12.24C Vancouver 12.24C VancouverMar 11, 2025 6:45 PM - Connect Newsroom
ਬੀ.ਸੀ. ਕੰਜ਼ਰਵੇਟਿਵ ਵਿਚ ਰਿਹਾਇਸ਼ੀ ਸਕੂਲਾਂ ਨੂੰ ਲੈ ਕੇ ਮਚੇ ਘਮਾਸਾਨ ਵਿਚਕਾਰ ਜੌਨ ਰਸਟੈਡ ਦੀ ਲੀਡਰਸ਼ਿਪ ਖ਼ਤਰੇ ਵਿਚ ਪੈ ਸਕਦੀ ਹੈ। ਪਾਰਟੀ ਇਸ ਫਾਲ ਵਿਚ ਲੀਡਰਸ਼ਿਪ ਰਿਵਿਊ ਕਰਨ ਵਾਲੀ ਹੈ ਅਤੇ ਕੰਜ਼ਰਵੇਟਿਵ ਰਣਨੀਤੀਕਾਰ ਐਲੀ ਬਲੇਡਜ਼ ਦਾ ਕਹਿਣਾ ਹੈ ਕਿ ਪਿਛਲੇ ਕੁਝ ਹਫ਼ਤਿਆਂ ਤੋਂ ਪਾਰਟੀ ਅੰਦਰ ਜੋ ਘਟਨਾਵਾਂ ਘਟੀਆਂ ਹਨ ਉਹ ਰਸਟੈਡ ਦੀ ਲੀਡਰਸ਼ਿਪ ਲਈ ਪ੍ਰੀਖਿਆ ਹੋਵੇਗੀ।
ਹੁਣ ਤੱਕ ਪਾਰਟੀ ਵਿਚ ਫੁੱਟ ਕਾਰਨ ਤਿੰਨ ਐਮ.ਐਲ.ਏ. ਸੂਬੇ ਦੀ ਵਿਧਾਨ ਸਭਾ ਵਿਚ ਆਜ਼ਾਦ ਬੈਠਣ ਦਾ ਫੈਸਲਾ ਕਰ ਚੁੱਕੇ ਹਨ। ਇਹ ਵਿਵਾਦ ਫਰਵਰੀ ਵਿਚ ਵੈਨਕੂਵਰ-ਕੁਇਲਚੇਨਾ ਦੀ ਵਿਧਾਇਕ ਡੱਲਾਸ ਬਰੋਡੀ ਵਲੋਂ ਕਮਲੂਪਸ ਦੇ ਸਾਬਕਾ ਰਿਹਾਇਸ਼ੀ ਸਕੂਲ ਸਾਈਟ ਨੂੰ ਲੈ ਕੇ ਕੀਤੀ ਗਈ ਇਤਰਾਜ਼ਯੋਗ ਟਿੱਪਣੀ ਤੋਂ ਬਾਅਦ ਛਿੜਿਆ ਸੀ।
ਰਸਟੈਡ ਦਾ ਕਹਿਣਾ ਹੈ ਕਿ ਹੋ ਸਕਦਾ ਹੈ ਕਿ ਉਨ੍ਹਾਂ ਦੇ ਕਾਕਸ ਦੇ ਹੋਰ ਮੈਂਬਰ ਪਾਰਟੀ ਛੱਡਣ ਦਾ ਫੈਸਲਾ ਕਰ ਲੈਣ ਪਰ ਪਾਰਟੀ ਦਾ ਫੋਕਸ ਹਾਊਸਿੰਗ ਦੀ ਸਮਰੱਥਾ ਅਤੇ ਡਰੱਗ ਸੰਕਟ ਵਰਗੇ ਮੁੱਦਿਆਂ 'ਤੇ ਐੱਨ. ਡੀ. ਪੀ. ਨੂੰ ਜਵਾਬਦੇਹ ਠਹਿਰਾਉਣ 'ਤੇ ਹੈ।
ਉਨ੍ਹਾਂ ਕਿਹਾ ਕਿ ਮੈਂ ਚਾਹੁੰਦਾ ਸੀ ਕਿ ਕਾਕਸ ਵਿਚ ਸ਼ਾਮਲ 44 ਐਮ.ਐਲ.ਏ ਪਾਰਟੀ ਦੇ ਨਾਲ ਸਹੀ ਦਿਸ਼ਾ ਵਿਚ ਅੱਗੇ ਵਧਣ ਪਰ ਤਿੰਨ ਵਿਧਾਇਕਾਂ ਨੂੰ ਲੱਗਾ ਕਿ ਉਹ ਇਸ ਦਾ ਹਿੱਸਾ ਨਹੀਂ ਰਹਿ ਸਕਦੇ ਜੋ ਕਿ ਮੰਦਭਾਗਾ ਹੈ।
