ਲਿਬਰਲਜ਼ ਦੇ ਖੇਤਰ ਤੋਂ ਚੋਣ ਪ੍ਰਚਾਰ ਕਰਦਿਆਂ ਜੌਨ ਹੌਰਗਨ ਨੇ ਖੇਤਰ ਵਿਚ ਸਕੂਲ ਬਣਾਉਣ ਦੀ ਆਖੀ ਗੱਲ

ਬੀ.ਸੀ. ਲਿਬਰਲ ਪਾਰਟੀ ਦੇ ਲੀਡਰ ਐਨਡਰਿਊ ਵਿਲਕਿਨਸਨ ਨੇ ਅੱਜ ਕੈਮਪਬੈਲ ਰੀਵਰ ਵਿੱਚ ਆਪਣੇ ਚੋਣ ਪ੍ਰਚਾਰ ਦੌਰਾਨ ਕਿਹਾ ਕਿ ਪ੍ਰੋਵਿੰਸ਼ੀਅਨ ਸੇਲਜ਼ ਟੈਕਸ (ਪੀ.ਐੱਸ.ਟੀ.) ਖਤਮ ਕਰਨ ਨਾਲ ਭਾਰੀ ਮਸ਼ੀਨਰੀ ਦੀ ਲਾਗਤ ਘਟੇਗੀ ਅਤੇ ਫੌਰੈਸਟ੍ਰੀ ਉਦਯੋਗ ਨੂੰ ਇਸ ਦਾ ਫਾਇਦਾ ਹੋਵੇਗਾ।

ਸਟ੍ਰੈਥਕੋਨਾ ਪਾਰਕ ਟੈਂਟ ਸਿਟੀ ਅਤੇ ਸਟ੍ਰੀਟ ਕ੍ਰਾਈਮਜ਼ ਦੇ ਬਾਰੇ ਗੱਲ ਕਰਦਿਆਂ ਵਿਲਕਿਨਸਨ ਨੇ ਕਿਹਾ ਕਿ ਇਹ ਸਥਿਤੀ ਐੱਨ.ਡੀ.ਪੀ. ਸਰਕਾਰ ਦੇ ਕਾਰਜਕਾਲ ਦੌਰਾਨ ਬਦਤਰ ਹੋਈ ਹੈ ਅਤੇ ਇਹ ਸਵੀਕਾਰਨਯੋਗ ਨਹੀਂ ਹੈ ਕਿ ਲੋਕ ਆਪਣੀ ਕਮਿਊਨਿਟੀ ਵਿੱਚ ਘੇਰਾ-ਬੰਦ ਮਹਿਸੂਸ ਕਰਨ।

ਦੂਜੇ ਪਾਸੇ ਬੀ.ਸੀ. ਐਨ.ਡੀ.ਪੀ. ਲੀਡਰ ਜੌਨ ਹੌਰਗਨ ਨੇ ਅੱਜ ਕੋਕੁਇਟਲੈਮ ਵਿੱਚ ਆਪਣੇ ਚੋਣ ਪ੍ਰਚਾਰ ਦੌਰਾਨ ਕਿਹਾ ਕੇ ਬੀ.ਸੀ. ਲਿਬਰਲ ਸਰਕਾਰ ਨੇ ਸਕੂਲਾਂ ਵਿੱਚ ਨਿਵੇਸ਼ ਕਰਨ ਦੇ ਬਜਾਏ , ਅਮੀਰ ਦਾਨੀਆਂ ਨੂੰ ਤਰਜੀਹ ਦਿੱਤੀ ਅਤੇ ਐਨਡਰਿਊ ਵਿਲਕਿਨਸਨ ਨੇ ਮਿਨਿਸਟਰ ਵਜੋਂ ਸਕੂਲਾਂ ਅਤੇ ਹਸਪਤਾਲਾਂ ਲਈ ਨਿਰਧਾਰਤ ਜ਼ਮੀਨ ਵੇਚੀ ਹੈ।

ਸਟ੍ਰੈਥਕੋਨਾ ਪਾਰਕ ਵਿੱਚ ਇਲਾਕੇ ਦੇ ਚਿੰਤਤ ਵਸਨੀਕਾਂ ਦੇ ਰੋਸ ਪ੍ਰਦਰਸ਼ਨ ਬਾਰੇ ਗੱਲ ਕਰਦਿਆਂ ਹੌਰਗਨ ਨੇ ਕਿਹਾ ਕਿ ਸੂਬੇ ਦੁਆਰਾ ਰਿਹਾਇਸ਼ੀ ਵਿਕਲਪਾਂ ਨੂੰ ਲੱਭਣ 'ਤੇ ਕੰਮ ਕੀਤਾ ਜਾ ਰਿਹਾ ਹੈ।