ਬਾਈਡੇਨ ਨੇ ਯੂਕਰੇਨ, ਇਜ਼ਰਾਇਲ ਅਤੇ ਤਾਇਵਾਨ ਦੀ ਸਹਾਇਤਾ ਲਈ ਕੀਤੇ ਦਸਤਖ਼ਤ

ਅਮਰੀਕਾ ਜਲਦ ਹੀ ਯੂਕਰੇਨ ਨੂੰ ਸ਼ਕਤੀਸ਼ਾਲੀ ਲੰਬੀ ਦੂਰੀ ਦੇ ਹਥਿਆਰ ਪ੍ਰਣਾਲੀਆਂ ਡਿਲਿਵਰ ਕਰਨ ਜਾ ਰਿਹਾ ਹੈ। ਯੂ.ਐੱਸ. ਸੈਨੇਟ ਨੇ ਬੀਤੇ ਦਿਨੀਂ ਯੂਕਰੇਨ ਲਈ $61 ਬਿਲੀਅਨ ਦੇ ਪੈਕੇਜ ਨੂੰ ਹਰੀ ਝੰਡੀ ਦਿੱਤੀ ਸੀ, ਜਿਸ ’ਤੇ ਰਾਸ਼ਟਰਪਤੀ ਬਾਈਡੇਨ ਨੇ ਦਸਤਖਤ ਕਰ ਦਿੱਤੇ ਹਨ। ਰੂਸ ਨਾਲ ਜੰਗ ਵਿਚਕਾਰ ਯੂਕਰੇਨ ਲਈ ਇਹ ਮਦਦ ਬਹੁਤ ਹੀ ਮਹੱਤਵਪੂਰਨ ਮੰਨੀ ਜਾਂਦੀ ਹੈ।

ਬਾਈਡੇਨ ਨੇ ਕਿਹਾ ਕਿ ਹਥਿਆਰਾਂ ਦੀ ਸਪਲਾਈ ਕੁਝ ਘੰਟਿਆਂ ਵਿਚ ਸ਼ੁਰੂ ਹੋ ਜਾਵੇਗੀ। ਪੈਂਟਾਗਨ ਨੇ ਬੁੱਧਵਾਰ ਨੂੰ ਕਿਹਾ ਕਿ ਉਸ ਨੇ ਯੂਕਰੇਨ ਨੂੰ ਤੁਰੰਤ ਭੇਜਣ ਲਈ 1 ਬਿਲੀਅਨ ਡਾਲਰ ਦਾ ਫੌਜੀ ਸਹਾਇਤਾ ਪੈਕੇਜ ਤਿਆਰ ਕੀਤਾ ਹੈ।

ਇਸ ਵਿਚ ਮੋਢੇ ਨਾਲ ਚੱਲਣ ਵਾਲੀਆਂ ਸਟਿੰਗਰ, ਸਤ੍ਹਾ ਤੋਂ ਹਵਾ ਵਿਚ ਮਾਰ ਕਰਨ ਵਾਲੀਆਂ ਮਿਜ਼ਾਈਲਾਂ ਅਤੇ ਹੋਰ ਹਵਾਈ ਰੱਖਿਆ ਸਿਸਟਮ ਅਤੇ ਜੰਗੀ ਵਾਹਨ ਸ਼ਾਮਲ ਹਨ। ਹਾਲਾਂਕਿ, ਬੇਸ਼ੱਕ ਯੂਕਰੇਨ ਲਈ $61 ਬਿਲੀਅਨ ਪੈਕੇਜ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ, ਪੈਂਟਾਗਨ ਦਾ ਕਹਿਣਾ ਹੈ ਕਿ ਇਸ ਵਿਚੋਂ ਲਗਭਗ $48 ਬਿਲੀਅਨ ਅਮਰੀਕੀ ਹਥਿਆਰ ਨਿਰਮਾਤਾ ਨੂੰ ਪਿਛਲੇ ਦੋ ਸਾਲਾਂ ਦੇ ਯੁੱਧ ਵਿਚ ਲਗਭਗ ਖਾਲੀ ਕੀਤੇ ਗਏ ਅਮਰੀਕਾ ਭੰਡਾਰਾਂ ਨੂੰ ਭਰਨ ਜਾਂ ਹੋਰ ਹਥਿਆਰ ਬਣਾਉਣ ਲਈ ਜਾਣਗੇ।