ਬਜਟ 2022 'ਚ ਹਾਊਸਿੰਗ: ਲਿਬਰਲ ਸਰਕਾਰ ਦੇ ਬਜਟ 'ਚ ਘਰਾਂ ਦੀ ਖਰੀਦ 'ਤੇ ਇੱਕ ਸਾਲ 'ਚ ਵੇਚਣ 'ਤੇ ਵਧੇਰੇ ਟੈਕਸ ਦਾ ਐਲਾਨ, ਪਰ ਕੁਝ ਖਾਸ ਮੌਕਿਆਂ 'ਤੇ ਮਿਲ ਸਕਦੀ ਢਿੱਲ

ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਨੇ ਸਾਲ 2022-2023 ਲਈ ਬਜਟ ਪੇਸ਼ ਕਰ ਦਿੱਤਾ ਹੈ। ਸਾਲ 2021-2022 'ਚ ਪੇਸ਼ ਕੀਤੇ ਗਏ ਫੈਡਰਲ ਬਜਟ ਡੈਫੀਸੀਟ ਦੇ $113.8 ਬਿਲੀਅਨ ਰਹਿਣ ਤੋਂ ਬਾਅਦ, 2022-2023 ਦਾ ਡੈਫੀਸੀਟ $52.8 ਬਿਲੀਅਨ ਦਾ ਦੱਸਿਆ ਗਿਆ ਹੈ।

ਸਾਲ 2022-2023 ਲਈ ਫੈਡਰਲ ਡੈਬਟ ਪ੍ਰੋਜੈਕਸ਼ਨ $1.160 ਟ੍ਰਿਲੀਅਨ ਦੀ ਦੱਸੀ ਗਈ ਹੈ। ਆਗਾਮੀ ਸਾਲ ਦਾ ਡੈਬਤ ਟੁ ਜੀ.ਡੀ.ਪੀ. ਰੇਸ਼ੋ 46.5% ਦਾ ਦੱਸਿਆ ਗਿਆ ਹੈ।

ਡੈਂਟਲ ਅਤੇ ਫਾਰਮਾਕੇਅਰ

ਆਗਾਮੀ ਸਾਲ ਲਈ ਡੈਂਟਲ ਕੇਅਰ 'ਚ ਨਿਵੇਸ਼ ਦਾ ਵੀ ਐਲਾਨ ਕੀਤਾ ਗਿਆ ਹੈ। ਅਗਲੇ ਸਾਲ ਤਕ $300 ਮਿਲੀਅਨ ਦੇ ਨਿਵੇਸ਼ ਤੋਂ ਬਾਅਦ ਇਸ ਖੇਤਰ 'ਚ ਸਾਲ 2026-2027 ਇਕ $1.7 ਬਿਲੀਅਨ ਦੇ ਨਿਵੇਸ਼ ਦੀ ਜਾਣਕਾਰੀ ਦਿੱਤੀ ਗਈ ਹੈ। ਇਸ ਖੇਤਰ 'ਚ 5 ਸਾਲ ਦਾ ਕੁੱਲ ਖਰਚਾ $5.3 ਬਿਲੀਅਨ ਰਵੇਗਾ। ਹਾਲਾਂਕਿ ਫੈਡਰਲ ਸਰਕਾਰ ਨੇ ਨੈਸ਼ਨਲ ਫਾਰਮਾਕੇਅਰ ਸੰਬੰਧੀ ਕੋਈ ਐਲਾਨ ਨਹੀਂ ਕੀਤਾ। ਲਿਬਰਲ ਸਰਕਾਰ ਦਾ ਕਹਿਣਾ ਹੈ ਕਿ ਨੈਸ਼ਨਲ ਫਾਰਮਾਕੇਅਰ ਨੂੰ ਡਿਵੈਲਪ ਕੀਤਾ ਜਾਵੇਗਾ ਅਤੇ ਇਸ ਸੰਬੰਧੀ 2024 'ਚ ਮਨਜੂਰੀ ਮਿਲ ਸਕਦੀ ਹੈ। ਇਸ ਦੇ ਨਾਲ ਹੀ ਲੌਂਗ ਟਰਮ ਕੋਵਿਡ ਰਿਸਰਚ ਲਈ $20 ਮਿਲੀਅਨ ਦਾ ਐਲਾਨ ਕੀਤਾ ਗਿਆ ਹੈ। ਆਗਾਮੀ ਸਾਲ ਲਈ ਵੈਕਸੀਨ ਕਰੀਡੈਂਸ਼ੀਅਲਸ ਅਤੇ ਅਰਾਈਵੀਕੈਨ ਐਪ ਲਈ $43 ਮਿਲੀਅਨ ਦਾ ਐਲਾਨ ਕੀਤਾ ਗਿਆ ਹੈ।

ਹਾਊਸਿੰਗ

ਹਾਊਸਿੰਗ ਦੇ ਖੇਤਰ 'ਚ ਕਈ ਐਲਾਨ ਕੀਤੇ ਗਏ ਹਨ। ਅਗਲੇ 5 ਸਾਲ 'ਚ 1,00,000 ਨਵੇਂ ਘਰਾਂ ਦੀ ਉਸਾਰੀ ਲਈ $4 ਬਿਲੀਅਨ ਦਾ ਐਲਾਨ ਕੀਤਾ ਗਿਆ ਹੈ। 40 ਸਾਲ ਤੋਂ ਘੱਟ ਉਮਰ ਦੇ ਵਰਗ ਲਈ ਟੈਕਸ ਫ੍ਰੀ ਹੋਮ ਸੇਵਿੰਗਸ ਅਕਾਊਂਟ ਤਹਿਤ $40,000 ਦੀ ਰਾਸ਼ੀ ਰੱਖੀ ਗਈ ਹੈ। ਪਹਿਲੀ ਵਾਰ ਘਰ ਖਰੀਦਣ ਵਾਲਿਆਂ ਲਈ ਟੈਕਸ ਕਰੈਡਿਟ ਨੂੰ ਦੁੱਗਣਾ ਕੀਤਾ ਜਾ ਰਿਹਾ ਹੈ ਅਤੇ $1,500 ਤਕ ਦੀ ਰਿਬੇਟ ਦਿੱਤੀ ਜਾਵੇਗੀ। ਪ੍ਰਾਪਰਟੀ ਫਲਿਪਿੰਗ ਸੰਬੰਧੀ ਨਵੇਂ ਟੈਕਸ ਰੂਲ ਲਾਗੂ ਕੀਤੇ ਗਏ ਹਨ।

ਲਿਬਰਲਸ ਨੇ ਇਸ ਬਜਟ 'ਚ ਘਰਾਂ ਨੂੰ ਫਲਿਪ ਕਰਨ ਵਾਲਿਆਂ 'ਤੇ ਵੀ ਨਿਸ਼ਾਨਾ ਸਾਧਿਆ ਹੈ। ਜੇਕਰ ਕੋਈ ਵਿਅਕਤੀ ਕਿਸੇ ਘਰ ਦੀ ਖਰੀਦ ਤੋਂ ਬਾਅਦ ਇੱਕੋ ਸਾਲ ਵਿਚਾਲੇ ਉਸ ਨੂੰ ਵੇਚਦਾ ਹੈ ਤਾਂ ਉਸ ਦੇ ਮੁਨਾਫੇ 'ਤੇ ਬਿਜਨਸ ਇੰਕਮ ਦੇ ਤੌਰ 'ਤੇ ਟੈਕਸ ਲੱਗੇਗਾ। ਇਹ ਨਿਯਮ ਜਨਵਰੀ 2023 ਤੋਂ ਲਾਗੂ ਹੋਣਗੇ। ਹਾਲਾਂਕਿ ਇਸ 'ਚ ਕੁਝ ਐਕਸੈਪਸ਼ਨ ਰੱਖੇ ਗਏ ਹਨ, ਜਿਸ ਅਨੁਸਟ ਕਿਸੇ ਦੀ ਮੌਤ, ਬੱਚੇ ਦੇ ਜਨਮ ਜਾਂ ਤਲਾਕ ਦੇ ਹਾਲਾਤਾਂ 'ਚ ਇਹ ਨਿਯਮ ਲਾਗੂ ਨਹੀਂ ਹੋਣਗੇ।

ਫੈਡਰਲ ਬਜਟ 'ਚ ਵਿਦੇਸ਼ੀ ਨਾਗਰਿਕਾਂ ਲਈ ਇਹ ਗੈਰਕਨੂੰਨੀ ਬਣਾਇਆ ਜਾਵੇਗਾ ਕਿ ਉਹ ਅਗਲੇ 2 ਸਾਲ 'ਚ ਕੈਨੇਡਾ 'ਚ ਕੋਈ ਘਰ ਖਰੀਦ ਸਕਣ। ਇਸ ਬੈਨ 'ਚ ਕੌਂਡੋਸ, ਅਪਾਰਟਮੈਂਟਸ, ਜਾਂ ਸਿੰਗਲ ਯੂਨਿਟ ਸ਼ਾਮਿਲ ਹੋਣਗੇ। ਹਾਲਾਂਕਿ ਇਸ ਬੈਨ 'ਚ ਪਰਮਾਨੈਂਟ ਰੈਜ਼ੀਡੈਂਟਸ, ਵਿਦੇਸ਼ੀ ਵਰਕਰ ਅਤੇ ਵਿਦਿਆਰਥੀ ਸ਼ਾਮਿਲ ਨਹੀਂ ਕੀਤੇ ਗਏ ਹਨ।

ਇੰਡੀਜਨਸ ਕਮਿਊਨਿਟੀਸ ਸੰਬੰਧੀ ਹਾਊਸਿੰਗ ਲਈ ਅਗਲੇ 5 ਸਾਲ 'ਚ $3.9 ਬਿਲੀਅਨ ਖਰਚੇ ਜਾਣਗੇ। ਰੈਜ਼ੀਡੈਂਸ਼ੀਅਲ ਸਕੂਲ ਲੈਗੇਸੀ ਨੂੰ ਐਡਰੈਸ ਕਰਨ ਲਈ $275 ਮਿਲੀਅਨ ਦੀ ਰਾਸ਼ੀ ਐਲਾਨੀ ਗਈ ਹੈ।

ਡਿਫੈਂਸ

ਰਾਸ਼ਟਰੀ ਡਿਫੈਂਸ ਲਈ ਅਗਲੇ 5 ਸਾਲ 'ਚ $17.2 ਬਿਲੀਅਨ ਦੇ ਨਿਵੇਸ਼ ਦਾ ਐਲਾਨ ਕੀਤਾ ਗਿਆ ਹੈ। ਡਿਫੈਂਸ ਅਤੇ ਸਾਈਬਰ ਸਿਕਿਉਰਿਟੀ ਦੇ ਖੇਤਰ 'ਚ ਅਗਲੇ ਇੱਕ ਸਾਲ 'ਚ $224 ਮਿਲੀਅਨ ਖਰਚੇ ਜਾਣਗੇ। ਇਸੇ ਖੇਤਰ 'ਚ ਅਗਲੇ 5 ਸਾਲ 'ਚ $7.2 ਬਿਲੀਅਨ ਦੇ ਖਰਚੇ ਦਾ ਐਲਾਨ ਕੀਤਾ ਗਿਆ ਹੈ।

ਇਸ ਤੋਂ ਇਲਾਵਾ ਯੂਕਰੇਨ ਦੇ ਸਹਿਯੋਗ ਲਈ $500 ਮਿਲੀਅਨ ਦਾ ਐਲਾਨ ਕੀਤਾ ਗਿਆ ਹੈ।

ਨਵੇਂ ਖਰਚਿਆਂ 'ਚ ਅਗਲੇ 6 ਸਾਲ 'ਚ $62.6 ਬਿਲੀਅਨ ਦਾ ਬਜਟ ਦੱਸਿਆ ਗਿਆ ਹੈ।

ਬੈਂਕਸ ਅਤੇ ਇੰਸ਼ੋਰੈਂਸ ਕੰਪਨੀਆਂ ਨੂੰ $1 ਬਿਲੀਅਨ ਤੋਂ ਵਧੇਰੇ ਦੀ ਟੈਕਸੇਬਲ ਇੰਕਮ 'ਤੇ ਇੱਕ ਵਾਰ ਦਾ 15% ਟੈਕਸ ਲਗਾਇਆ ਗਿਆ ਹੈ। ਫਾਈਨੈਂਸ਼ੀਅਲ ਇੰਸਟੀਟਿਊਸ਼ਨਸ 'ਤੇ $100 ਮਿਲੀਅਨ ਤੋਂ ਵਧੇਰੇ ਦੀ ਟੈਕਸੇਬਲ ਇੰਕਮ 'ਤੇ ਕੌਰਪੋਰੇਟ ਇੰਕਮ ਟੈਕਸ ਨੂੰ 1.5% ਨਾਲ ਵਧਾਇਆ ਗਿਆ ਹੈ।

ਨਿਊ ਕੈਨੇਡਾ ਗਰੋਥ ਫੰਡ ਤਹਿਤ ਅਗਲੇ 5 ਸਾਲ 'ਚ $15 ਬਿਲੀਅਨ ਰੱਖੇ ਗਏ ਹਨ।

ਨਵੀਂ ਕਨੇਡੀਅਨ ਇਨੋਵੇਸ਼ਨ ਅਤੇ ਇਨਵੈਸਟਮੈਂਟ ਏਜੈਂਸੀ ਦਾ ਵੀ ਐਲਾਨ ਕੀਤਾ ਗਿਆ ਹੈ।