ਕੈਨੇਡਾ ਚੋਣਾਂ: ਚੁਣੌਤੀਆਂ ਦੇ ਬਾਵਜੂਦ ਪਿੱਛੇ ਨਹੀਂ ਹਟਣਗੇ ਜਗਮੀਤ ਸਿੰਘ

ਕੈਨੇਡਾ ਦੀਆਂ ਚੋਣਾਂ ਦੌਰਾਨ ਐੱਨ. ਡੀ. ਪੀ. ਦੇ ਚੋਣ ਸਰਵਿਆਂ ਵਿਚ ਪਛੜਨ 'ਤੇ ਜਗਮੀਤ ਸਿੰਘ ਦਾ ਕਹਿਣਾ ਹੈ ਕਿ ਉਹ ਚੁਣੌਤੀਆਂ ਦੇ ਬਾਵਜੂਦ ਪਿੱਛੇ ਨਹੀਂ ਹਟਣਗੇ। ਜਗਮੀਤ ਨੇ ਕਿਹਾ ਕਿ ਮੈਨੂੰ ਇਸ ਬਾਰੇ ਕੋਈ ਭਰਮ ਨਹੀਂ ਹੈ, ਕੁਝ ਗੰਭੀਰ ਚੁਣੌਤੀਆਂ ਹਨ ਜਿਨ੍ਹਾਂ ਦਾ ਅਸੀਂ ਸਾਹਮਣਾ ਕਰ ਰਹੇ ਹਾਂ ਅਤੇ ਕੰਮ ਕਰਨ ਵਾਲੇ ਲੋਕ ਵੱਡੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਦੇ ਹਨ।

ਗੌਰਤਲਬ ਹੈ ਕਿ ਜਗਮੀਤ ਸਿੰਘ 2017 ਤੋਂ ਪਾਰਟੀ ਦੀ ਵਾਗਡੋਰ ਸੰਭਾਲ ਰਹੇ ਹਨ, ਇਸ ਲਈ ਇਹ ਚੋਣਾਂ ਉਨ੍ਹਾਂ ਲਈ ਇੱਕ ਕਰੋ ਜਾਂ ਮਰੋ ਵਾਲਾ ਰਾਜਨੀਤਿਕ ਪਲ ਹੈ। ਉਨ੍ਹਾਂ ਦਾ ਰਾਜਨੀਤਕ ਤਜਰਬਾ ਕਾਫ਼ੀ ਜ਼ਿਆਦਾ ਹੈ ਪਰ ਪਬਲਿਕ ਓਪੀਨੀਅਨ ਪੋਲ ਦੱਸਦੇ ਹਨ ਕਿ ਪਾਰਟੀ 28 ਅਪ੍ਰੈਲ ਨੂੰ ਪੈਣ ਵਾਲੀਆਂ ਵੋਟਾਂ ਤੋਂ ਪਹਿਲਾਂ ਲਿਬਰਲਸ ਅਤੇ ਕੰਜ਼ਰਵੇਟਿਵਸ ਤੋਂ ਬਹੁਤ ਪਿੱਛੇ ਹੈ।

ਉਥੇ ਹੀ, ਟਰੰਪ ਵਲੋਂ ਟੈਰਿਫ ਅਤੇ ਕੈਨੇਡਾ ਬਾਰੇ ਧਮਕੀਆਂ ਵਿਚਕਾਰ ਇਨ੍ਹਾਂ ਚੋਣਾਂ ਨੂੰ ਕੈਨੇਡਾ ਲਈ ਹੋਰ ਵੀ ਮਹੱਤਵਪੂਰਨ ਵਜੋਂ ਦੇਖਿਆ ਜਾ ਰਿਹਾ ਹੈ। ਲੇਜਰ ਵਲੋਂ 21 ਅਤੇ 23 ਮਾਰਚ ਵਿਚਕਾਰ ਕੀਤੇ ਗਏ ਤਾਜ਼ਾ ਸਰਵੇ ਮੁਤਾਬਕ, ਐਨ.ਡੀ.ਪੀ. ਦਾ ਸਮਰਥਨ ਮੌਜੂਦਾ ਸਮੇਂ ਸਿਰਫ 6 ਫੀਸਦੀ ਹੈ, ਜੋ ਪਿਛਲੇ ਸਰਵੇ ਤੋਂ ਤਿੰਨ ਅੰਕ ਘਟਿਆ ਹੈ।