ਬੈਂਕ ਆਫ਼ ਕੈਨੇਡਾ ਵਲੋਂ ਵਿਆਜ ਦਰਾਂ ਵਿਚ ਕਟੌਤੀ

ਕੈਨੇਡੀਅਨਾਂ ਲਈ ਰਾਹਤ ਦੀ ਖ਼ਬਰ ਹੈ, ਬੈਂਕ ਆਫ਼ ਕੈਨੇਡਾ ਵਲੋਂ ਬੁੱਧਵਾਰ ਨੂੰ ਇੰਟਰਸਟ ਰੇਟ ਵਿਚ 0.25 ਫੀਸਦੀ ਦੀ ਕਟੌਤੀ ਕੀਤੀ ਗਈ ਹੈ, ਜਿਸ ਨਾਲ ਸੈਂਟਰਲ ਬੈਂਕ ਦੀ ਪ੍ਰਮੁੱਖ ਦਰ 3.25 ਤੋਂ ਘੱਟ 3 ਫੀਸਦੀ 'ਤੇ ਆ ਗਈ ਹੈ। ਵਿਆਜ ਦਰਾਂ ਵਿਚ ਇਹ ਲਗਾਤਾਰ 6ਵੀਂ ਕਟੌਤੀ ਹੈ।

ਦਰਅਸਲ,ਅਮਰੀਕਾ ਦੇ ਸੰਭਾਵਿਤ ਟੈਰਿਫ ਕਾਰਨ ਬੈਂਕ ਆਫ਼ ਕੈਨੇਡਾ ਨੇ ਇਹ ਤਾਜ਼ਾ ਕਦਮ ਚੁੱਕਿਆ ਹੈ ਕਿਉਂਕਿ ਟੈਰਿਫ ਨਾਲ ਅਰਥਵਿਵਸਥਾ ਨੂੰ ਨੁਕਸਾਨ ਹੋਣ ਦਾ ਖ਼ਦਸ਼ਾ ਹੈ ਅਤੇ ਸੈਂਟਰਲ ਬੈਂਕ ਮਹਿੰਗਾਈ ਨੂੰ ਕੰਟਰੋਲ ਕਰਨ ਤੋਂ ਬਾਅਦ ਆਰਥਿਕਤਾ ਨੂੰ ਸੰਭਾਲਣ 'ਤੇ ਫੋਕਸ ਕਰ ਰਿਹਾ ਹੈ।

ਅਕਤੂਬਰ ਅਤੇ ਦਸੰਬਰ ਦੀਆਂ ਪਿਛਲੀਆਂ ਦੋ ਬੈਠਕਾਂ ਵਿਚ ਬੈਂਕ ਆਫ਼ ਕੈਨੇਡਾ ਨੇ ਇੰਟਰਸਟ ਰੇਟ ਵਿਚ ਦੋਵੇਂ ਵਾਰ 0.50 ਫੀਸਦੀ ਦੀ ਵੱਡੀ ਕਟੌਤੀ ਕੀਤੀ ਸੀ ਅਤੇ ਗਵਰਨਰ ਟਿਫ ਮੈਕਲੇਮ ਨੇ ਪਿਛਲੇ ਮਹੀਨੇ ਕਿਹਾ ਸੀ ਕਿ ਬੈਂਕ ਸੰਭਾਵਤ ਤੌਰ 'ਤੇ ਅੱਗੇ ਜਾ ਕੇ ਕਟੌਤੀ ਦੀ ਗਤੀ ਨੂੰ ਹੌਲੀ ਕਰ ਦੇਵੇਗਾ ਪਰ ਟਰੰਪ ਦੇ ਟੈਰਿਫਸ ਨੂੰ ਲੈ ਕੇ ਬਣੀ ਅਨਿਸ਼ਚਿਤਤਾ ਨੇ ਬੈਂਕ ਦੀ ਰਣਨੀਤੀ ਨੂੰ ਪ੍ਰਭਾਵਿਤ ਕੀਤਾ ਹੈ।