ਕੈਨੇਡਾ ਸਰਕਾਰ ਨੇ ਡਿਪਲੋਮੈਟ ਦੇ ਬੱਚਿਆਂ ਅਤੇ ਗਾਰਡੀਅਨ ਨੂੰ ਇਜ਼ਰਾਇਲ ਤੋਂ ਬਾਹਰ ਕੱਢਣ ਦਾ ਕੀਤਾ ਫ਼ੈਸਲਾ

ਕੈਨੇਡਾ ਸਰਕਾਰ ਨੇ ਮਿਡਲ ਈਸਟ ਵਿਚ ਯੁੱਧ ਦਾ ਤਾਜ਼ਾ ਖਤਰਾ ਮੰਡਰਾਉਣ ਦੇ ਖ਼ਦਸ਼ੇ ਵਿਚਕਾਰ ਆਪਣੇ ਡਿਪਲੋਮੈਟ ਦੇ ਬੱਚਿਆਂ ਅਤੇ ਗਾਰਡੀਅਨ ਨੂੰ ਇਜ਼ਰਾਇਲ ਤੋਂ ਬਾਹਰ ਕੱਢਣ ਦਾ ਫੈਸਲਾ ਕੀਤਾ ਹੈ। ਉਨ੍ਹਾਂ ਨੂੰ ਸੇਫ ਥਰਡ ਕਿਊਟੀ ਵਿਚ ਅਸਥਾਈ ਤੌਰ ’ਤੇ ਸ਼ਿਫਟ ਕੀਤਾ ਜਾ ਰਿਹਾ ਹੈ, ਜਦੋਂ ਕਿ ਦੂਤਾਵਾਸ ਸਟਾਫ ਦੇ ਇਜ਼ਰਾਇਲ ਵਿਚ ਹੀ ਰਹਿਣ ਦੀ ਉਮੀਦ ਹੈ।

ਕੈਨੇਡਾ ਨੇ ਇਹ ਫੈਸਲਾ ਉਸ ਸਮੇਂ ਕੀਤਾ ਹੈ ਜਦੋਂ ਈਰਾਨ ਅਤੇ ਹਿਜ਼ਬੁੱਲਾ ਦੇ ਨਾਲ ਇਜ਼ਰਾਈਲ ਦੇ ਵਧ ਰਹੇ ਤਣਾਅ ਨੇ ਮਿਡਲ ਈਸਟ ਵਿਚ ਯੁੱਧ ਦੇ ਇੱਕ ਹੋਰ ਖ਼ਤਰੇ ਨੂੰ ਵਧਾ ਦਿੱਤਾ ਹੈ, ਗਾਜ਼ਾ ਵਿਚ ਜੰਗ ਕਾਰਨ ਇਹ ਖੇਤਰ ਪਹਿਲਾਂ ਹੀ ਤਣਾਅਪੂਰਨ ਸਥਿਤੀ ਵਿਚ ਹੈ।

ਕੈਨੇਡਾ ਦੇ ਗਲੋਬਲ ਅਫੇਅਰ ਡਿਪਾਰਟਮੈਂਟ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਇਜ਼ਰਾਇਲ ਦੇ ਤੇਲ ਅਵੀਵ ਅਤੇ ਲੇਬਨਾਨ ਦੇ ਬੇਰੂਤ ਤੇ ਵੈਸਟ ਬੈਂਕ ਦੇ ਰਾਮੱਲਾ ਵਿਚ ਉਸ ਦੇ ਦੂਤਾਵਾਸ ਦਫ਼ਤਰ ਪੂਰੀ ਤਰ੍ਹਾਂ ਕੰਮ ਕਰ ਰਹੇ ਹਨ ਅਤੇ ਕੈਨੇਡੀਅਨਾਂ ਲਈ ਜ਼ਰੂਰੀ ਸੇਵਾਵਾਂ ਪ੍ਰਦਾਨ ਕਰਨਾ ਜਾਰੀ ਰੱਖੇ ਹੋਏ ਹਨ।

ਇਸ ਤੋਂ ਪਹਿਲਾਂ ਸਰਕਾਰ ਕੈਨੇਡੀਅਨਾਂ ਨੂੰ ਇਜ਼ਰਾਈਲ ਦੀ ਯਾਤਰਾ ਤੋਂ ਬਚਣ ਦੀ ਚਿਤਾਵਨੀ ਵੀ ਜਾਰੀ ਕਰ ਚੁੱਕੀ ਹੈ ਅਤੇ ਸਰਕਾਰ ਦਾ ਕਹਿਣਾ ਹੈ ਕਿ ਵੈਸਟ ਬੈਂਕ, ਗਾਜ਼ਾ ਪੱਟੀ, ਯਰੂਸ਼ਲਮ ਅਤੇ ਲੇਬਨਾਨ ਦੀ ਯਾਤਰਾ ਕਰਨ ਤੋਂ ਗੁਰੇਜ਼ ਕੀਤਾ ਜਾਣਾ ਚਾਹੀਦਾ ਹੈ।