ਸਿਹਤ ਸੰਬੰਧੀ ਲਗਾਈਆਂ ਪਬੰਧੀਆਂ ਬੀ.ਸੀ. 'ਚ ਕੋਰੋਨਾਵਾਇਰਸ ਨੂੰ ਫੈਲਣ ਤੋਂ ਰੋਕਣ 'ਚ ਸਾਬਿਤ ਹੋ ਰਹੀਆਂ ਮਦਦਗਾਰ

ਕੋਵਿਡ-19 ਦੇ ਪੀੜਤਾਂ ਦੀ ਵੱਡੀ ਗਿਣਤੀ ਨੂੰ ਮੈਡੀਕਲ ਦੇਖਭਾਲ ਦੇਣ ਲਈ ਬੀ.ਸੀ.ਦੇ ਹੈਲਥ ਕੇਅਰ ਸਿਸਟਮ ਦੀ ਸਮਰੱਥਾ ਬਾਰੇ ਸੂਬੇ ਦੇ ਸਿਹਤ ਅਧਿਕਾਰੀਆਂ ਨੇ ਜਾਣਕਾਰੀ ਜਾਰੀ ਕੀਤੀ ਹੈ।

ਸਿਹਤ ਅਧਿਕਾਰੀਆਂ ਨੇ ਦੱਸਿਆ ਕਿ ਬੀ.ਸੀ. ਦੇ ਸਾਰੇ ਹਸਪਤਾਲ, ਕੋਵਿਡ-19 ਦੇ ਪੀੜਤਾਂ ਦੀ ਦੇਖਭਾਲ ਕਰ ਸਕਦੇ ਹਨ ਅਤੇ ਸਤਾਰਾਂ (17) ਹਸਪਤਾਲਾਂ ਨੂੰ ਪ੍ਰਾਈਮਰੀ ਕੇਅਰ ਸਾਈਟ (primary care site) ਵਜੋਂ ਵਰਤਿਆ ਜਾਵੇਗਾ।

ਵਿਕਟੋਰੀਆ ਵਿੱਚ ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਹੈਲਥ ਮਨਿਸਟਰ ਐਡਰੀਅਨ ਡਿਕਸ (Adrian Dix) ਨੇ ਦੱਸਿਆ ਕਿ ਬੀ.ਸੀ. ਵਿੱਚ ਜੇਕਰ ਨੌਰਥ ਇਟਲੀ (North Italy) ਜਿਹੇ ਖਰਾਬ ਹਾਲਾਤ ਬਣਦੇ ਹਨ ਤਾਂ ਬੀ.ਸੀ. ਦੇ ਸਾਰੇ ਹਸਪਤਾਲਾਂ ਦੀ ਵਰਤੋਂ ਕਰਨ ਦੀ ਜ਼ਰੂਰਤ ਹੋਵੇਗੀ ਅਤੇ ਜਿਨ੍ਹਾਂ ਮਰੀਜ਼ਾਂ ਨੂੰ ਘੱਟ ਗੰਭੀਰ ਡਾਕਟਰੀ ਦੇਖਭਾਲ ਦੀ ਲੋੜ ਹੋਵੇਗੀ, ਉਨ੍ਹਾਂ ਨੂੰ ਹਸਪਤਾਲਾਂ ਤੋਂ ਹੱਟ ਕੇ ਦੂਜੀਆਂ ਸਾਈਟਸ ਤੇ ਸ਼ਿਫਟ ਕਰਨਾ ਪਵੇਗਾ।

ਪਰ ਜੇਕਰ ਹਾਲਾਤ ਚਾਈਨਾ ਦੇ ਸੂਬੇ ਹੂਬੇ ਜਿਹੇ ਰਹਿੰਦੇ ਹਨ ਤਾਂ ਫਿਰ ਸਤਾਰਾਂ (17) ਪ੍ਰਾਈਮਰੀ ਕੇਅਰ ਸਾਈਟਸ (primary care sites) ਦੇ ICU ਅਤੇ ਵੈਂਟੀਲੇਟਰ ਸਮਰੱਥਾ ਕਾਫੀ ਹੋਵੇਗੀ।

ਮਨਿਸਟਰ ਡਿਕਸ ਨੇ ਦੱਸਿਆ ਕਿ ਫਿਲਹਾਲ ਬੀ.ਸੀ. ਵਿੱਚ 1,272 ਵੈਂਟੀਲੇਟਰ ਹਨ ਅਤੇ ਵਧੇਰੇ ਆਰਡਰ ਵੀ ਕਰ ਦਿੱਤੇ ਗਏ ਹਨ।

ਇਸ ਮੌਕੇ ਤੇ ਸੂਬੇ ਦੀ ਸਿਹਤ ਅਫਸਰ, ਡਾ. ਬੌਨੀ ਹੈਨਰੀ ਨੇ ਦੱਸਿਆ ਕਿ ਬੀ.ਸੀ. ਵਿੱਚ ਕੋਵਿਡ-19 ਦੇ ਪੀੜਤਾਂ ਦੀ ਗਿਣਤੀ ਵਿੱਚ ਵਾਧੇ ਦੀ ਰਫਤਾਰ ਉਮੀਦ ਤੋਂ ਘੱਟ ਹੈ ਅਤੇ ਜਨਤਕ ਸਿਹਤ ਲਈ ਲਾਈਆਂ ਗਈਆਂ ਪਾਬੰਦੀਆਂ ਮਦਦਗਾਰ ਸਾਬਤ ਹੋਈਆਂ ਹਨ, ਪਰ ਅਗਲੇ ਕੁਝ ਹਫਤੇ ਅਹਿਮ ਹਨ।