12.61C Vancouver 12.61C VancouverOct 23, 2024 4:47 PM - The Canadian Press
ਕੈਨੇਡੀਅਨਾਂ ਨੂੰ ਬੈਂਕ ਆਫ਼ ਕੈਨੇਡਾ ਵਲੋਂ ਵੱਡੀ ਰਾਹਤ ਦਿੱਤੀ ਗਈ ਹੈ। ਸੈਂਟਰਲ ਬੈਂਕ ਨੇ ਇੰਟਰਸਟ ਰੇਟ ਵਿਚ 0.50 ਫੀਸਦੀ ਦੀ ਵੱਡੀ ਕਟੌਤੀ ਕਰ ਦਿੱਤੀ ਹੈ, ਜਿਸ ਨਾਲ ਇਸ ਦਾ ਪ੍ਰਮੁੱਖ ਪਾਲਿਸੀ ਰੇਟ 3.75 ਫੀਸਦੀ ’ਤੇ ਆ ਗਿਆ ਹੈ। ਇਹ ਲਗਾਤਾਰ ਚੌਥਾ ਰੇਟ ਕੱਟ ਅਤੇ 2009 ਦੇ ਗਲੋਬਲ ਵਿੱਤੀ ਸੰਕਟ ਤੋਂ ਬਾਅਦ ਵਿਆਜ ਦਰਾਂ ਵਿਚ ਸਭ ਤੋਂ ਵੱਡੀ ਕਟੌਤੀ ਹੈ।
ਗੌਰਤਲਬ ਹੈ ਕਿ ਸੈਂਟਰਲ ਬੈਂਕ ਨੇ ਮਹਿੰਗਾਈ ਦਰ ਨੂੰ ਆਪਣੇ ਦੋ ਫੀਸਦੀ ਦੇ ਟੀਚੇ ਤੱਕ ਲਿਆਉਣ ਲਈ ਮਾਰਚ 2022 ਅਤੇ ਪਿਛਲੀਆਂ ਗਰਮੀਆਂ ਦਰਮਿਆਨ 10 ਵਾਰ ਵਿਆਜ ਦਰਾਂ ਵਿਚ ਵਾਧਾ ਕੀਤਾ ਸੀ ਪਰ ਹੁਣ ਕਿਉਂਕਿ ਅਰਥਵਿਵਸਥਾ ਹੌਲੀ ਹੋ ਗਈ ਹੈ ਅਤੇ ਮਹਿੰਗਾਈ ਦਰ ਦੋ ਫੀਸਦੀ ਤੋਂ ਵੀ ਹੇਠਾਂ ਵੱਲ ਜਾ ਰਹੀ ਹੈ ਤਾਂ ਬੈਂਕ ਵਿਆਜ ਦਰਾਂ ਵਿਚ ਕਟੌਤੀ ਕਰਕੇ ਆਰਥਿਕਤਾ ਨੂੰ ਤੇਜ਼ੀ ਦੇਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।
ਵਿੱਤੀ ਬਾਜ਼ਾਰ ਦਾ ਮੰਨਣਾ ਹੈ ਕਿ ਬੈਂਕ ਆਫ਼ ਕੈਨੇਡਾ ਦਾ ਪ੍ਰਮੁੱਖ ਪਾਲਿਸੀ ਰੇਟ ਅਗਲੇ ਸਾਲ ਦੇ ਅਖੀਰ ਤੱਕ ਘੱਟ ਕੇ 2.5 ਫੀਸਦੀ ਦੇ ਆਸਪਾਸ ਆ ਜਾਵੇਗਾ। ਗਵਰਨਰ ਟਿਫ ਮੈਕਲੇਮ ਅਤੇ ਉਨ੍ਹਾਂ ਦੀ ਟੀਮ ਦਾ ਫੋਕਸ ਹੁਣ ਆਰਥਿਕ ਵਿਕਾਸ ’ਤੇ ਹੈ।
