ਬਰਨਬੀ ਆਰ.ਸੀ.ਐਮ.ਪੀ. ਨੇ ਚੋਰੀ ਦਾ ਸਾਮਾਨ ਵੇਚਣ ਦੇ ਮਾਮਲੇ ਵਿੱਚ ਇਕ ਵਿਅਕਤੀ ਨੂੰ ਕੀਤਾ ਕਾਬੂ

ਬਰਨਬੀ ਆਰ.ਸੀ.ਐਮ.ਪੀ. ਦੀ ਕਮਿਊਨਿਟੀ ਰਿਸਪਾਂਸ ਟੀਮ ਨੇ ਔਨਲਾਈਨ ਮਾਰਕਿਟ ਪਲੇਸ 'ਤੇ ਚੋਰੀ ਦੇ ਹਾਈ-ਐਂਡ ਕੱਪੜੇ ਅਤੇ ਹੋਰ ਸਮਾਨ ਵੇਚਣ ਦੇ ਮਾਮਲੇ ਵਿਚ ਇੱਕ ਵਿਅਕਤੀ ਨੂੰ ਕਾਬੂ ਕੀਤਾ ਹੈ। ਪੁਲਿਸ ਨੇ ਮੁਲਜ਼ਮ ਦੀ ਵੈਨਕੂਵਰ ਸਥਿਤ ਰਿਹਾਇਸ਼ 'ਤੇ ਛਾਪੇਮਾਰੀ ਕੀਤੀ, ਜਿਥੋਂ ਲਗਭਗ 40,000 ਡਾਲਰ ਮੁੱਲ ਦਾ ਚੋਰੀ ਦਾ ਸਾਮਾਨ ਅਤੇ 2,000 ਡਾਲਰ ਦੇ ਲਗਭਗ ਕੈਸ਼ ਦੀ ਜ਼ਬਤੀ ਹੋਈ।

ਆਰ.ਸੀ.ਐਮ.ਪੀ. ਮੁਤਾਬਕ, ਜ਼ਬਤ ਕੀਤਾ ਗਿਆ ਸਾਮਾਨ ਸਿਰਫ਼ ਬਰਨਬੀ ਤੱਕ ਸੀਮਤ ਨਹੀਂ ਸੀ। ਜਾਂਚ ਵਿਚ ਸਾਹਮਣੇ ਆਇਆ ਕਿ ਇਹ ਮਾਲ ਲੋਅਰ ਮੇਨਲੈਂਡ ਦੇ ਘੱਟੋ-ਘੱਟ ਤਿੰਨ ਹੋਰ ਸ਼ਹਿਰਾਂ ਵੈਨਕੂਵਰ, ਕੋਕੁਟਲਮ ਅਤੇ ਵੈਸਟ ਵੈਨਕੂਵਰ ਦੇ ਕਾਰੋਬਾਰਾਂ ਤੋਂ ਚੋਰੀ ਕੀਤਾ ਗਿਆ ਸੀ।

ਇੰਟੈਲੀਜੈਂਸ ਦੇ ਆਧਾਰ 'ਤੇ 19 ਨਵੰਬਰ ਨੂੰ ਬਰਨਬੀ ਆਰ.ਸੀ.ਐਮ.ਪੀ. ਦੀ ਕਮਿਊਨਿਟੀ ਰਿਸਪਾਂਸ ਟੀਮ ਅਤੇ ਬਾਈਕ ਸੈਕਸ਼ਨ ਨੇ ਮਿਲ ਕੇ ਵੈਨਕੂਵਰ ਦੀ ਰਿਹਾਇਸ਼ 'ਤੇ ਤਲਾਸ਼ੀ ਵਾਰੰਟ ਲਾਗੂ ਕੀਤਾ, ਜਿਸ ਦੌਰਾਨ ਪੁਲਿਸ ਨੇ 230 ਤੋਂ ਵੱਧ ਉੱਚ-ਪੱਧਰੀ ਕੱਪੜਿਆਂ ਦੀਆਂ ਚੀਜ਼ਾਂ ਜ਼ਬਤ ਕੀਤੀਆਂ, ਜਿਨ੍ਹਾਂ ਵਿਚ 9 ਘੜੀਆਂ ਵੀ ਸ਼ਾਮਲ ਸਨ।

ਉੱਥੇ ਹੀ, ਬਰਾਮਦ ਕੀਤੇ ਗਏ ਕੈਸ਼ ਵਿਚ 500 ਡਾਲਰ ਅਮਰੀਕੀ ਸਨ। ਸਾਰਜੈਂਟ ਜੋਨਸ ਨੇ ਕਿਹਾ ਕਿ ਇਸ ਮਾਮਲੇ ਵਿਚ 41 ਸਾਲਾ ਵੈਨਕੂਵਰ ਨਿਵਾਸੀ ਕਈ ਸੰਭਾਵੀ ਦੋਸ਼ਾਂ ਦਾ ਸਾਹਮਣਾ ਕਰ ਰਿਹਾ ਹੈ ਅਤੇ ਹੋਰ ਜਾਂਚ ਅਜੇ ਜਾਰੀ ਹੈ।