18.51C Vancouver 18.51C VancouverMay 6, 2020 11:23 PM -
ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਬੌਰੀਸ ਜੌਨਸਨ ਦਾ ਕਹਿਣਾ ਹੈ ਕਿ ਦੇਸ਼ ਦੀ ਟੈਸਟਿੰਗ ਤਾਕਤ 'ਚ ਵਾਧਾ ਕੀਤਾ ਜਾ ਰਿਹਾ ਹੈ।
ਉਨ੍ਹਾਂ ਬੁੱਧਵਾਰ ਨੂੰ ਇੱਕ ਬਿਆਨ 'ਚ ਆਖਿਆ ਕਿ ਮਈ ਦੇ ਅੰਤ ਤਕ ਹਰ ਰੋਜ਼ ਕੀਤੇ ਜਾਣ ਵਾਲੇ ਟੈਸਟਸ ਨੂੰ 200,000 ਤੱਕ ਪਹੁੰਚਾਉਣ ਦੀ ਕੋਸ਼ਿਸ਼ ਰਹੇਗੀ।
ਇਹ ਬਿਆਨ ਉਸ ਵੇਲੇ ਆਏ ਹਨ ਜਦ ਬ੍ਰਿਟੇਨ ਵਿਸ਼ਵ ਦਾ ਦੂਜਾ ਅਜਿਹਾ ਦੇਸ਼ ਬਣ ਗਿਆ ਹੈ, ਜਿਸਨੇ ਕੋਰੋਨਾ ਵਾਇਰਸ ਕਾਰਨ 30,000 ਤੋਂ ਵਧੇਰੇ ਮੌਤਾਂ ਦਾ ਸਾਹਮਣਾ ਕੀਤਾ ਹੈ।
ਕਮਿਊਨਿਟੀ ਸੈਕਰੇਟਰੀ ਰੌਬਰਟ ਜੈਨਰਿਕ ਨੇ ਸਰਕਾਰ ਦੀ ਹਰ ਰੋਜ਼ ਦੀ ਬ੍ਰੀਫਿੰਗ 'ਚ ਦੱਸਿਆ ਕਿ ਦੇਸ਼ ਦੇ 649 ਹੋਰ ਵਾਇਰਸ ਪੀੜਤਾਂ ਨੇ ਦਮ ਤੋੜ ਦਿੱਤਾ ਹੈ।
ਇਸਦੇ ਨਾਲ ਯੂ.ਕੇ. ਦੀ ਅਧਿਕਾਰਿਤ ਮੌਤਾਂ ਦੀ ਗਿਣਤੀ 30,076 ਤੱਕ ਪਹੁੰਚ ਗਈ ਹੈ।
ਇਸ ਮਾਮਲੇ 'ਚ ਸਿਰਫ ਅਮਰੀਕਾ ਹੀ ਯੂ.ਕੇ. ਤੋਂ ਅੱਗੇ ਹੈ, ਜਿੱਥੇ ਵਾਇਰਸ ਕਾਰਨ 71,000 ਤੋਂ ਵਧੇਰੇ ਪੀੜਤ ਜਾਨ ਗਵਾ ਚੁੱਕੇ ਹਨ।
ਯਾਦ ਰਹੇ ਵੀਰਵਾਰ ਨੂੰ ਬ੍ਰਿਟਿਸ਼ ਸਰਕਾਰ ਲੌਕਡਾਊਨ ਪਬੰਦੀਆਂ 'ਚ ਵਾਧਾ ਕਰ ਸਕਦੀ ਹੈ।
ਜੈਨਰਿਕ ਨੇ ਦੱਸਿਆ ਕਿ ਮੰਗਲਵਾਰ ਨੂੰ ਇਸ ਵਾਇਰਸ ਸੰਬੰਧੀ ਕੀਤੇ ਗਏ ਟੈਸਟਸ ਦੀ ਗਿਣਤੀ 70,000 ਦੀ ਸੀ।
ਹਾਲਾਂਕਿ ਬ੍ਰਿਟੇਨ ਸਰਕਾਰ ਨੇ ਅਪ੍ਰਾਇਲਦੇ ਅੰਤ ਤੱਕ ਹਰ ਰੋਜ਼ 100,000 ਟੈਸਟ ਕਰਨ ਦੇ ਟੀਚੇ ਤਕ ਪਹੁੰਚਣ ਦੀ ਗੱਲ ਆਖੀ ਸੀ, ਪਰ ਅਜੇ ਤਕ ਅਜਿਹਾ ਸਿਰਫ 2 ਵਾਰ ਹੀ ਹੋ ਸਕਿਆ ਹੈ।
