ਬੀ.ਸੀ. ਐਨ.ਡੀ.ਪੀ. ਪਾਰਟੀ ਨੇ ਜਾਰੀ ਕੀਤਾ ਆਪਣਾ ਇਲੈਕਸ਼ਨ ਪਲੈਟਫੋਰਮ

ਬੀ.ਸੀ. ਐਨ.ਡੀ.ਪੀ. ਨੇ 2020 ਦੀਆਂ ਚੋਣਾਂ ਲਈ ਆਪਣਾ ਪਲੈਟਫੋਰਮ ਜਾਰੀ ਕਰ ਦਿੱਤਾ ਹੈ।

ਇਸ ਪਲੇਟਫਾਰਮ ਦੇ ਵੇਰਵੇ ਸਾਂਝੇ ਕਰਦਿਆਂ, ਬੀ.ਸੀ. ਐਨ.ਡੀ.ਪੀ. ਲੀਡਰ ਜੌਨ ਹੌਰਗਨ ਨੇ ਦੱਸਿਆ ਕਿ ਇੱਕ ਲੱਖ ਪੱਚੀ ਹਜ਼ਾਰ ਡਾਲਰ ਤੋਂ ਘੱਟ ਸਾਲਾਨਾ ਆਮਦਨ ਵਾਲੇ ਪਰਿਵਾਰਾਂ ਨੂੰ ਮਹਾਂਮਾਰੀ ਸਹਾਇਤਾ ਦੇ ਰੂਪ ਵਿੱਚ, ਇੱਕ ਵਾਰ ਦੇ ਲਈ $1000 ਦਾ ਡਾਇਰੈਕਟ ਡੀਪੋਜ਼ਿਟ ਦਿੱਤਾ ਜਾਵੇਗਾ ਜਦੋਂਕਿ ਬਾਹਠ ਹਜ਼ਾਰ ਡਾਲਰ ਤੋਂ ਘੱਟ ਸਾਲਾਨਾ ਆਮਦਨੀ ਵਾਲੇ ਵਿਅਕਤੀਆਂ ਨੂੰ $500 ਦਿੱਤੇ ਜਾਣਗੇ।

ਹੌਰਗਨ ਨੇ ਦੱਸਿਆ ਕਿ ਬੀ.ਸੀ. ਦਾ ਦੂਜਾ ਮੈਡੀਕਲ ਸਕੂਲ ਬਣਾਇਆ ਜਾਵੇਗਾ, ਕੈਂਸਰ ਦੇ ਇਲਾਜ ਅਤੇ ਰੀਸਰਚ ਸੰਬੰਧੀ 10 ਸਾਲ ਦਾ ਐਕਸ਼ਨ ਪਲੈਨ ਸ਼ੁਰੂ ਕੀਤਾ ਜਾਵੇਗਾ, 2021 ਦੇ ਅੰਤ ਤੱਕ ਰੈਂਟ ਫਰੀਜ਼ ਕਰ ਦਿੱਤਾ ਜਾਵੇਗਾ, 12 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਟ੍ਰਾਂਜ਼ਿਟ ਮੁਫ਼ਤ ਕਰ ਦਿੱਤਾ ਜਾਵੇਗਾ ਅਤੇ $80,000 ਤੱਕ ਦੀ ਸਾਲਾਨਾ ਆਮਦਨੀ ਵਾਲੇ ਪਰਿਵਾਰਾਂ ਨੂੰ, $400 ਸਾਲਾਨਾ ਦਾ ਰੈਂਟਰਜ਼ ਰੀਬੇਟ ਦਿੱਤਾ ਜਾਵੇਗਾ।

ਹੌਰਗਨ ਨੇ ਦੱਸਿਆ ਕਿ ਆਰਥਿਕ ਬਿਹਤਰੀ ਦੇ ਲਈ, ਜੀ.ਡੀ.ਪੀ. ਦੇ 1% ਦੇ ਬਰਾਬਰ ਇਕ ਨਵਾਂ ਫੰਡ ਵੀ ਬਣਾਇਆ ਜਾਵੇਗਾ ਜਿਸ ਦੇ ਤਹਿਤ ਨਵੇਂ ਸਕੂਲ ਅਤੇ ਹਸਪਤਾਲ ਬਣਨਗੇ ਅਤੇ ਸਾਲਾਨਾ 18,000 ਨਵੀਆਂ ਨੌਕਰੀਆਂ ਪੈਦਾ ਹੋਣਗੀਆਂ।