10.76C Vancouver 10.76C VancouverJun 11, 2022 12:28 AM - The Canadian Press
ਕੈਨੇਡਾ ਦੀ ਪੁਰਸ਼ਾਂ ਦੀ ਸੌਕਰ ਟੀਮ ਨੇ ਕੁਝ ਵਿਵਾਦਾਂ ਨੂੰ ਪਿੱਛੇ ਛੱਡਦੇ ਹੋਏ ਵੀਰਵਾਰ ਨੂੰ ਖੇਡੇ ਗਏ ਮੁਕਾਬਲੇ 'ਚ ਜਬਰਦਸਤ ਜਿੱਤ ਦਰਜ ਕੀਤੀ।
ਕੈਨੇਡਾ ਦੀ ਵੀਰਵਾਰ ਨੂੰ ਵੈਨਕੂਵਰ ਦੇ ਬੀ.ਸੀ. ਪਲੇਸ ਸਟੇਡੀਅਮ 'ਚ ਕੁਰਸਾਓ ਨਾਲ ਟੱਕਰ ਹੋਈ ਸੀ।
ਇਸ ਮੁਕਾਬਲੇ 'ਚ ਕੈਨੇਡਾ ਨੇ 4-0 ਨਾਲ ਬਾਜੀ ਮਾਰੀ।
ਕੈਨੇਡਾ ਲਈ ਮੁਕਾਬਲੇ 'ਚ ਅਲਫਾਂਸੋ ਡੇਵਿਸ ਨੇ 2 ਗੋਲ ਕੀਤੇ।
ਪਹਿਲੇ ਹਾਫ 'ਚ ਪੈਨਲਟੀ ਨੂੰ ਗੋਲ 'ਚ ਤਬਦੀਲ ਕਰਨ ਤੋਂ ਬਾਅਦ ਦੂਜੇ ਹਾਫ 'ਚ ਡੇਵਿਸ ਨੇ 71ਵੇਂ ਮਿੰਟ 'ਚ ਗੋਲ ਕੀਤਾ।
ਇਸ ਤੋਂ ਇਲਾ ਕੈਨੇਡਾ ਲਈ ਸਟੀਵਨ ਵਿਟੋਰੀਆ ਨੇ 42ਵੇਂ ਅਤੇ ਲੁਕਾਸ ਕਾਵਾਲੀਨੀ ਨੇ 85ਵੇਂ ਮਿੰਟ 'ਚ ਗੋਲ ਕੀਤੇ।
ਵਿਸ਼ਵ ਰੈਂਕਿੰਗ 'ਚ 38ਵੇਂ ਨੰਬਰ 'ਤੇ ਟਿਕੇ ਕੈਨੇਡਾ ਨੇ ਵਿਸ਼ਵ ਨੰਬਰ 79 ਦੀ ਟੀਮ ਕੁਰਸਾਓ ਨੂੰ ਆਸਾਨੀ ਨਾਲ ਮਾਤ ਦੇ ਦਿੱਤੀ।
ਮੁਕਾਬਲਾ ਇਸ ਹੱਦ ਤਕ ਇੱਕ ਪਾਸੜ ਸੀ ਕਿ ਕੈਨੇਡਾ ਦੇ ਗੋਲਕੀਪਰ ਮਿਲਾਨ ਬੌਰਜਾਨ ਨੂੰ ਇੱਕ ਵੀ ਔਨ-ਟਾਰਗੈਟ ਸ਼ਾਟ ਦਾ ਬਚਾਅ ਨਹੀਂ ਕਰਨਾ ਪਿਆ।
ਹੁਣ ਕੈਨੇਡਾ ਦਾ ਸੋਮਵਾਰ ਨੂੰ ਹੌਂਡੂਰਾਸ ਦੇ ਖਿਲਾਫ ਸੈਨ ਪੈਡਰੋ ਸੁਲਾ 'ਚ ਮੁਕਾਬਲਾ ਹੋਵੇਗਾ।
ਇਸ ਤੋਂ ਪਹਿਲਾਂ ਕੈਨੇਡਾ ਦੇ ਇਸੇ ਹਫ਼ਤੇ 2 ਟਰੇਨਿੰਗ ਸੈਸ਼ਨ ਮਿਸ ਹੋਏ ਸਨ ਅਤੇ ਵੈਨਕੂਵਰ 'ਚ ਪਨਾਮਾ ਖਿਲਾਫ ਖੇਡਿਆ ਜਾਣ ਵਾਲਾ ਮੁਕਾਬਲਾ ਵੀ ਰੱਦ ਹੋ ਗਿਆ ਸੀ।
ਪੂਰਾ ਮਾਮਲਾ ਕੰਟਰੈਕਟ ਵਿਵਾਦ ਨਾਲ ਸੰਬੰਧਤ ਸੀ।
ਮੁਕਾਬਲੇ ਦੌਰਾਨ ਮੈਦਾਨ 'ਤੇ ਪਹੁੰਚੇ ਟੌਪਲੈਸ ਪ੍ਰਦਰਸ਼ਨਕਾਰੀ
ਕੱਲ ਦੇ ਕੈਨੇਡਾ ਤੇ ਕੁਰਸਾਓ ਦੇ ਸੌਕਰ ਮੁਕਾਬਲੇ 'ਚ 2 ਐਨਵਾਇਰਨਮੈਂਟਲ ਪ੍ਰਦਰਸ਼ਨਕਾਰੀ ਟੌਪਲੈਸ ਹੋ ਕੇ ਵਿਰੋਧ ਦਰਜ ਕਰਵਾਉਣ ਵਾਸਤੇ ਪਹੁੰਚ ਗਏ ਸਨ।
ਬੀ.ਸੀ. ਪਲੇਸ ਸਟੇਡੀਅਮ 'ਚ ਇਹ ਦੋਵੇਂ ਸ਼ਰਟਲੈਸ ਪ੍ਰਦਰਸ਼ਨਕਾਰੀ ਗੋਲ ਪੋਸਟ ਕੋਲ ਖੜ੍ਹ ਗਏ ਸਨ।
ਇਸ ਦੌਰਾਨ ਕਈ ਮਿੰਟ ਤਕ ਮੁਕਾਬਲੇ ਨੂੰ ਰੋਕਣਾ ਪਿਆ।
ਪ੍ਰਦਰਸ਼ਨਕਾਰੀਆਂ 'ਚ ਇੱਕ ਔਰਤ ਤੇ ਇੱਕ ਆਦਮੀ ਸ਼ਾਮਿਲ ਸਨ।
ਬਾਅਦ 'ਚ ਸਿਕਿਉਰਿਟੀ ਤੇ ਪੁਲਿਸ ਨੇ ਮਿਲ ਕੇ ਦੋਵਾਂ ਨੂੰ ਮੈਦਾਨ ਦੇ ਬਾਹਰ ਦਾ ਰਸਤਾ ਵਿਖਾ ਦਿੱਤਾ।
ਦੋਵਾਂ ਪ੍ਰਦਰਸ਼ਨਕਾਰੀਆਂ ਦੇ ਸ਼ਰੀਰ 'ਤੇ '1,022 days left' ਲਿਖਿਆ ਹੋਇਆ ਸੀ।
ਇਹ ਸੰਦੇਸ਼ ਮੁੱਖ ਤੌਰ 'ਤੇ ਯੂ.ਕੇ. ਸਰਕਾਰ ਦੇ ਸਾਬਕਾ ਚੀਫ਼ ਸਾਇੰਟਿਫਿਕ ਐਡਵਾਈਜਰ, ਸਰ ਡੇਵਿਡ ਕਿੰਗ ਦੇ ਸੰਦੇਸ਼ ਵੱਲ ਇਸ਼ਾਰਾ ਕਰਦਾ ਸੀ ਜਿੰਨਾ ਦਾ ਕਹਿਣਾ ਹੈ ਕਿ ਅਗਲੇ ਕੁਝ ਸਾਲ ਮਨੁੱਖਤਾ ਦੇ ਭਵਿੱਖ ਦਾ ਫੈਸਲਾ ਕਰਨਗੇ।
ਇਨ੍ਹਾਂ ਪ੍ਰਦਰਸ਼ਨਕਾਰੀਆਂ ਬਾਰੇ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਇਹ 'ਸੇਵ ਓਲਡ ਗਰੋਥ' ਨਾਮ ਦੇ ਐਂਟੀ ਲੌਗਿੰਗ ਗਰੁੱਪ ਦੇ ਸਮਰਥਕ ਹਨ।
ਇਸ ਗਰੁੱਪ ਨੇ ਪਿਛਲੇ ਕੁਝ ਸਮੇਂ ਦੌਰਾਨ ਕਈ ਥਾਵਾਂ 'ਤੇ ਵਾਤਾਵਰਨ ਬਚਾਅ ਸੰਬੰਧੀ ਪ੍ਰਦਰਸ਼ਨ ਕੀਤੇ ਹਨ।
ਇਸ ਗਰੁੱਪ ਵੱਲੋਂ ਅਗਲੇ ਹਫ਼ਤੇ ਤੋਂ ਵੀ ਸੂਬੇ ਦੇ ਕਈ ਅਹਿਮ ਇਨਫਰਾਸਟਰਕਚਰ 'ਤੇ ਵਿਘਨ ਪਾਉਣ ਸੰਬੰਧੀ ਐਲਾਨ ਕੀਤਾ ਗਿਆ ਹੈ।
ਹਾਲਾਂਕਿ ਇਹ ਦੱਸਣਾ ਵੀ ਜਰੂਰੀ ਹੈ ਕਿ ਇਨ੍ਹਾਂ ਪ੍ਰਦਰਸ਼ਨਕਾਰੀਆਂ ਵੱਲੋਂ ਸਿਰਫ ਗੋਲ ਪੋਸਟ ਕੋਲ ਖੜ੍ਹ ਕੇ ਆਪਣਾ ਸੰਦੇਸ਼ ਦੇਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ ਪਰ ਕਿਸੇ ਖਿਡਾਰੀ ਕੋਲ ਪਹੁੰਚ ਕਰਨ ਜਾਂ ਕਿਸੇ ਪ੍ਰਕਾਰ ਦੀ ਹਿੰਸਾ ਕਰਨ ਦੀ ਕੋਸ਼ਿਸ਼ ਨਹੀਂ ਕੀਤੀ ਗਈ ਸੀ।
ਇਸ ਤੋਂ ਇਲਾਵਾ ਕੁਝ ਖਿਡਾਰੀ ਇਨ੍ਹਾਂ ਪ੍ਰਦਰਸ਼ਨਕਾਰੀਆਂ ਕੋਲ ਜਰੂਰ ਪਹੁੰਚੇ ਪਰ ਜਲਦੀ ਹੀ ਉਹ ਪ੍ਰਦਰਸ਼ਨਕਾਰੀਆਂ ਤੋਂ ਦੂਰ ਹਟ ਗਏ ਤੇ ਸਿਕਿਉਰਿਟੀ ਤੇ ਪੁਲਿਸ ਵੱਲੋਂ ਮਾਮਲੇ ਨੂੰ ਸੁਲਝਾਉਣ ਦੀ ਉਡੀਕ ਕਰਦੇ ਰਹੇ।
