ਬਰਨਬੀ ਆਰ.ਸੀ.ਐਮ.ਪੀ.ਨੇ ਛਾਪੇਮਾਰੀ ਦੌਰਾਨ ਚੋਰੀ ਦੇ ਸਨਗਲਾਸਿਸ ਨਾਲ ਨਸ਼ੀਲਾ ਪਦਾਰਥ ਕੀਤਾ ਜ਼ਬਤ

ਬਰਨਬੀ ਆਰ.ਸੀ.ਐਮ.ਪੀ.ਦੀ ਇਨਵੈਸਟੀਗੇਟਿਵ ਸਪੋਰਟ ਟੀਮ ਨੇ ਹਾਲ ਹੀ ਵਿਚ ਇੱਕ ਰਿਹਾਇਸ਼ 'ਤੇ ਇੱਕ ਵੱਖਰੇ ਕੇਸ ਵਿਚ ਛਾਪੇਮਾਰੀ ਦੌਰਾਨ ਚੋਰੀ ਦੇ ਸਨਗਲਾਸਿਸ ਨਾਲ ਲਗਭਗ 5 ਗ੍ਰਾਮ ਪਾਊਡਰ ਵਾਲਾ ਨਸ਼ੀਲਾ ਪਦਾਰਥ ਬਰਾਮਦ ਕੀਤਾ,ਜਿਸ ਬਾਰੇ ਮੰਨਿਆ ਜਾ ਰਿਹਾ ਹੈ ਕਿ ਇਹ ਖ਼ਤਰਨਾਕ ਫੈਂਟਾਨਿਲ ਸੀ। ਇਹ ਨਸ਼ਾ ਚੋਰੀ ਕੀਤੀਆਂ ਐਨਕਾਂ ਦੇ ਨਾਲ ਹੀ ਮਿਲਾਇਆ ਹੋਇਆ ਸੀ।

ਪੁਲਿਸ ਨੇ ਦੱਸਿਆ ਕਿ ਉਸ ਨੇ 17 ਨਵੰਬਰ ਨੂੰ ਕੀਤੀ ਗਈ ਇਸ ਕਾਰਵਾਈ ਦੌਰਾਨ ਕੁੱਲ ਅੱਠ ਡੱਬਿਆਂ ਵਿਚ 100 ਤੋਂ ਵੱਧ ਚੋਰੀ ਦੇ ਸਨਗਲਾਸਿਸ ਜ਼ਬਤ ਕੀਤੇ। ਇਨ੍ਹਾਂ ਸਨਗਲਾਸਿਸ ਦੀ ਕੁੱਲ ਕੀਮਤ ਹਾਜ਼ਾਰਾਂ ਡਾਲਰ ਵਿਚ ਸੀ,ਇੱਕ ਆਈਟਮ 'ਤੇ $1,140 ਦਾ ਟੈਗ ਲੱਗਿਆ ਹੋਇਆ ਸੀ। ਬਰਨਬੀ ਆਰ.ਸੀ.ਐਮ.ਪੀ. ਦੇ ਕਾਰਪੋਰਲ ਮਾਈਕ ਕਲਾਂਜ ਨੇ ਕਿਹਾ ਕਿ ਵੱਡੀ ਚਿੰਤਾ ਦੀ ਗੱਲ ਇਹ ਹੈ ਕਿ ਜੇ ਇਹ ਸਨਗਲਾਸਿਸ ਬਾਹਰ ਵੇਚੇ ਜਾਂਦੇ ਤਾਂ ਕੋਈ ਵੀ ਖਰੀਦਦਾਰ ਅਣਜਾਣੇ ਵਿਚ ਫੈਂਟਾਨਿਲ ਦੇ ਸੰਪਰਕ ਵਿਚ ਆ ਸਕਦਾ ਸੀ।

ਪੁਲਿਸ ਮੁਤਾਬਕ,ਇਹ ਸਨਗਲਾਸਿਸ ਲੋਅਰ ਮੇਨਲੈਂਡ ਦੇ ਕਾਰੋਬਾਰਾਂ ਤੋਂ ਚੋਰੀ ਕੀਤੇ ਗਏ ਸਨ, ਜਿਸ ਦਾ ਪਤਾ ਇਨ੍ਹਾਂ ਦੇ ਟੈਗ ਤੋਂ ਲੱਗਾ ਜੋ ਛਾਪੇਮਾਰੀ ਦੌਰਾਨ ਵੀ ਲੱਗੇ ਹੋਏ ਸਨ। ਕਲਾਂਜ ਨੇ ਕਿਹਾ ਕਿ ਪੁਲਿਸ ਵਲੋਂ ਚੋਰੀ ਦੇ ਇਸ ਮਾਮਲੇ ਅਤੇ ਨਸ਼ੀਲੇ ਪਦਾਰਥਾਂ ਦੀ ਮੌਜੂਦਗੀ ਬਾਰੇ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਸਾਮਾਨ ਨੂੰ ਅਸਲੀ ਮਾਲਕਾਂ ਤੱਕ ਪਹੁੰਚਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।