ਕੈਨੇਡਾ ਨੇ ਅਮਰੀਕੀ ਸਟੀਲ, ਐਲੁਮੀਨਮ ਟੈਰਿਫ 'ਤੇ ਜਵਾਬੀ ਕਦਮ ਚੁੱਕਣ ਦਾ ਕੀਤਾ ਐਲਾਨ

ਕੈਨੇਡਾ ਅਤੇ ਅਮਰੀਕਾ ਦੇ ਇੱਕ ਮਹੀਨੇ ਅੰਦਰ ਵਪਾਰ ਸਮਝੌਤੇ 'ਤੇ ਨਾ ਪਹੁੰਚਣ ਦੀ ਸੂਰਤ ਵਿਚ ਔਟਵਾ ਅਮਰੀਕੀ ਸਟੀਲ ਅਤੇ ਐਲੁਮੀਨਮ 'ਤੇ ਟੈਰਿਫ ਵਧਾ ਦੇਵੇਗਾ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਵੀਰਵਾਰ ਨੂੰ ਕੈਨੇਡਾ ਦੀ ਇੰਡਸਟਰੀ ਦੀ ਮਦਦ ਕਰਨ ਦੇ ਉਪਾਵਾਂ ਦੀ ਘੋਸ਼ਣਾ ਦੌਰਾਨ ਵਿਦੇਸ਼ੀ ਸਟੀਲ ਦਾ ਕੋਟਾ ਵੀ ਨਿਰਧਾਰਤ ਕਰਨ ਦੀ ਗੱਲ ਆਖੀ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ 21 ਜੁਲਾਈ ਨੂੰ ਅਸੀਂ ਅਮਰੀਕੀ ਸਟੀਲ ਅਤੇ ਐਲੁਮੀਨਮ 'ਤੇ ਜਵਾਬੀ ਟੈਰਿਫ ਵਧਾਉਣ ਜਾਂ ਘਟਾਉਣ ਦਾ ਫੈਸਲਾ ਲਵਾਂਗੇ ਅਤੇ ਇਹ ਰਾਸ਼ਟਰਪਤੀ ਟਰੰਪ ਨਾਲ ਵਾਰਤਾ 'ਤੇ ਨਿਰਭਰ ਕਰੇਗਾ।

ਪੀ. ਐੱਮ. ਕਾਰਨੀ ਨੇ ਕਿਹਾ ਕਿ ਅਸੀਂ ਇੱਕ ਨਵਾਂ ਕੋਟਾ ਸਥਾਪਤ ਕਰ ਰਹੇ ਹਾਂ, ਜਿਸ ਦਾ ਅਰਥ ਹੈ ਕਿ ਉਸ ਲਿਮਟ ਤੋਂ ਉੱਪਰ ਵਿਦੇਸ਼ੀ ਸਟੀਲ ਆਯਾਤ 'ਤੇ ਹਾਈ ਟੈਰਿਫ ਲਗਾਇਆ ਜਾਵੇਗਾ। ਪਾਰਲੀਮੈਂਟ ਹਿੱਲ ਵਿਖੇ ਪੱਤਰਕਾਰਾਂ ਨਾਲ ਗੱਲ ਕਰਦੇ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਸਾਨੂੰ ਕੈਨੇਡੀਅਨ ਵਰਕਰ ਅਤੇ ਕਾਰੋਬਾਰ ਦੀ ਸੁਰੱਖਿਆ ਲਈ ਘਰੇਲੂ ਪੱਧਰ 'ਤੇ ਤਾਕਤ ਵਧਾਉਣੀ ਹੋਵੇਗੀ।