ਕੈਨੇਡਾ ਅਤੇ ਭਾਰਤ ਵਪਾਰ ਸਮਝੌਤਾ ਮੁੜ ਸ਼ੁਰੂ ਕਰਨ ਵੱਲ ਵਧੇ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਸਾਲ 2026 ਦੇ ਸ਼ੁਰੂ ਵਿਚ ਭਾਰਤ ਜਾਣਗੇ,ਉਨ੍ਹਾਂ ਬੀਤੇ ਦਿਨ ਸਾਊਥ ਅਫ਼ਰੀਕਾ ਦੇ ਜੋਹਾਨਸਬਰਗ ਵਿਚ ਜੀ-20 ਬੈਠਕ ਦੀ ਸਾਈਡਲਾਈਨਜ਼ 'ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਮੁਲਾਕਾਤ ਦੌਰਾਨ ਇਸ ਸੱਦੇ ਨੂੰ ਸਵੀਕਾਰ ਕੀਤਾ। ਇਸ ਦੌਰਾਨ ਦੋਹਾਂ ਨੇਤਾਵਾਂ ਨੇ ਦੁਬਾਰਾ ਵਿਸਤ੍ਰਿਤ ਵਪਾਰ ਸਮਝੌਤੇ ਲਈ ਵੀ ਗੱਲਬਾਤ ਨੂੰ ਮੁੜ ਸ਼ੁਰੂ ਕਰਨ ਦੀ ਸਹਿਮਤੀ ਜਤਾਈ,ਪ੍ਰਧਾਨ ਮੰਤਰੀ ਮੁਤਾਬਕ,ਇਸ ਡੀਲ ਨਾਲ ਕੈਨੇਡਾ ਅਤੇ ਭਾਰਤ ਵਿਚਕਾਰ ਦੁਵੱਲਾ ਵਪਾਰ $70 ਬਿਲੀਅਨ ਤੱਕ ਪਹੁੰਚ ਸਕਦਾ ਹੈ।

ਇਸ ਤੋਂ ਇਲਾਵਾ ਕਾਰਨੀ, ਮੋਦੀ ਅਤੇ ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਵਲੋਂ ਤਕਨਾਲੋਜੀ ਅਤੇ ਇਨੋਵੇਸ਼ਨ 'ਤੇ ਤਿੰਨ-ਪੱਖੀ ਭਾਈਵਾਲੀ ਦੀ ਨੀਂਹ ਵੀ ਰੱਖੀ ਗਈ, ਜਿਸ ਤਹਿਤ ਤਿੰਨੋਂ ਮੁਲਕ ਸਾਫ਼ ਊਰਜਾ, ਮਹੱਤਵਪੂਰਨ ਖਣਿਜ ਅਤੇ ਏ.ਆਈ.'ਤੇ ਮਿਲ ਕੇ ਕੰਮ ਕਰਨਗੇ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਇੱਕ ਬਿਆਨ ਦਿੰਦਿਆਂ ਇਹ ਵੀ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਭਾਰਤ ਨੂੰ ਇੱਕ ਭਰੋਸੇਮੰਦ ਵਪਾਰਕ ਭਾਈਵਾਲ ਵਜੋਂ ਦੇਖਦੀ ਹੈ।

ਕਾਰਨੀ ਦਾ ਇਹ ਬਿਆਨ ਉਨ੍ਹਾਂ ਦੀ ਇੰਡੋ-ਪੈਸੀਫਿਕ ਰਣਨੀਤੀ ਦਾ ਹਿੱਸਾ ਹੈ,ਜਿਸ ਦਾ ਉਦੇਸ਼ ਅਮਰੀਕਾ 'ਤੇ ਵਪਾਰ ਨਿਰਭਰਤਾ ਨੂੰ ਘਟਾਉਣਾ ਅਤੇ ਭਾਰਤ ਵਰਗੇ ਵੱਡੇ ਬਾਜ਼ਾਰਾਂ ਨਾਲ ਸਬੰਧਾਂ ਨੂੰ ਮਜ਼ਬੂਤ ਕਰਨਾ ਹੈ। ਪ੍ਰਧਾਨ ਮੰਤਰੀ ਦਫ਼ਤਰ ਮੁਤਾਬਕ, ਦੋਵੇਂ ਨੇਤਾ ਮੰਤਰੀ ਅਤੇ ਵਪਾਰਕ ਭਾਈਚਾਰੇ ਦੇ ਪੱਧਰ 'ਤੇ ਰੈਗੂਲਰ ਹਾਈ ਲੈਵਲ ਵਿਜ਼ਟ ਲਈ ਵੀ ਸਹਿਮਤ ਹੋਏ ਹਨ।