ਬ੍ਰਿਟਿਸ਼ ਕੋਲੰਬੀਆ ਦੀ ਜੇਲ੍ਹ ਇੱਕ ਵਾਰ ਫਿਰ ਸੁਰਖੀਆਂ ਵਿਚ

ਬ੍ਰਿਟਿਸ਼ ਕੋਲੰਬੀਆ ਦੀ ਇਕੋ-ਇੱਕ ਮੈਕਸੀਮਮ ਸਕਿਓਰਟੀ ਜੇਲ੍ਹ ਇੱਕ ਵਾਰ ਫਿਰ ਸੁਰਖੀਆਂ ਵਿਚ ਹੈ। ਇਸ ਹਫ਼ਤੇ ਇਸ ਜੇਲ੍ਹ ਵਿਚ ਕੈਦੀਆਂ ਵਿਚਕਾਰ ਫਿਰ ਤੋਂ ਝੜਪ ਹੋਈ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ਜਿਸ ਵਿਚ ਇੱਕ ਕੈਦੀ ਨੂੰ ਜ਼ਖਮੀ ਹੋਣ ਤੋਂ ਬਾਅਦ ਹਸਪਤਾਲ ਲਿਜਾਇਆ ਗਿਆ ਸੀ। ਇਹ ਮਾਮਲਾ ਵੈਨਕੂਵਰ ਈਸਟ ਦੇ ਸ਼ਹਿਰ ਅਗਾਸੀਜ਼ ਦੀ ਕੈਂਟ ਇੰਸਟੀਚਿਊਟ ਜੇਲ੍ਹ ਦਾ ਹੈ। ਸੁਧਾਰਾਤਮਕ ਸੇਵਾ ਮੁਤਾਬਕ, ਘਟਨਾ ਮੰਗਲਵਾਰ ਨੂੰ ਵਾਪਰੀ।

ਇਸ ਘਟਨਾ ਵਿਚ ਕੋਈ ਹੋਰ ਕੈਦੀ ਜਾਂ ਜੇਲ੍ਹ ਸਟਾਫ਼ ਜ਼ਖਮੀ ਨਹੀਂ ਹੋਇਆ। ਏਜੰਸੀ ਨੇ ਕਿਹਾ ਕਿ ਹਮਲਾਵਰ ਦੀ ਪਛਾਣ ਕਰਕੇ ਉਸ 'ਤੇ ਬਣਦੀ ਕਾਰਵਾਈ ਵੀ ਕੀਤੀ ਗਈ ਹੈ। ਗੌਰਤਲਬ ਹੈ ਕਿ ਇਸ ਘਟਨਾ ਤੋਂ 4 ਦਿਨ ਪਹਿਲਾਂ ਕੈਂਟ ਜੇਲ੍ਹ ਵਿਚ ਹੀ ਇੱਕ ਕੈਦੀ ਦੀ ਮੌਤ ਦੇ ਸਬੰਧ ਵਿਚ ਕੈਦੀਆਂ ਦੇ ਇੱਕ ਗਰੁੱਪ 'ਤੇ ਦੋਸ਼ ਲਗਾਏ ਗਏ ਹਨ। ਕੈਂਟ ਇੰਸਟੀਚਿਊਟ ਜੇਲ੍ਹ ਬ੍ਰਿਟਿਸ਼ ਕੋਲੰਬੀਆ ਅਤੇ ਯੂਕੋਨ ਦੀ ਇਕਮਾਤਰ ਮੈਕਸੀਮਮ ਸਕਿਓਰਟੀ ਜੇਲ੍ਹ ਹੈ, ਇਹ 1979 ਵਿਚ ਖੋਲ੍ਹੀ ਗਈ ਸੀ।