10.94C Vancouver 10.94C VancouverMay 30, 2025 4:35 PM - Connect Newsroom
ਓਨਟਾਰੀਓ ਦੇ ਡਰਹਮ ਵਿਚ ਵੀਰਵਾਰ ਇੱਕ ਬਜ਼ੁਰਗ ਔਰਤ ਦੀ ਚਾਕੂ ਨਾਲ ਹੱਤਿਆ ਕਰਨ ਦੇ ਮਾਮਲੇ ਵਿਚ ਪੁਲਿਸ ਨੇ 14 ਸਾਲਾ ਲੜਕੇ ਨੂੰ ਫਰਸਟ ਡਿਗਰੀ ਮਰਡਰ ਦੇ ਦੋਸ਼ ਨਾਲ ਚਾਰਜ ਕੀਤਾ ਹੈ। ਦੋਸ਼ੀ ਸ਼ੁੱਕਰਵਾਰ ਨੂੰ ਡਰਹਮ ਰੀਜਨਲ ਪੁਲਿਸ ਡਿਵੀਜ਼ਨ ਤੋਂ ਓਸ਼ਾਵਾ ਕੋਰਟ ਵਿਚ ਜ਼ੂਮ ਰਾਹੀਂ ਪੇਸ਼ ਹੋਇਆ। ਯੂਥ ਕ੍ਰਿਮੀਨਲ ਜਸਟਿਸ ਐਕਟ ਦੇ ਨਿਯਮ ਦੇ ਮੱਦੇਨਜ਼ਰ ਉਸ ਦੀ ਪਛਾਣ ਗੁਪਤ ਰੱਖੀ ਗਈ ਹੈ।
ਗੌਰਤਲਬ ਹੈ ਕਿ ਬੀਤੀ ਦੁਪਹਿਰ ਲਗਭਗ ਤਿੰਨ ਵਜੇ ਡਰਹਮ ਦੇ ਲਿਨ ਹਾਈਟਸ ਡਰਾਈਵ ਅਤੇ ਫੇਅਰਪੋਰਟ ਰੋਡ ਖੇਤਰ ਵਿਚ ਬਜ਼ੁਰਗ ਔਰਤ ਦਾ ਕਤਲ ਹੋਇਆ ਸੀ ਅਤੇ ਰਾਤ 8:30 ਵਜੇ ਦੇ ਕਰੀਬ ਸ਼ੱਕੀ ਨੂੰ ਲੱਭ ਕੇ ਹਿਰਾਸਤ ਵਿਚ ਲਿਆ ਗਿਆ ਸੀ।
ਡਰਹਮ ਪੁਲਿਸ ਨੇ ਦੱਸਿਆ ਕਿ ਬਜ਼ੁਰਗ ਔਰਤ ਨੂੰ ਇੱਕ ਰਾਹਗੀਰ ਨੇ ਘਰ ਦੇ ਬਾਹਰ ਜ਼ਮੀਨ 'ਤੇ ਖੂਨ ਨਾਲ ਲੱਥਪੱਥ ਡਿੱਗੇ ਦੇਖਿਆ ਸੀ ਅਤੇ ਉਸ ਨੂੰ ਟੋਰਾਂਟੋ ਖੇਤਰ ਦੇ ਟਰੌਮਾ ਸੈਂਟਰ ਵਿਚ ਲਿਜਾਇਆ ਗਿਆ, ਜਿਥੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਪੁਲਿਸ ਮੁਤਾਬਕ, ਔਰਤ ਸ਼ੱਕੀ ਨੂੰ ਨਹੀਂ ਜਾਣਦੀ ਸੀ ਅਤੇ ਉਸ ਨੇ ਬਿਨਾਂ ਕਿਸੇ ਉਕਸਾਵੇ ਦੇ ਹਮਲਾ ਕੀਤਾ ਸੀ।
