ਬੀ.ਸੀ. ’ਚ ‘ਬਾਇਓਲਾਜੀਕਲ ਸੈਕਸ’ ਸਪੋਰਟਸ ਬਿੱਲ ਨੂੰ ਵਿਧਾਨ ਸਭਾ ’ਚ ਤੁਰੰਤ ਕੀਤਾ ਗਿਆ ਰੱਦ

ਬੀ.ਸੀ. ਕੰਜ਼ਰਵੇਟਿਵ ਦਾ ‘ਬਾਇਓਲਾਜੀਕਲ ਸੈਕਸ’ ਸਪੋਰਟਸ ਬਿੱਲ ਵਿਧਾਨ ਸਭਾ ਵਿੱਚ ਤੁਰੰਤ ਹੀ ਰੱਦ ਕਰ ਦਿੱਤਾ ਗਿਆ। ਜ਼ਿਕਰਯੋਗ ਹੈ ਕਿ ਬਿ੍ਰਟਿਸ਼ ਕੋਲੰਬੀਆ ਦੇ ਕੰਜ਼ਰਵੇਟਿਵ ਆਗੂ ਜੌਹਨ ਰੁਸਟੈਡ ਦਾ ਬਿੱਲ ਪਹਿਲੇ ਪੜਾਅ ’ਤੇ ਵੀ ਨਹੀਂ ਪਹੁੰਚ ਸਕਿਆ ਜਿਸ ਵਿਚ ਜਨਤਕ ਤੌਰ ’ਤੇ ਫੰਡ ਪ੍ਰਾਪਤ ਖੇਡ ਟੀਮਾਂ ਅਤੇ ਸਮਾਗਮਾਂ ਵਿਚ ਹਿੱਸਾ ਲੈਣ ਵਾਲਿਆਂ ਨੂੰ ਵਰਗੀਕ੍ਰਿਤ ਕਰਨ ਲਈ ਬਾਇਓਲਾਜੀਕਲ ਸੈਕਸ ਦੀ ਵਰਤੋਂ ਕਰਨ ਦਾ ਪ੍ਰਸਤਾਵ ਪੇਸ਼ ਕੀਤਾ ਸੀ।

ਇਸ ਵਿਚ ਟਰਾਂਸਜੈਂਡਰ ਐਥਲੀਟਾਂ ’ਤੇ ਪ੍ਰਭਾਵਸ਼ਾਲੀ ਢੰਗ ਨਾਲ ਪਾਬੰਦੀ ਲਗਾਈ ਗਈ ਸੀ। ਰੁਸਟੈਡ ਦੇ ਪ੍ਰਾਈਵੇਟ ਮੈਂਬਰ ਬਿੱਲ ਔਰਤਾਂ ਅਤੇ ਲੜਕੀਆਂ ਦੇ ਖੇਡ ਐਕਟ ਵਿੱਚ ਨਿਰਪੱਖਤਾ ਨੂੰ ਪਹਿਲੀ ਰੀਡਿੰਗ ਵਿੱਚ ਹੀ ਰੱਦ ਕਰ ਦਿੱਤਾ ਗਿਆ। ਇਹ ਅਜਿਹੀ ਕਾਰਵਾਈ ਸੀ ਜੋ ਬੀ.ਸੀ. ਵਿਧਾਨ ਸਭਾ ਵਿਚ ਬਹੁਤ ਘੱਟ ਹੁੰਦੀ ਹੈ।

ਇਸ ਬਿਲ ਦੇ ਰੱਦ ਹੋਣ ਤੋਂ ਬਾਅਦ ਨਿਊ ਡੈਮੋਕਰੇਟਿਕ ਸਦਨ ਦੇ ਨੇਤਾ ਰਵੀ ਕਾਹਲੋਂ ਨੇ ਕਿਹਾ ਕਿ ਇਹ ਇਕ ਬਹੁਤ ਹੀ ਪੱਖਪਾਤੀ ਅਤੇ ਨਫਰਤ ਨਾਲ ਭਰਿਆ ਹੋਇਆ ਬਿਲ ਸੀ। ਦੂਜੇ ਪਾਸੇ ਰੁਸਟੈਡ ਨੇ ਕਿਹਾ ਕਿ ਪ੍ਰਸਤਾਵਿਤ ਬਿੱਲ ਦਾ ਉਦੇਸ਼ ਇਹ ਯਕੀਨੀ ਬਣਾਉਣਾ ਹੈ ਕਿ ਔਰਤਾਂ ਨਾਲ ਨਿਰਪੱਖ ਵਿਵਹਾਰ ਕੀਤਾ ਜਾਵੇ।