12.02C Vancouver 12.02C VancouverOct 15, 2025 12:04 AM - Connect Newsroom - Pervez Sandhu
ਵੈਨਕੂਵਰ ਦੇ ਆਈਕੌਨਿਕ ਬੀ.ਸੀ. ਪਲੇਸ ਸਟੇਡੀਅਮ ਵਿਖੇ ਖੇਡਿਆ ਗਿਆ ਕ੍ਰਿਕਟ ਟੂਰਨਾਮੈਂਟ, ਕੈਨੇਡਾ ਸੁਪਰ60 ਸੋਮਵਾਰ ਰਾਤ ਸੰਪੰਨ ਹੋਇਆ।
ਕੱਲ ਦੇ ਖਿਤਾਬੀ ਮੁਕਾਬਲੇ 'ਚ ਬਰੈਂਪਟਨ ਬਲਿਟਜ਼ ਨੇ ਮੌਂਟਰੀਅਲ ਰਾਇਲ ਟਾਈਗਰਸ ਨੂੰ ਇੱਕ ਪਾਸੜ ਢੰਗ ਨਾਲ ਮਾਤ ਦਿੱਤੀ।
ਫਾਈਨਲ ਮੁਕਾਬਲੇ 'ਚ ਮੌਂਟਰੀਅਲ ਰਾਇਲ ਟਾਈਗਰਸ ਦੀ ਟੀਮ ਪੂਰੇ 10 ਓਵਰ ਵੀ ਨਾ ਟਿਕ ਸਕੀ ਅਤੇ 8 ਓਵਰਾਂ 'ਚ 69 ਰਨ 'ਤੇ ਆਲ ਆਊਟ ਹੋ ਗਈ।
ਜਵਾਬ 'ਚ ਬਰੈਂਪਟਨ ਬਲਿਟਜ਼ ਦੀ ਟੀਮ ਨੇ 6ਵੇਂ ਓਵਰ ਵਿੱਚ ਹੀ ਟੀਚਾ ਹਾਸਿਲ ਕਰ ਲਿਆ।
ਇਹ ਟੂਰਨਾਮੈਂਟ ਕ੍ਰਿਕਟਰ ਯੁਵਰਾਜ ਸਿੰਘ ਨੇ ਕੁਝ ਹੋਰ ਪ੍ਰਬੰਧਕਾਂ ਨਾਲ ਮਿਲ ਕੇ ਕਰਵਾਇਆ ਸੀ।
ਕੱਲ ਲੀਗ ਦੇ ਆਖਰੀ ਦਿਨ ਯੁਵਰਾਜ ਸਿੰਘ ਆਪਣੇ ਪ੍ਰੀਵਾਰ ਨਾਲ ਪਹੁੰਚੇ ਸਨ ਅਤੇ ਉਨ੍ਹਾਂ ਆਪਣੀ ਪਤਨੀ ਅਤੇ ਬੱਚਿਆਂ ਨਾਲ ਸਟੇਡੀਅਮ 'ਚ ਪਹੁੰਚੇ ਲੋਕਾਂ ਦਾ ਧੰਨਵਾਦ ਕਰਨ ਲਈ ਸਟੇਡੀਅਮ ਦਾ ਗੇੜਾ ਵੀ ਲਗਾਇਆ।
ਯੁਵੀ ਪੂਰੀ ਪ੍ਰੈਜ਼ੈਂਟੇਸ਼ਨ ਸੈਰੇਮਨੀ ਦੌਰਾਨ ਹਾਜਿਰ ਸਨ ਅਤੇ ਉਨ੍ਹਾਂ ਹੀ ਜੇਤੂ ਟੀਮ ਨੂੰ ਟਰਾਫੀ ਪ੍ਰਦਾਨ ਕੀਤੀ ਅਤੇ ਤੁਰੰਤ ਮੁਸਕਰਾਉਂਦੇ ਹੋਏ ਕੈਮਰੇ ਤੋਂ ਬਾਹਰ ਨਿਕਲ ਗਏ ਤਾਂ ਜੋ ਮੌਕੇ ਦਾ ਫੋਕਸ ਉਹ ਖੁਦ ਨਹੀਂ ਸਗੋਂ ਜੇਤੂ ਟੀਮ ਰਹੇ।
ਜੇਤੂ ਟੀਮ ਦੇ ਕਪਤਾਨ ਡੇਵਿਡ ਵੀਜ਼ ਨੇ ਕਨੈਕਟ ਐਫ.ਐਮ. ਨਾਲ ਗੱਲ ਕਰਦਿਆਂ ਕਿਹਾ ਕਿ ਉਹ ਟੀਮ ਦੇ ਪ੍ਰਦਰਸ਼ਨ ਤੋਂ ਅਤੇ ਜਿਸ ਢੰਗ ਨਾਲ ਲੀਗ ਕਰਵਾਈ ਗਈ ਉਸ ਤੋਂ ਬੇਹੱਦ ਖੁਸ਼ ਹਨ।
ਉਨ੍ਹਾਂ ਆਖਿਆ ਕਿ ਟੀ-10 ਕ੍ਰਿਕਟ ਸਿਰਫ ਐਂਟਰਟੇਨਮੈਂਟ ਨਹੀਂ ਹੈ ਅਤੇ ਉਹ ਸਮਝਦੇ ਹਨ ਕਿ ਆਉਂਦੇ ਸਮੇਂ 'ਚ ਇਹ ਫੌਰਮੈਟ ਹੋਰ ਪ੍ਰਸਿੱਧੀ ਖੱਟੇਗਾ।
ਇਸ ਲੀਗ 'ਚ ਕੁੱਲ 6 ਪੁਰੁਸ਼ ਟੀਮਾਂ ਅਤੇ 2 ਮਹਿਲਾਂ ਟੀਮਾਂ ਹਿੱਸਾ ਲੈਂਦੀਆਂ ਵਿਖਾਈ ਦਿੱਤੀਆਂ।
ਸੋਮਵਾਰ ਨੂੰ ਪਹਿਲਾਂ ਦੋ ਸੈਮੀਫਾਈਨਲ ਮੁਕਾਬਲੇ ਖੇਡੇ ਗਏ ਜਿੱਥੇ ਮੌਂਟਰੀਅਲ ਰਾਇਲ ਟਾਈਗਰਸ ਨੇ ਵੈਨਕੂਵਰ ਕਿੰਗਜ਼ ਨੂੰ ਮਾਤ ਦਿੱਤੀ ਅਤੇ ਦੂਜੇ ਪਾਸੇ ਬਰੈਂਪਟਨ ਬਲਿਟਜ਼ ਨੇ ਮਿਸੀਸਾਗਾ ਮਾਸਟਰਸ ਖਿਲਾਫ ਬਾਜੀ ਮਾਰੀ।
ਇਸ ਲੀਗ 'ਚ ਜਿੱਥੇ ਇੱਕ ਪਾਸੇ ਅਨੇਕਾਂ ਲੋਕਾਂ ਨੇ ਪਹੁੰਚ ਕ੍ਰਿਕਟ ਦੀ ਖੇਡ ਦਾ ਅਨੰਦ ਮਾਣਿਆ ਉਥੇ ਹੀ ਵੱਖੋ-ਵੱਖਰੀਆਂ ਸਿਆਸੀ ਪਾਰਟੀਆਂ ਤੋਂ ਵਾਸਤਾ ਰੱਖਦੇ ਲੋਕਾਂ ਦੇ ਨੁਮਾਇੰਦੇ ਵੀ ਮੁਕਾਬਲੇ ਵੇਖਣ ਪਹੁੰਚੇ।
ਇਸ ਦੌਰਾਨ ਕਨੈਕਟ ਐਫ. ਐਮ. ਨੇ ਵੀ ਜਿੱਥੇ ਇੱਕ ਪਾਸੇ ਪ੍ਰੀਮਿਅਰ ਡੇਵਿਡ ਇਬੀ ਦੀ ਯੁਵਰਾਜ ਸਿੰਘ ਨਾਲ ਹੋਈ ਮੁਲਾਕਾਤ ਨੂੰ ਕੈਮਰੇ 'ਚ ਕੈਦ ਕੀਤਾ ਉਥੇ ਹੀ ਕੰਜ਼ਰਵੇਟਿਵ ਐਮ.ਪੀ. ਅਤੇ ਬੀ.ਸੀ. ਕੰਜ਼ਰਵੇਟਿਵ ਐਮ.ਐਲ.ਏ. ਵੀ ਕਨੈਕਟ ਐਫ.ਐਮ. ਨਾਲ ਚਰਚਾ 'ਚ ਸ਼ਾਮਿਲ ਹੋਏ।
ਲੋਕਲ ਸਰਕਾਰਾਂ 'ਚ ਕਾਉਂਸਲਰ ਲਿੰਡਾ ਐਨਿਸ ਨਾਲ ਗੱਲਬਾਤ ਕੀਤੀ।
ਉੱਧਰ ਕੱਲ ਪ੍ਰੈਜੈਂਟੇਸ਼ਨ ਸੈਰੇਮਨੀ ਦੌਰਾਨ ਕੁਝ ਪੁਰਸਕਾਰਾਂ ਦੀ ਵੰਢ ਲਈ ਬੀ.ਸੀ. ਦੀ ਟੂਰਿਜ਼ਮ, ਆਰਟਸ, ਕਲਚਰ ਅਤੇ ਸਪੋਰਟ ਮੰਤਰੀ ਐਨ ਕੈਂਗ ਵੀ ਮੌਜੂਦ ਸਨ।
ਕਨੈਕਟ ਐਫ.ਐਮ. ਨੇ ਮੰਤਰੀ ਕੈਂਗ ਤੋਂ ਉਨ੍ਹਾਂ ਦਾ ਤਜਰਬਾ ਜਾਨਣ ਦੀ ਕੋਸ਼ਿਸ਼ ਕੀਤੀ ਅਤੇ ਨਾਲ ਹੀ ਸਰੀ ਦੇ ਨੇੜੇ ਬਿਹਤਰ ਕ੍ਰਿਕਟ ਫੈਸਿਲਿਟੀਸ ਦੀ ਲੋੜ ਸੰਬੰਧੀ ਸਵਾਲ ਵੀ ਕੀਤਾ।
ਮੰਤਰੀ ਕੈਂਗ ਦਾ ਕਹਿਣਾ ਸੀ ਕਿ ਉਹ ਪਹਿਲੀ ਵਾਰ ਇਸ ਪੱਧਰ ਦੇ ਕ੍ਰਿਕਟ ਮੁਕਾਬਲੇ ਨੂੰ ਲਾਈਵ ਵੇਖ ਰਹੀ ਹਨ ਅਤੇ ਉਹ ਖੇਡ ਤੋਂ ਬੇਹੱਦ ਐਕਸਾਈਟਿਡ ਹਨ।
ਉਨ੍ਹਾਂ ਕਿਹਾ ਕਿ ਅਗਲੀ ਵਾਰ ਜਦ ਲੀਗ ਵਾਪਿਸ ਪਰਤੇਗੀ ਤਾਂ ਉਸ ਵੇਲੇ ਤੱਕ ਉਹ ਖਿਡਾਰੀਆਂ ਦੀਆਂ ਮੰਗਾਂ ਸੰਬੰਧੀ ਬਿਹਤਰੀ ਲਿਆਂਦੀ ਜਾਣ ਦੀ ਆਸ ਕਰਦੇ ਹਨ।
