ਬੀ.ਸੀ. ਪ੍ਰੀਮੀਅਰ ਨੇ ਟਰੰਪ ਦੇ ਪ੍ਰਸਤਾਵਿਤ ਟੈਰਿਫ ਵਿਰੁੱਧ ਫੈਡਰਲ ਯੋਜਨਾ ਦਾ ਕੀਤਾ ਸਮਰਥਨ

ਬੀ.ਸੀ. ਦੇ ਪ੍ਰੀਮੀਅਰ ਡੇਵਿਡ ਈਬੀ ਨੇ ਟਰੰਪ ਦੇ ਪ੍ਰਸਤਾਵਿਤ ਟੈਰਿਫ ਖਿਲਾਫ ਫੈਡਰਲ ਸਰਕਾਰ ਦੇ ਯੋਜਨਾ ਦਾ ਸਮਰਥਨ ਕਰਨ ਦੀ ਘੋਸ਼ਣਾ ਕੀਤੀ ਹੈ। ਇਸ ਯੋਜਨਾ ਤਹਿਤ ਕੈਨੇਡਾ ਵਲੋਂ ਅਮਰੀਕਾ ਨੂੰ ਮਹੱਤਵਪੂਰਨ ਵਸਤੂਆਂ ਦੀ ਕੀਤੀ ਜਾਂਦੀ ਸਪਲਾਈ ’ਤੇ ਸੰਭਾਵੀ ਨਿਰਯਾਤ ਟੈਕਸ ਜਾਂ ਟਾਰਗੇਟਡ ਨਿਰਯਾਤ ਪਾਬੰਦੀਆਂ ਲਗਾਉਣਾ ਸ਼ਾਮਲ ਹੈ।

ਈਬੀ ਨੇ ਕਿਹਾ ਕਿ ਪ੍ਰੀਮੀਅਰ ਅੰਤਰਰਾਜੀ ਵਪਾਰਕ ਰੁਕਾਵਟਾਂ ਨੂੰ ਸਮਾਪਤ ਕਰਨ ਅਤੇ ਅਮਰੀਕਾ ਤੋਂ ਇਲਾਵਾ ਹੋਰ ਦੇਸ਼ਾਂ ਨਾਲ ਵਪਾਰ ਸਾਂਝੇਦਾਰੀ ਵਧਾਉਣ ’ਤੇ ਵੀ ਇਕਮਤ ਹਨ। ਹਾਲਾਂਕਿ, ਇੱਕ ਪਾਸੇ ਜਿੱਥੇ ਸਾਰੇ ਪ੍ਰੀਮੀਅਰ ਟਰੰਪ ਦੇ ਟੈਰਿਫ ਖਿਲਾਫ ਅਮਰੀਕਾ ਨੂੰ ਕੁਝ ਮਹੱਤਵਪੂਰਨ ਵਸਤੂਆਂ ਦਾ ਨਿਰਯਾਤ ਬੰਦ ਕਰਨ ਲਈ ਇਕਜੁੱਟ ਹਨ, ਉਥੇ ਹੀ ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਫੈਡਰਲ ਯੋਜਨਾ ਨੂੰ ਸਹਿਮਤੀ ਦੇਣ ਤੋਂ ਇਨਕਾਰ ਕਰ ਦਿੱਤਾ।

ਸਮਿਥ ਨੇ ਕਿਹਾ ਕਿ ਐਲਬਰਟਾ ਆਪਣੇ ਤੇਲ, ਗੈਸ ਅਤੇ ਹੋਰ ਉਤਪਾਦ ’ਤੇ ਨਿਰਯਾਤ ਟੈਰਿਫ ਲਗਾਉਣ ਲਈ ਸਹਿਮਤ ਨਹੀਂ ਹੋ ਸਕਦਾ ਅਤੇ ਨਾ ਹੀ ਸੂਬਾ ਇਨ੍ਹਾਂ ਦਾ ਅਮਰੀਕਾ ਨੂੰ ਨਿਰਯਾਤ ਰੋਕਣ ਦਾ ਸਮਰਥਨ ਕਰਦਾ ਹੈ। ਗੌਰਤਲਬ ਹੈ ਕਿ ਐਲਬਰਟਾ ਕੈਨੇਡਾ ਦਾ ਮੁੱਖ ਤੇਲ ਉਤਪਾਦਕ ਸੂਬਾ ਹੈ ਅਤੇ ਇਸ ਦੇ ਰੈਵੇਨਿਊ ਦਾ ਵੱਡਾ ਹਿੱਸਾ ਇਸੇ ਸੈਕਟਰ ਤੋਂ ਆਉਂਦਾ ਹੈ।