ਬੀਐੱਸ ਹੁੱਡਾ ਨੇ ਰਾਜਪਾਲ ਨੂੰ ਕਿਸਾਨਾਂ ਦੇ ਮੁੱਦਿਆਂ 'ਤੇ ਚਰਚਾ ਕਰਨ ਲਈ ਅਸੈਂਬਲੀ ਦਾ ਸਰਦ ਰੁੱਤ ਦਾ ਸੈਸ਼ਨ ਸੱਦਣ ਦੀ ਕੀਤੀ ਬੇਨਤੀ

ਕਾਂਗਰਸ ਲੀਡਰ ਅਤੇ ਹਰਿਆਣਾ ਦੇ ਸਾਬਕਾ ਮੁੱਖ ਮੰਤਰੀ ਭੁਪਿੰਦਰ ਸਿੰਘ ਹੁੱਡਾ ਨੇ ਹਰਿਆਣਾ ਦੇ ਰਾਜਪਾਲ ਸੱਤਿਆਦੇਵ ਨਾਰਾਇਣ ਆਰਿਆ ਨੂੰ ਵਿਰੋਧ ਕਰ ਰਹੇ ਕਿਸਾਨਾਂ ਦੇ ਮੁੱਦੇ ਅਤੇ ਉਹਨਾਂ ਦੇ ਅੰਦੋਲਨ ਨੂੰ ਲੈਕੇ ਅਸੈਂਬਲੀ ਦਾ ਸਰਦ ਰੁੱਤ ਦਾ ਸੈਸ਼ਨ ਸੱਦਣ ਦੀ ਅਪੀਲ ਕੀਤੀ ਹੈ|

ਹੁੱਡਾ ਨੇ ਇੱਕ ਪ੍ਰੈਸ ਕਾਨਫਰੈਂਸ ਦੌਰਾਨ ਕਿਹਾ,"ਹਰਿਆਣਾ ਦੇ ਰਾਜਪਾਲ ਨੂੰ ਕਿਸਾਨਾਂ ਦੀਆਂ ਮੁਸ਼ਕਿਲਾਂ 'ਤੇ ਚਰਚਾ ਕਰਨ ਲਈ ਸਰਦ ਰੁੱਤ ਦਾ ਸੈਸ਼ਨ ਸੱਦਣ ਲਈ ਬੇਨਤੀ ਕੀਤੀ ਗਈ ਹੈ|

ਉਹਨਾਂ ਕਿਹਾ ਕਿ ਕਾਂਗਰਸ ਭਾਰਤੀ ਜਨਤਾ ਪਾਰਟੀ ਦੀ ਅਗਵਾਈ ਵਾਲੀ ਹਰਿਆਣਾ ਸਰਕਾਰ ਖ਼ਿਲਾਫ਼ ਅਵਿਸ਼ਵਾਸ ਮਤਾ ਲਿਆਵੇਗੀ ਕਿਉਂਕਿ ਇਸਨੇ 'ਲੋਕਾਂ ਦਾ ਯਕੀਨ ਤੋੜਿਆ ਹੈ'|

ਉਹਨਾਂ ਕਿਹਾ,"ਕਿਸਾਨਾਂ ਦੀ ਬੇਜ਼ਤੀ ਕੀਤੀ ਜਾ ਰਹੀ ਹੈ| ਉਹਨਾਂ ਨੂੰ 'ਖਾਲਿਸਤਾਨੀ' ਅਤੇ 'ਕਾਂਗਰਸੀ' ਕਿਹਾ ਜਾ ਰਿਹਾ ਹੈ| ਕਿਸਾਨ ਸਿਰਫ਼ ਕਿਸਾਨ ਹੁੰਦੇ ਹਨ| ਉਹ ਇੱਥੇ ਧਰਮ, ਜ਼ਾਤ ਅਤੇ ਇਲਾਕੇ ਤੋਂ ਉੱਤੇ ਉੱਠ ਕੇ ਆਪਣੀਆਂ ਜਾਇਜ਼ ਮੰਗਾਂ ਲੈਕੇ ਆਏ ਹਨ| ਉਹ ਏਨੀ ਠੰਢ 'ਚ ਇੱਥੇ ਹਨ|"

ਗ਼ੌਰਤਲਬ ਹੈ ਕਿ ਨਵੇਂ ਲਾਗੂ ਕੀਤੇ ਗਏ ਖੇਤੀਬਾੜੀ ਬਿੱਲਾਂ ਦੇ ਵਿਰੋਧ 'ਚ ਦਿੱਲੀ 'ਚ ਹਜ਼ਾਰਾਂ ਹੀ ਕਿਸਾਨ ਰੋਹ ਵਿਖਾਵਾ ਕਰ ਰਹੇ ਹਨ|