾਜ ਨਿੱਜਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਸੀ ਅਤੇ ਉਸ ਦੀ ਕੋਰਟ 'ਚ ਪਹਿਲੀ ਪੇਸ਼ੀ ਹੋ ਚੁੱਕੀ ਹੈ।
ਸਟਾਫ਼ ਸਾਰਜੈਂਟ ਡੇਵਿਡ ਵੌਨ ਸਮਿਥ ਨੇ ਕਿਹਾ ਕਿ ਘਟਨਾ ਇੱਕੋ ਦੂਜੇ ਨੂੰ ਜਾਣਦੇ ਲੋਕਾਂ ਵਿਚਾਲੇ ਵਾਪਰੀ ਸੀ ਅਤੇ ਇਹ ਕੋਈ ਰੈਂਡਮ ਹਮਲਾ ਨਹੀਂ ਸੀ।
ਹਾਲਾਂਕਿ ਇਸ ਘਟਨਾ ਨੂੰ ਲੋਅਰ ਮੇਨਲੈਂਡ ਦੀ ਗੈਂਗ ਹਿੰਸਾ ਨਾਲ ਸੰਬੰਧਤ ਨਹੀਂ ਦੱਸਿਆ ਗਿਆ ਹੈ।
ਨਿੱਜਰ ਨੂੰ ਕੁਝ ਸ਼ਰਤਾਂ 'ਤੇ ਰਿਹਾਅ ਕਰ ਦਿੱਤਾ ਗਿਆ ਹੈ ਅਤੇ ਉਸ ਦੀ ਅਗਲੀ ਪੇਸ਼ੀ ਜਨਵਰੀ ਦੇ ਅੰਤ 'ਚ ਹੋਣੀ ਹੈ।
